Songon na asing binege goar sanga na tarjadi tu aha sajo nimu da, adong pultakna. Mangarti maita tong jabat do pultak adong mei na sar-sar. Pultak ulu ni halak, adong mudar sampak ato manetek; pultak gule di palastik gorcing markuah; pultak goni ni eme sampak marsabur-sabur i lupak i; pultak benen ni kareta angin si Kantang sar-sar angin nai sahinggo tarpelak; pultak baro ni amanta Ja Pangibulan mapistak uor nai; ato bahat dope telehe na asing satontang na pultak on.
Caritonta sakali on adong juo do memang pultakna, tapi ibaba doma dopak sotik pultak nai, sabangso panganon do on. Panganon naon lek tarbege soni juo ima pultak-pultak gorarna. On ma sabangso buah parbatangna songon tomat di saba-saba i. Mangiut ia tubu inda bage isuan dina markacang goreng ato palawija na lain. Jadi pala marbabo, ato mancabut kacang goreng lek na i pajiar mon soni jong-jong di batangi i sanga di antara ni kacang goreng i. Madung mangarti ma sude i parsaba i bahasona pultak-pultak on bisa halilian ni daganak pala mancabut kacang atope sampe dung salose sude pamuli kacang goreng nai. Lek na kehe dope daganak manjalahi pultak-pultak nalamun, harana nataboan manis-manis, um tabo dope pado tomat na lamun, harana tomat adong macom na.
Tubu ma pultak-pultak on mangiut kacang goreng son naidok nangkinani. Tarheran muse do antong ilala aso pas markacang maia so ro ia.Anggo dompak mareme i saba i ngadongi ro ,bope umpamana di nahiang-hiang di batangi i. Ra mon da niroa anggo saonok eme isaba i maraek, so majolo pultak-pultak on songon spora tile. Dung i tanom palawija songon kacang ato jegang marroan mei pultak-pultak, tarsongon na dung hiang jolo saba i oni itanom kacang goreng, inda ra top dot eme bope madung mangkiang. Bontukna dung i ubak ulit nai songon tomat na menek-menek i ato balinjen, hum menek dope telehe sian i. Warna na krem tarcoklat-coklat, teksturna marmiyak. Batangna mardangka-dangka rondo tubuna tar 30 centi ngun tano i. Margantilan ma pultak-pultak nai di dangka-dangka nai bahat, na gorcing ulitna tando na lamun. Anggo rata dope ulit nai, rata juo dope i i bagasan paet-paet dope daina, oni ngana tarpangan i baen maungna.
Iubakan mantong jolo sana dapot daganak i pultak-pultak nalamun di sopo saba i. Dung salose mangubaki, na tinggal manguntado doma halai ipamasuk tu baba sada-sada, isargut sakali,pultak sarsar mei sakali ibaba batu dot juhut nai, baru i ilkil. Alus dontong batu nai, nga mangua tarilkil pe sanga tarpangan, nga mangkaru jabat tu dai ni juhut ni pultak-pultak on. Tarsongon namangan markisa sanga aramboja pe kan nga sega jabat dai nai pala tarpangan batu nai. Tagi ma halilian paringgaskon ni daganak sambil maradian mancabut kacang goreng dompak panen ato pamuli on. “Dot dau umak non tu saba mancabut kacang goreng, lao marpultak-pultak dot kakak”, ning si Kamek dina panen kacang goreng kalai di saba tinggal. “Jiabo mang dot ko, asalma na ra ho manolongi karejo”, ning umak nia. Topot di waktuna honokan marpultak-pultak do ale pado manolongi, daganak mantong angke na marmayam dope gokan isi utok-utok ni alai, sampe marjajo jabatna tu saba ni halak. So bage mangua i, ngana marmara pola ibaen i. Pultakkon tusi pultak-pultak nai…
telah tayang di FB Des 13
0 komentar:
Posting Komentar