Oleh : Darwin Nasution
Songon jia biaso tong, dung salose mangajar di almamater mangalapur ma iba asisten dosen on tu dosen pananggung jawab nai. Isema pangalapuran on, ima Prof. Drs. Z.Pangaduan Lubis (alm) na mangalehen kesempatan mangobankon mata kuliah ni ibana Antropologi Musik di Fisip USU. Madung martaon-taon do i oban tulang on matakuliah i, inda be tarbagi imana waktu ambaen sibukna di Sastra, di kewartawanan, budayawan, atope manjadi nara sumber tentang kebudayaan terutama Mandailing di seantero Sumatera Utara.
Tulang na manjadi patron juo dalam bidang penyutradaraan di Sumatera Utara on, salompak mahasiswa iba tong madung mandapot ma iba matakuliah ni alai on dohot nilai B. Tarsongon standar operasional prosedur madung iparate-ateon ma songon jia alai mangajar. Tambana isapaan muse tong sanga bia hubungan prosedurna muse tu jurusan atope tu fakultas satontang honor. Sapanjang huobankon matakuliah ni alai on, ngana ungada ipangido alai sotik ato deba epeng nai, na idokna do baen jiba ma soni. Mahasiswa na lau tamat ma iba tong martolong juo ma ilala mandapot honor bulanan ngun Fisip, itamba adong honor manombo ngun Koran-koran dot beasiswa Supersemar, jadi ma bisa dope iba mangambe nayang i percaturan kota Medan waktu i. Jagit holong na godang mada ilala, angke so bisa pe iba songoni bahatma andil ni tulang on, harana na intens an iba marsuo dot kalai di sela-sela kesibukan ni alai juo di base-camp na, Sastra USU. Di sada tempat na paling mangesankon waktu i, na huingot sampe sannari ima parsuoan nami di Kantin Sastra (Kansas) USU.
Parsuoan mangalapur lau mangecek-ecek kami di pojok sebelah kanan donok tu kasir nai di Kansas. “Adope paido homu bere inumon muyu”, ninna tu au. “Olo tulang upaido ma kopi capuccino, di tulang aha do”, ningku marsapa mulak. “Kopi hitam da bere, paido homu palalu indomi jau dot ji amu”, ningkalai muse. Upaido pesanan nai, tai inda dot indomie ji au, mangan kue-kue do na por ruangku hatia i. Mangecek ma hami satontang mata kuliah ni alai nahuobankon i sanga madung ontap ni jia. Lek husapai juo mengenai epeng nai sanga songon jia, didokna nangkon be se sapai homu bere, pargunaon komuma ninna mantap. Mangolo mau lau marjagit holong. Di ajarina ma iba bahat hal namangecek i satontang penulisan skripsi ambaen alai muse dontong dosen pembimbing niba harana marhubungan dot Mandailing, juo sakobek dot caro manulis populer di koran. Ningna alai, manulis di koran i musti dohot bahasa na sederhana ulang bahat istilah asing so momo ningkalai alak mangarti tulisan niba i.
Malapat-lapat kecek tu jae tu julu tai totop do satontang kegiatan nami masing-masing, halai dosen dot pakar, iba mahasiwa, penulis pemula dot asdos ni alai. Bahat carito ni amang atope tulang on sian pangalamanna, marcampur pangkilalaanku dot ro muloi loja alai dot sagalo riuh ni karejo nalai sasapoken, sasabulan, sasataon. “Madung muloi loja dabo bere sibuk i na karejo on, benna adong-adong dope anggi muyu i bagas na sikola”, ninna alai mandok lau i arsik kalai Commodore Filter (kompil) sobek na terkenali. Sapanjang i tandaan kalai sigaret i sajo mei mandongani kesibukan nalai di sastra, etno, atope di fisip. Mangombus ma timbus na ginjang sian pangarsik nai, ibolusna cikek lipung lau tu pudi parobuk ni alai on, inda ungada nida nasorapi anggo obuk. Sederhana di gaya, adong –adong gondrongna ngun pudi tarsongon habiasoan ni wartawan mungkin waktu najolo i dope dompak karejo ni alai di RRI/TVRI Medan.
Mardalan juo do waktu i lobi sajom na manimba ilmu caro informal di Kansas i, ngun professor kehidupan on. Na hutabalkon sandiri do professor on tu alai di alam berpikirku harani godangna kapasitas keilmuan ni alai, tarutamo bidang budaya dot sastra. Aso, na otik do kapasitasna sian kalai manjadi professor do di USU. Ambaenna na honorer do alai antong di USU salopeh pension ngun Deppen, inda masuk di struktur dosen formal, dosen luar biasa do imana disadun, ido anso nga tartabalkon USU boti professor tu alai on. Anggo hapantasan saro jau, ulang be i kecek. Sakelas DR honoris causa ruangku bo sannari porludo i usulkon on tu jolo bope madung maninggal kalai. Nga songoni do bang Zul, Bang Edi, bang Bahsan, Karnen atope bang Caknan?
Marsarak ma hami di Kansas, i paksa alai juo kon alai mambayari na ami inum i. Adong jom mangajar nalai berikutna di Etnomusikologi, tarsongon kajian budayana benna antroplog i dontong basic nalai na petona. Jadima au mangaraso sangat puas di parsuoan na jarang tarjadi saonok i waktuna, namanjadi ingotan jiau ben polna pangajaran sampe tu ari sadari on.
telah tayang di FB Feb 2014
0 komentar:
Posting Komentar