Oleh : Darwin Nasution
Mangecekkon kayapi, ra ma mungkin nai pikirkon ni alak dung i ima pasangan nai, sigaret. Tai, hum momo dope manjalahi korek api ajakna humpado sigaret. Pala dompak lewat iba di pos jago ato parsimpangan ni dalan i uta, manombo adong dei na pangkulingkon iba, "angkang, mangido jolo kayapi nai e" ato "adong do kayapi mu isi" ningia tiop sigaret nia, sanga oban sabut nia pala na get pangolu api i tataring.
Taringot tu kayapi dot sigaret nangkinani, lekna kayapi mei na dodas hurang dot hona paido. Jarang dei dabo binege halak mandokon, "angkang, adong do sigaretmu isi" atope "mangido jolo sigaret mi e sabatang" ato na rosu sakali pe marsijagoan dei ulang jabat sampe "minroksaba, minta rokok sabatang" torus tu dongan. Harana ra dei margonti muse gorar jadi si "rojali" = rokok jarang beli. Mulak tu kayapi nangkinani, salain panait sigaret, kayapi on ning pangidup ra don manjadi mulo ni mardongan. Parjolona harani na mangido kayapi do ra ma torus marsitandaan, markombur lalu mardongan.
Tai, nga hum sakadar panait sigaret porlu ni kayapi on, bahat dope hasaya na i na hum asli ima mambaen so adong api. Api nai porlu i dapur, panait kompor atope soban, ato panait asar di pangambunganna, pagara padang di panutungan udon, dot bahat dope na asing.
Dung jadi api batang ni kayapi on ato mang gara sumbu ni loting misalna manjadi ma ia barang na sangat milas. Pala api i bagasan ate-ate bia dei ruai? Porlu dei ruai kayapi sanga loting panaitna? Pala na porlu tarsongon jia mei ruai kayapi nai bontukna, ima ruangku nai dok ni alak mandailing "mangap-alapi" artina manjalak-jalaki goyak ni roa ni alak so mangolu api i bagasan ni ate-ate nia. Jadi pala porlu ilala marapi ate-ate nia lak, alap-alapi, tai jago ba, sanga i tutung ia ho dot dukdak dukdak. Madao pe zaman on mamaju anggo kayapi ato loting i lek laku, inda kalah tu korek gas moderen i.
Ke ita sotik tu sanga aha dei kayapi i. Nai ujung ni batang nai ima barerang. Pangorgosan nai kotak nai ima masiu ato pottasium. Anggo di Eropa najolo i gabungkon nadua i ibatang nai, panaitna tinggal i gosokkon tu aha sajo na kasar nait ma ia. Tai, marbahaya do rupa i suhu luar na milas atope maronjat-anjat di pangangkutan atope panyimpanan, morgos marapi dot mosok sandirina. Ima so i pasarak masiu dot barerang nai sampe sannari.
Jadi ima gunana na umum panaitkon sanga panutung. Aha dope gunana na asing. Baen prakarya ni daganak SD marbontuk bangunan ni bagas sanga maniru bangunan kuno; pancungkil ni kotoran ni ipon sanga sisilon; baen teka-teki sanga sulap manguji hapintaran; atope na paling tagi lala si Zaki panggirik ni te suping sampe moldop-oldop doma mata nia ben sabasna.
Marhasaya na godang kayapi on. Ulang nian sampe sala hasaya, tarsongon nai sertekkon tu padang sanga sampil-pil dodas najolo di Mandailing, sahinggo rarat sampe sator manombo mosok. Atope marsianyang marsiramban-rambanan kayapi na mangolu ke tu tarup, bo singit so gara sakampung, benna dong doma mangida sa lau nahit. Ulang be nian tarjadi i, kayapi na manjadi hasaya dot dongan do mulona, ra jadi inda marguna dot jadi musu anggo sala pake.
madung nahit di FB Feb 14
0 komentar:
Posting Komentar