BULUNG BOTIK MARDAI MERA

 

Oleh : Darwin Nasution

Molo sonang roha, gule bulung botik pe mardai mera

Molo au, susah pe ulala lek taboan do ulala gule mera

Uti-utian pagodang roha madai, hangoluan na sederhana, ambaen i dope nadong, i kiaskon tobang-tobang i ma tu daganak ni alai. Anggo bulung botik antong ampot momo dope hatia i di Mandailing. Pala mera anggo ngadong sinaloan manjala, mangkail, martanggal, marsarir atope mangalukah, godang dei harapan nga nangkan na sampe mera i tu bagas. Angkon na manabusi doma antong, muloi najolo lek nagodang mei argana, jat mera na naioban domei igadis tu alak-kalak na maradong i epeng na di pasar Kotanopan.

Jadi sonjia doma so botul bulung botik on mardai mera. Hatiha i kehe mada Jabagariang mangarsik dot dongan na tu urat ni gala-gala an. Dung itobotan topi nai dot batu nai solotan dot batang pisang na bucuk, adope ituk-tuk Jalambok ma tuba urat nai, lalu i sampak-sampakkon tu urat ni gala-gala nangkinani. Sarsar ma pajolo gamak. aporas, siduri dot udang nai. Nga sadia onok, umtahan niroa tu tuba, manimbukma dua garing na pamera-mera on. Pas mantong bagi dua sada be alai mera nai, gulaen na alus nai sanjomak be. Na alus i um pas boyomon dei ning Jabagariang ji alai harana sampe do pitu anak nia, soni juo Jalambok adong lima pomparna. Disi juo dope di topi aek ibituai alaima mera na marsiajar i harana so tinggal manyale doma non tu bagas. Lau mamboyom na alus lalu manyale mera potang ni ari di tataring ni bagas ni alai nadua. Dung tarsale igantungkon ma soni i ginjang tataring i so lek hona timbus parmasakan mera on.

Tarmanyogot ni ari get manggule bulung botik inanta dot Jabagariang i. Madung oban do ngun kobun natuari rupa daun botik nia dot pangela paet nai ima bulung sanduduk. Manombo daun ni jambu orsik dei ibaenna pala nga lewat di luok ni sanduduk di arangan an. Ibolgangna majolo bulung botik on dot daun sanduduk i ira-ira satonga jom pangonok na. Marwarna manjadi tarcoklatma nida tong jadi na bulung botik i iuba zat ni sandudukna on. I giling umak on muse ma lasiak, tanaon, pege, nagorcing dot balinjen sakaligus. Dung masas i paimarna tu balanga panggulean i, itamba dot halas na asal tuk-tuk sotik dot sangge-sangge sabatang. Lopeh i iporo inantai ma harambir na madung iuhur si Rapmaita nangkin manolongi i dapur. Tar opat sangkir ibaen inanta on aek pamoro pasakali na, bulus ituangkonna do tu balanga na marisi lasiak nangkinani, ipamasak santan pati nai parjolo dot lasiak. Dua sangkir itambaina arambir nai poro iusehon tu cambong nadong disi jolo. I gaor-gaor inanta on ma lasiak na marcampur pati i asok-asok dot api na targodang so ulang pocah santan. Amanma ngun na pocah santan, artina ma deges sigor dot gur-gur nai i pamasuk inantai ma bulung botik na madung ibolgang nangkinani ipadomu tu santan i. Ni padomuna palalu santan kw2 nai tusi, sakali manggaor-gaor doma sude. Ira-ira satonga jom lek nai gaor-gaor dope i su deges rato masuk santan i tu pori-pori ni bulung botik on.

Antargan so i paangit dung i sira an, ipamasuk inantaon ma mera nai sale i tu ginjang ni gule on. Nga sajia honok antong taru na muap mera mada bulung botik siak ni alak Jabagariang on. Songon na rato ma muap nai manjuruk tu kuah ni gule dot bulung botik nai dompak paangitna, taru na muap doma sampe tu kantor-kantor ni bagas nalai i, tartongkin dung i, iangkat ma mulak gulaen on, baru isangkotkon lek di ginjang tataring i. Mang dapot mantong muap dot dai nai di gule on. Jadi on mada nanidok ni alak i bulung botik mardai mera, mera nai rondamkon maia. Incogot iulakan muse, anta na piga kali alai mangan mera harani mera na sada on ...

telah tayang di FB Des 13