M A R K U S I P

 

Oleh : Darwin Nasution

Tola idokon carito itom narobi doma on da dongan na dua tolu. Angke pada maso i na golap dope sude, maksudna ngana dong i dope lampu di alaman bagas ni alak, na lampu tellong-tellong maia i nadong, i pe i bagasan ni bagas i dei. Lampu miak tano na marpupu midop-idop iombus angin, marpupu mate, i pangolu mulak dot loting pak-pak BBM na miak tano juo. Golap sangkuliang di kampung-kampung i so binoto na bagas benna lilis do deba cahayo ni lampu jian--goar lain ni tellong-tellong--ngun antara ni papan na kasar sanga gogat dinding ni bagas ni warga i. Songoni ma kontruksi ni dinding nai lilis dope cahayo dot angin, tiangna gincat-gincat adong muse taruma na, martangga bulu sanga hayu panopian. Ambaen na lilis i dope angin sanga cahayo ngun antara ni gogat ato hayu ni dinding i, logikana kan lilis dope sora, sora ngun luar tu bagasan ato ngun bagasan tu luar bope ale asok-asok soni. Ngun on ma na mangkusip i bakal muloi ita caritoon.

Pala adong mantong adaboru ato bujing na por roa niba i banjar sanga i kampung, naparjolo i sise tu alak antong sanga ijia modomna. Denggan dot jamot parsapaanna secara rahasia tu donganna ato hombar nai na bujing juo, sanga i sabola jia pasna uluanna pala modom, ulang sampe sala sanga tartukar, tarkusip naron ayah sanga umak nia. Pala soni na menekna hona untuti iba, pala inda isiramna dot aek ngali laos i bukakna tingkap ompot. Habang ma ho i iabaenna, ra sampe tinggal solop disi baen songgotna. Jadi ima na paling dijago i najolo, uluanna modom angkon pas, jadi ro iba tinggal mamio sampe ngot, baru marjaluk mentong hata-hata, rayuan pulau kelapa bagen.

Madung tarngotan, angke na marodapan langsung dome isuangkon, i muloan mei hata anggo setuju do bujing nai santabi mangkaru mangecek-ecek. Tenang do ba songoni, ulang sampe gugup nga binoto muse sangan aha kecek dung ialusina. Oni ulang margabus bage sanga ise iba, bahat i najolo manggadis gorar ni alak marbadai ibaenna pala tarboto. Angkon na ngun iba dei sian luar bahatan hatai kaluar, so jalan torus marcarito, mangarayu otik-otik, inda tola batuk naron tarsonggot ayah umak nia. Ulang sampe sip iba na mangecek i, harana na tu iba dei na mancitna anggo marpupu mamaolus jihin sip so, na tarasoan na i hantam ni rongit anggo songoni di pat i. Anggo i ginjang nian aman dei benna marsampulung karung na marper i do iba. Puto na adongkon torus kecek, pala so naipasan i bosan si bujing nai, kasidunganna ra markuayam ia mulak get modom.

Se na aha mentong kecek so bisa iba honok na mngkusip i, ninna mei parsapaan ni alak sannari niroa tele? Aha sajo anggo na mamerli dope. Satontang sikola pe jadi, ambaen na sikola dope umpamana bujing na kusip on. Ajak soni mangecek-ecek satontang pengetahuan umum sekitar niba i, saumpamo satontang pengetahuan sosial, ato geografi na i kuasaimu i kabupaten muyui. Pahlawan, ato tempat wisata parmayaman saumpamo aek milas purbajulu, ato sampuraga, ato sejarah ni candi bahal umpamo. Patidaon ma naikuasoimu i sude ulang sampe nut-nat. Dot soni bisa mei ijamin na luas pambotoanmu, pintar, ra mei ro dalam diri ni bujing on raso kagum mangaligi ho sebagai poso-poso top markotop sa banjar.

Pantangan na mangkusip ulang sapai gandak nia dot masa lalu nia. Apalagi umpamana nadong ilala ia kenangan cinta bodat nia na so honak jadi macom mei kecek i. Ianggap na maho i na wartawan panyalidik na get mamboto ia mabahat tu. Ro jabat tu nai. Habiasoan muse inda dong alak na ra masa laluna i putar mulak kaset nai. Kecuali tong ngun bagasan do ro parjolo marsapa satontang iba sanga masa lalu niba ijawab soni apa adanya, apalagi satontang gandak naiduga nia ungada i donokan i banjar niba i. Nangkon pola ma pol tu gabusna bope le nga tarcarito on sude. Pala tarboto di torang ni ari nalobian ilana. Ra ma tokinnai ro iba tusi nga ialusi ia be ngun bagasan.

Harani i, pado mangecekkon na masa-masa i najolo, degenan i kecek masa depan. Satontang cita-cita nia umpamo, atope satontang jodoh dot keluarga di ari parpudi saulakon. Len semangat i cita-cita nia dot doah, mudah-mudahan iaminkon ia dei ngun bagasan. Satontang jodoh tong dokon ma anggo bolas pangidoan halak na dompak mangecek dot ko on ma nian i izinkon Na Sada I ning iba bage tarsongon na manembak. Pala ro jawabna ngun bagasan marondo,umpamo, jia ma baya jiot ko jiba songon iba on jat na ninna, madung, ma muloi lepas landas ko i poso-poso. I ulaki pe cogot pamantapkon bahasona na cinta ho disia na marbulus sajo mei pado adat. Di alam na torang pe aturanna ra mei i ajak ko ia ke marmayam tu tusam an anggo topek dompak ari rayo. ha ha ha

telah tayang di FB Jan 14