Oleh : Darwin Nasution
Carito on sabotulna tarjadi di adaboru na mardongan-dongan, dodas anggo di huta sapodoman. Pala dong bege na sada dongan nia na get maringanan ato marbagas adong juo mei halungna. Ra mei saro sannari galau dongan-dongan nai, apalagi misalna na rap sapodoman muse. Harana madung jelas dei nga mangecek i rumbuk be halai tongkinnai jabat do marbagas salah satu dongan nai. Rumah tangga nia doma antong uruson nia. Jop do roa na marbagas i ia, tai marcampur juo dot na sedih.
I bagas niba sajo pe, pala adong kakak niba na marbagas lek adong tos ni roha. Dung salose akad nikah i solom dot i haluk mei sudaro niba on laos i pabuat. Tai, ben bahat dontong iba marangka maranggi inda langsung lungun. Adong dope ilala dongan niba, inda songon na tinggalkon sado-sado iba doma, ning anggingku adaboru tu au.
Hatia i, ning anggi on, di sada arirayo ro songon na mardorus-dorus dongan nia marbagas. Adong ma dongan nia si Kanik marbagas tu Panyabungan. Targan so kehe madung binoto alai me biasona sanga ise calon nai. Tai nga isangko alai sapodoman i songoni ipas na marangkat marnikah on. Sedih juo mantong rap-rap, nga dope bage na sompat songon markado mambaen parsarakan na menek-menek soni, hape na pabuatna ma. Songon dugaan i juo mantong nai rasoi nalai, inda be saroa marsikabaran anggo jabat madung adong alaklaina. Pas horja nai ma manjadi parsuoan pangabisan di na bujing ni alai. Pala naro pe kinnai madung kindit mei nabiaso anakna, margandengan muse dot alaklai nai.
Tarsongon kecek oto don ruai, ninna dei bujing-bujing i sada hatia. Maksudna pala adong na marbagas sakaligus na mamutus silaturrahim dei ninna. Di sada bilik i bagasan roa sonang roa dapot marsuo ma jodoh nia, marbahagia do ia nida, singkopma tarlaksanaon ia sunnah rasul i. Di sada bilik nai di ate-ate paibo-ibohon. Akibatna nangkan naro taru gotap nga be tarpangkulingkon songon najolo i harana kon jago on dontong pangalaho nia di jolo ni alaklai nia i. Ia pe mungkin bukan dei nga ro roa nia tu dongan-dongan bujing nia i, cuma porsi nai ni roa i paotik ia hum say hello doma pala pasuo bak pe. Nga na dong da nasala sabotulna disi, na marsijagoan dei goarna.
Pala dong na marbagas, bulus marlugut juo dei sadongan bujing-bujing i di horja nai, angke naget mangantorkon salah satu di antara halai tong mandalani babak na baru hangoluan, na ponuh adaptasi dot parjuangan.
Manombo tong madung rap onok be do alai na mardongan i. Adong na madung sauduran do muloi SD, SMP sampe SMA umpamo. Madung marsibotoan roa dot hangoluan do halai songoni juo keluarga nalai di kampung i. Madung rap dalai na marsipatangisan, martata, atope marceleng. Celeng gule-gule pau roma si celeng mangelek-elek au. Pala urusan sikola na rap mangkarejoon PR dalai, Fisika misalna atope Matemaita. Binoto muse sanga aha kecenderungan bakat dot hobby di alai. Tarmasuk juo mantong type ni alaklai idaman nalai masing-masing, tarmasukma nangkan manjadi alaklai na on. Ma binoto halai do sude i rarena dompak rap bujing.
Jadi pas iputuskon na sada maringanan, rap isi ma iba tong i marbondong mangecek i, kecek na get pabuatkon marsarak. Bope naso idokon pangabisan, tapi na bakal jarang doma dung i halai marsidokonan kabar. Santak ibona manombo, pala na kehe pe tu horja nai, ningkalai ngana se ponting situtu ilala i mardandan, alakadarna dei songoni, songoni juo nangkan mangan panganon di sadun. Tujuan na paling porlu di lalai sadongan i, ida alai halak na marbahagia i di palaminan nai, mikim gari ulang marsak. Halak na marbungo-bungo ate-ate nai do momen naso tarlupaon kalai i.
Hatia i ninna tinggal ma si Apri, Usani, Rida, Mas, atope si Cakrida doma naso maringanan. Rap ke malai tu bagas ni alak si Kanik an, manolongi sana bisa, por dei rua ni alai palua gogo manolongi horja ni dongan nalai on di borngin targan so pas waktu nai. I len kalai semangat, anso tenang ia na get mar-Panyab on. Mur maonok marcarito, mur ma ibo roa naitinggalkon nia on. Jadi pa bahat hasobaran malai i targan so sampe horja nai, sambil mandoah so ipas muse halai sauduran i mandapot jodoh. Rap kaluar juo mei ngun bagasan roa ni alai na tinggal selamat menempuh hidup baru bahasa polisina. Doah nami sude di hakehe mu dongan.
Sian na kehe on pentong ima si Kanik marjojor mei jagit holong nia di partisipasi ni dongan-dongan nia on na pabuatkon on. Rap ibo di na marsarak bahkan marrobakan juo ilu nialai. Sonjia mantong na sauduran, sakampung muse ngun na manek kalai. Di bagasan ni ate-ate nia mungkin na kaluar mei ende na dodas i putar i tip nalai i podoman an, lagu parsarakan Pancur paridian i
tinggal mada ho pancur paridian
tinggal mada ho batu marpangiri
tinggal mada ho dongan siandosan
na langka mau matobang i ... (artina kehe marbagas ato marnikah)
***
*telah tayang di FB Jan 14
0 komentar:
Posting Komentar