MARCILEK

 

Oleh : Darwin Nasution

"cilek-cilek kaporeh

pala so tolap marlojong kita leh"

Ngana dapot jau da aso do cilek ato marcilek na mohot di Mandailing. Padohal adong hata marsilat ato marmoncak. Mungkin adong pangaruh ni darek di cilek Mandailing najolo. Ampot halak minang i do marobanna naingkani, harana aliran ni cilek pe ubege linto ato lintau do tari dot jurusna. Na asing antong binege adong muse jurus aliran cimande na ngun tano sunda. Hum olat ni carito ni dongan-dongan doma da songoni, harana anggo panulis pribadi naso unjung do jabat dohot na marsiajar marcilek on. Manonton ato mandongani guru nai mangajar tu kampung na lain ungada telehe dompaki.

Memang na ramian on carito na marcilek on najolo dompak marayak magodang iba, umur SMP ma pasna. Bahat dongan-dongan niba sadongan na dohot marsiajar marcilek. Na bahatan muse tong guruna uida di kampung, generasi pas nai ginjang niba. Marsidok-naidokna mei binege satontang jurus na dompak i parsiajaran alai samo alai. Benna maraliran-aliran i muse adong juo mei na mandok bahasona aliran nai parsiajari nia i mei na beteng na. Inda dapot jiba rarena angke ngana mangarti iba benna so dot i marsiajar. Mang i pakalah guru nami i mai guru ni alai i ninna bage. Tarsongon puji rabar na urang sira mungkin sotik manilai masing-masing aliran.

Carito nai pardok ni masing-masing aliran i mungkin peto, mungkin juo dugaan sajo dei na hum pade. Bope na botul sakali pe niroa, kan nga kabanggaan ni aliran nai patujolo disi. Usaho marsiajar bela diri do so ipake pala adong alak na mangkaru iba, atope mungkin sederhana na sport sanga olahraga manjalahi keringat rutin ben tu hahirasan ni pamatang. Na tanggung dope i biasona kapandean anggo na kecek halobian sajo dope ato marcampur na anggar. Manombo tu anggi nia bage do icubokkon ia.

Tarsongoni ma mungkin inda i sangajo atope i sangajo na marcarito cilek na dompak marlatih on. Salalu marbaur dot promosi dot anggar sotik-sotik. Tai sadeges aha pe aliran, anggo latihanna ngana khusuk ato hum na mardais-dais do songoni ngana dong i jaotna, pas hum na pagatal-gatalkon maia i. Mahir nai so dapot konna latihan dei martaon-taon sampe i turunkon guru hampir sude ilmu nia i baru tardok na mandapot iba. Istimewana binege ngana tu sude murid ibaen na songoni an, margantung pambawaan dot kepribadian marobankon cilek i juo do mungkin dalam pandangan ni guru i.

Angke marsiajar cilek on pe niroa kon marpondasi ikhtiar, sobar dot tawakkal juo do so laung dot rondo roa ni na marobankon nai. Baen pertahanan diri sandiri dontong mulona, bisa juo marguna manjadi benteng ni keluarga, bangso atope ugamo. Inda marsiajar so manganggar sangape mambanding-bandingkon sanga ise nahum jago cilekna. Aliran na dompak i parsiajaran i sanga jia pe na ra dei jago dot hebat asalma khusuk dot rondo roa na ni namarguru i. Anggar dot bangga i ngadong jaot nai salain na sia-sia, na porlu siap mangadopi musu na mangganggu tu masyarakat niba, ido putona.

I sude manusiawi dei mungkin da, mangandung sifat hasad dengki dei dabo deba, sombong get manjadi panguaso dunia cilek, manampilkon hagogoan atope na asing. Anggo guru-guru nai masing-masing patidaon teladan dei biasona tu murid-murid nai, ngadong i binege guru na mangajarkon martontang atope marbada dot aliran na lain. Ima so idok guru i muse mungkin sapulu tampang pot sada pe so topak, baen payahna mei marobankonna. Kon kembali do ning guru i tambana mangasal, inda dong na hum peto dot hum gogo salain Na Sada I, buatan ni manusia beladiri aha sajope adong dei kelemahanna, hum upayo sajo maia i, sambil mandoah tu Sia.

Tarsongoni ma pangalaman mambege carito na marcilek aliran-aliran di huta, ngun na marsiajar bope ngun guru nai, tapi ngana ungada jabat ba dot iba marsiajar. Domu-domu ni hata dison marsiajar bela diri marcilek on na positif do on salolot i obankon halak nai di dalan na denggan, manghormati satu sama lain na marsiajar bope masyarakat awam. Jadi ma nian halai on na sampe makom parcilek na songon eme mur incat ilmuna marondo roana so tarandalkon tu patitih ni alak na purjolo i, musu inda i jalahan pala marsuo inda i ilakkon.

telah tayang di FB Feb 2014