Oleh : Darwin Nasution
Latong on ima sabangso hayu na marbulung. Bulung nai adong habongna (miangna) na manyobobkan gumatal manyarira pula hona tu kulit niba. Adong on tardua mocom latong nai tandai ni alak di Mandailing, ima latong manuk na menek-menek daunna boti rodop batangna, dot latong kurca na bolak-bolak bulung na jana lampas batangna. Anggo latong manuk paling incat mei sameter, tai latong kursa ra dei saincat ni batang kopi 5-6 meter tu pusukan. Sude jenis ni latong on di arangan an mon tubuna, harana kon na lombab do udara nai so cocok ilala ia.
Na dodasan on latong on hona tu iba dompak so binoto sanga inda isangajo. Umpamo dompak marburu, mamotong dalan, ato asik mambuat suan-suanan na asing songon kopi, atope dompak mangkojar binatang na ona tembak madabu samisal burung pune sanga amburkom. Asal ibolus doma songoni bo ma dais tu latong. Anggo latong manuk maia, pala hum sadari pe mago mei gatal nai apalagi tarapuskon aek ni urat nai. Tai anggo latong kurca ra dei sapoken so mela, ngana mampan muse i ibaen pe urat nai, angke na ginjang-ginjangan i miang ato rintopna na marbisa i manyusuk tu pori niba, ra dei ruangku sampe aliran daro na alus imei so ancitna.
Manyarira dei hona aek sapala na dais i tu kulit ni halak latong kurca. Mun iangkat ngun aek i mun ma ancit muse hona angin. Pala i cubo tong najolo mangkais rintop nai palan dot piso silet na baru, sangajo na ginjang-ginjang rintop nai mangkat. Imei ruangku so hancitna, son na hudok nangkinan tarsaluran daro atope mungkin tarjuhut jabatna. Mun honok disi, mun malala ato mangkagotap hona aek sanga sabun, ima mungkin so mago-mago boti juo do lolot tibuna.
Na ingkani pala hona iba latong on, maso daganak dope, na ra do tangis-tangis iba borngin ibaen i apalagi ogos tu amparan podoman nibai. Songoni juo pala hon aek dompak maridi. Dongan-dongan niba na barani nai i sungkar kalai dei parhonaan nai dot bingkuang. Masuk akal juo dei ruangku ba secara herbal, namilas i paaloon tu na ngali, i incop na ngali i milasnai harani hum bahat ia. Iba hum ona ngin pe ma mingis-mingis sajo iba, ulang majolo nangkan manyungkarna.
Ima sejarah na sotik satontang mara-mara di arangan. Anggo parburu dot pangguris atope pambuat hotang na papi nai nga nangkan na hona be halai i, harana marsaraor panjang, marbaju tangan panjang, marsipatu ladam ato gambir dot markupiah dalai tu arangan. Marpota pe ale ecekna so bage halangan be ji alai hum latong, asal ulang tungir, tampiras sanga sampoda. Anggo i tu bagasanan pe lek lilis dei. Iba naingkani hona sajo iba latong tong benna saraor tu laut tu darat i dope i iba puna, saraor pontong polisi india. Ahantong naso hona, dot sampoda na pe marliskang doma manombo, apalagi latong songon na marlangganan doma ro.
telah tayang di FB Feb 14
0 komentar:
Posting Komentar