SI SALAWATI

 

Oleh : Darwin Nasution

Jegesna binege goar i tele sasambalik, salawat mantong. Sambalik nai mungkin inda, sala si wati. Inda boto ale dongan nadua tolu gorar ni alak on, goar ni binatang don. Binatang aha mai? Di catatan na pangabisan ubaen satontang alak naidoit ni latong, adong mada request di koment sian amangboru niba Kumpul Hsb, anso ibaen jolo ninna carito satontang bodat ato parbodat. Bodat mada si Salawati on, bodat boru-boru pangajaran ni lae niba halak si Natarman di huta najolo. Bodat na menek nadodas hona sintakkon nampunasanai harani na garangan sala buat, tarbuatsa naposo. On ma pamangkal ni carito on, ita pagonop juo dot mangajar bodat inda bisa saro Mandailing kon saro Malayu do, bope na tarmarpasir manombo.

Songon jia na mangajar bodat umumna, ioban halak lae niba on ma tu banjar julu bodat na taranakna on marsiajar mambuat, isapaan jolo arambir ni alak na tarrondo buaton. Biama, harana si Salawati pe memang na urang dope mahirna. "Ayo Panjat", ninna ma muloi lae niba on. Inda "Adope panaek", ninna saro Mandailing tele. Rupa kon bahasa Malayu do mangajar bodat baik i Tamiang, Siabu atope Parlampungan. I patorus kalai dung tolap bodat nai tu mayang nan, "Cari na masak", ninna muloima markorsik. "Cari yang matang", ninna do Malayuna na baik dot benar, beh dot iba pe marpasir ma deba bo. Get ibuatna na poso, "Lain, cari yang lain, yang masak", ninna muse. Guru matematik dentong lae niba on di madrosah nai kampung i an, jadi maklum ma ita ro soni bahasa Malayuna, apalagi mangajar matematik pe saro pangantarna bahasa Mandailing do. Jadi dua profesi ato bahkan tolu profesi nalai bidang mangajar sude, mangajar kalak, mangajar bodat, dot mangajar batang gota pala dompak tempo. Mulak tu na mambuat karambir, i putar si Salawati tong sada na lamun i, tai hama na sohot lala ia, mang pir dot tangkil nai pe sude. Tarhonok so madabusa bope hum sada na parjolo i. Longang nampuna bodat ben jop na roa nia mang malo mandabu, bo nga sajia honok bumbam muse ma dua, get i tinggang doma halai. I ligi ma mandang na hacirlakanna dope ulit nai, na gabur dope niroa i lala si Slawati tangkil nai ima so isarna. Icubo i panampul na dua na pangabisan i, hum na monmonon dope. Tarboto di amang Torkis nampuna harambir bo goyak roa nia. Angke mang 50 taon tu gincat dontong amanta on, ngana searu porlu be disia harambir poso. Manjampal sabai pe anta na tolu kali nai domei sataon ning alak si Munthe.

I suru lae niba on turun si Salawati targan so marmara manambai. "Len ma ibodat mi sada na sala buat i", ning amang Torkis tu alak si Natarman. Na has mada si Salawati mangincopi mon-mon nai da, soni juo tu ujung ni tampuk nai, manis ruangku. Ben tabona ilalana, ro jabat sura-sura an naisangajo nia dei baen disia. Songoni ma torus ioban-obankon kalai bodat on na jot-jotan sala buat. Anggo ninna hubege caritona bope na taranakna, boti boru-boru muse ngadong jaminan rupa momo ra harana adong warna narata i bituanai. Nga pas jau sanga mitos pe on, sirata bitu on nabobalan i ajaran . Tarsarupo mungkin dot anjing ujung iur na bontar i pantangkon kalak mangajarna, dodasan ra an dei ia tu takar.

Harani na sala buat sajo, na jot-jotan hona sintakkon tu toru si Salawati. Ibo do roa mangaligi bodat dot nampunasa nai. Rap-rap loja jadina. Padohal anggo caritona binege na sampe do tolu ratus ribu panuorna baru-baru dapot na lewati. Hum godang dope harga diri ni bodat anggo soni dari pado harga diri ni manusia, ning si Kamek di lopoan . Aso ningia alasanna, angke saratus ribu maia i gadis kalak i suara nia pala satiop pamilu ato pilkada. Boh botul juo analisa ni parpoli itik Kamek Mardia on ni roangku i bagasan lau mondok-ondok au mangaminkonna. Bope na jot-jotan manoskon roa si Salawati, hum pade dope arga diri nia pado halak sakampung na manggadis mura suara di pamilu-pamilu.

Jana mohot mantong sakampung si Salawati, bodat na mangiut tu goarna sala buat karambir. Madung simulasi pe mambuat di toru jolo, inda signifikan parubahan. Nga honok aropku dung jadi bahan pacia-ciahon ni alak tu alak lae niba on, igadis kalai ma si Salawati tu sudagar bodat. Igadis do ngana pola tukar tamba bage umpamo. Adong muse tong di kampung nami i na lewat-lewat gaja na markareta angin, gadisonna manuk dot dodas maroban bodat baen pambuat ni arambir lau marjagal, atope gadison sanga manabusi juo ia bodat na digadis nia alak. Ben na hurang sep on dontong performance ni si Salawati, 100 ribu nai doma laku, ipe ning gaja i baen ayam-ayam dome i soni hatia ra mambuat. Oisdah jatuh total arga nai, ben rata bitua nia, icet gari dot nagorcing martukar dei ruai.

telah tayang di FB Feb 14