"Sumbayang kotu maita madung lewatma kapal"
"Madung jam piga, WIB dei sanga Waktu. Inda, Seiko don ning bayo i mandok merek ni jom tangan nia i"
Judul nai ginjang on satontang pambotoan ni alak Mandailing don tu hatia-hatia sumbayang najolo. Marsareto dot i manjadi patokan di waktu mangan rap-rap dot manontuhon hatia marangkat dot mulak marusaho. Adong muse dope i tambana ima waktu nai buat sian sora ni binatang. Na santing mada bahatna, tapi ngana jabat manyusahkon i binege najolo sanga jia pake on, na berjalan alami dei songoni, ngadong na sada i gonti on na lain.
Ngana piga bagas dabo na mar jom waktu i di huta-huta di Mandailing. Nadong pe jom per nai kunci dot nai engkol i dope i sakali sabulan. Adong juo do nian di musojid manjadi pangaligian ni waktu alak nabahat. Merekna na beredar hatiha i Lorus dasar ni tanah nai (background ) nai na bontar pala inda targorcing cirlak ni kuningan.
Pala waktu WIB antong patokanna warta berita mei ngun RRI Nusantara 1 Medan ato RRI Nusantara 3 Pakanbaru di jam 12.00 sanga jam 13.00. Warta berita on patokanna WIB imundurkon satonga jom ima Waktu Mandailing ecekna. Jadi pala madung warta berita jam 12 paintehon satonga jom nai adong mei waktu sumbayang (kotu) Luhur. Pala pas mambege nai tong jam 13.00 ato jam sada madung langsung mei masuk kotu, na bisa ma torus i sumbayang kotu luhur nangkinani, ato dodas idokon sumbayang kotu sajo maia. Pala jam 12 do nangkin tarboto waktu ngun berita, satonga jom iukur natobang tobang mei songoni dua kambalun pusuk abis iarsik marasok.
Anggo dompak di hauma, di kobun ato di saba songon jia manontuhonna waktu luhur. Las niari kehe ma tu metode ni Islam i mulona, asal madung meser sotik halinu ni tungko ato sanga aha na lidang tu arah runcur ni mataniari. Dompak laung ngadong mataniari, najolo adong muse na paboahon bahasona adong lewat kapal terbang jam 12.30 ato tonga sada. Sumbayang maita madung lewatma kapal ninna, madung jam 12 mei Waktu, maksud ni i waktu Mandailing. Kapal terbang na laos get tu Padang ngun Medan mada niroa i etongan elmu bumi na so mangalintas i itaan tele. Asar tong songoni juo ma, pala madung ginjangan halinu pado tungkonai masuk mei kotu Asar. Marlaung ato golap, pangukurna karejo saba mancangkul dua lupak na menek ira-ira 2 x 2 x 3 dos dohot 12 meter parsogi dung mangan kotu lopeh sumbayang. Songoni juo mei di na mangarabi ato manajak kobun tarsaijuo ma ukuranna masuk mei waktu Asar i.
Anggo waktu Maghrib ato kotu magorit na alami tando marayakkonna di arangan mangkuling gayo. Muli ma pala dung mangkuling ia. Satonga jom non di pardalanan, na mangkuling mei silonging. Waktu anggo di jom ima pukul 6.30 potang laos borngin, dos dohot pukul 6.00 waktu setempat, pas mai kotu magorit i. Na lain partandona antong sonja narara ma, ato madung lewat haluang, artina inda habang-kabang be madung songgop tu panjalahan panganon nai. Kotu Isya madung mago sonja narara. Palabatas doma madung jam 7.30 WIB ato jam 7.00 Waktu. Tarboto dei antong jom anggona i kampong do alaki, mangaligi jom langsung atope mambege berita ngun RRI sanga Radio Malaya.
Sada nai na pangabisan manontuon waktu Subuh, dodasna pukul 5.30 ato ato pukul 5.00 Waktu, waktu Mandailing nangkinani. Markabotulan indadong jom di bagas i, mambege sora ni kico-kico adong mei kotu Subuh. Amanna antong marsapa domei tu hombar ato kehe palalu tu musojid an anggo madung nida fajar, di musojidan adong dei na bahang ato jom biasona.
Nangkin madung itoho sotik waktu berita ngun Radio Malaya. Berita sian kalaian umpamo jam 7.00 “waktu kawasan persekutuan dan wilayah yang sewaktu dengannya”, imundurkon jolo sajom tu WIB jadi jam 6.00, baru muse imundurkon satonga jom tu Waktu Mandailing pasna pukul 5.30. Na degesan muse antong gelombang ni radio ni hombar on di itaan i Band 2 dei huingot waktu i. Na bahatan lagu Qasidah i kaluar lau waktu sumbayang di alaian umpamo Bila Petani, Bila Isroil atope Laksana Gunung Tinggi Menjulang.
Ima pambotoan satontang waktu di Mandailing, na bahatan ragomna. Jadina bahat pilian anggo waktu na pas mangaligi jom inda dong dompak. Jadi ipake ma partando na lain nangun alam atope na ngun berita radio. Saima hatana hurang lobi marsipaingotan..ha ha
telah tayang di FB Feb 14
0 komentar:
Posting Komentar