Oleh : Darwin Nasution
Inda hum bau nai dabo na mangkaru ninna, juhut ni joring on pe na ra dei mambaen halak malango pala ipangan mata-mata, gule siak atope i rondang. Pala get muta sajo ma ibaenna, poning ulu, boltok margaor, inda ra koncing, i tando-tando na malango mei, angkon nai karejohon sabangso pangubatanna.
Asal ma dabo ngana bauan gari, joring (Archidendron pauciflorum) memang na taboan dabo tile. Ima so nga mangherankon jiba adong na tarpanganna tiop ari, sampe manurun doma nafsu mangan nia pala ngadong joring. Tarsongon si Caik kubege di kampung an. Sampe memang ungada dei jabat malango, dung murak ba lek na ihantam nia juo dope mulak.
Bope dabo na tabo ngana dong anjuranna on ipangan bahat. Alakadarna do, opat boa ma gari paling bahat. Songon si Caik antong manombo na bahatan do joringna di pinggan nia i ampado indahanna. Ngantong malango i songoni sajo ma. Dot hodok nia pe muap joring doma. Ima su boto ho Caik, tambana ninna pala konsumsi jangka panjang na ra don asom jangkolat nai na tarliut dei, bisa manggangu kesehatan ni ginjal.
Ning informasi ni alak na mamboto, asom jengkolat (jengkolic acid) on memang adong na ibagasan ni juhut ni joring maia. Ambaenna pincur dot tarliut ninna asom nai, ra don mambaen mabugang saluran parkoncingan i, songoni juo pambuluh daro bisa mangambat oksigen tarmasuk tu ulu ima so poning pala mabahat tu di na malango.
Sampe sannari nian inda pe dong takaran na pasti sanga sajia bahat na aman ipangan. Harana tahan ni alak tu joring on pe marbeda-beda do. Adong i kampung-kampungan muloi do malo mangan daganak i naisuru ma marulam joring na poso nga sanga mangua. Ato songon si Caik satapak maia indahanna, sapinggan joringna. Sapala nga marindahan bo malango ia sakali i. Manyongkir si Caik hatiha i, marpulos manggigiti ningia boltok nia, oak-oak muta so muta, inda bisa ia kaluar tuaek namenek sampe manyiak ningia taraso pas manetek sasantetek di sakali koncing ia.
Ubatna antong nai sarankon ni kesehatan minum aek nabontar dei sabahat-bahatna, oni itamba dohot pel arang i, pel norit ningkalai gorarna. Anggo i kampung aha dei antong nadong norit, paling mei surpu i ironjomkon tu aek. Sakali i nga mampan be tu si Caik, mopeng doma sudaro-sudaro sanga aha doma ubatna. Mungkapma ubat terakhir i, te ni ambeng nai kinco i galas. Lek itutup si Caik igung nia bope pas idokon ubat on ngun suan-suanan, memang botul na madung iduda usus ni ambeng. Dung masuk taraso ilala ia bau dot angirna, muta-uta markatorusan ma si Caik sampe tu dasar ni boltok i doma ilala ia kaluar ni uta i. Ido rupa maksudna so palalu muta do so ilen te ni ambeng. Dung mantak ia muta, lambok doma pamatang i, mang mago sude racun ni joring i, ilehen aek milas tarpodom ma si Caik, na mandokon murak ma baya. Kon dot te ni ambeng i dope so mujarab ...
telah tayang di FB Jan 2014
0 komentar:
Posting Komentar