MARUMBAK BESKOP TAPANULI

Oleh : Darwin Nasution

Bang Kiren (ceker ni kartis, sannari madung almarhum) hatiha i lek jong-jong mamatuh di pintu ni Beskop Tapanuli, Kotanopan. Sobar do antong abang on painte alak na manabusi kartis sada-sada, torus isorahkonna tu ibana so isibak masuk tu bagasan get manonton pilim. Nga honok lau get iputar pilim nai, salambar-salambar markumpulma itangan ni angkang on kartis i, ngana lobi jabat tolu pulu i golom ia. Jadina, na madung mambayar kartis arga Rp.1000 i, tola ma masuk saroa na mamili karosi di bagasan, get di ACC pe bisa, ato di Balkon pe nga mangua, marpindah-pindah pe inda dong larangan. Angke sai maia panonton na saborngin on.

Beskop Tapanuli, on maia nasada on sabatang kara beskop di kecamatan Kotanopan, jong-jong di ibukota kacamatan, di jalan mangalingkar Sawahan – Sindang Laya. Beskop na madung i lupaon ni alak mei waktu i, sa ira 20 taon na lewat ma jolo natama etong on, dompak marulang dope penulis manonton tusi. Halak na di humaliang ni beskop i sajo pe ngana se aru ra be manonton tu beskop on. Madung na sotikan panontonna, biaya mamutar sada pilim nai impor ngun  ibukota kabupaten, Sidimpuan waktu i, atope kacamatan na donok Panyabungan, madung na godangan, inda marimbang be dot pamasukan ngun kartis ni panonton, bope misalna madung i pamura masuk Rp 300 dung satonga main. Jadi rugi doma na ro, songon i ma nai rasoi ni alai marbulan-bulan, martaon-taon.Balakangan kubege nai pargadisan doma sanga aha milik ni beskop i, anso bisa torus mamutar pilim.

Padohal di maso jaya nai najolo, beskop on nasantak rami ni panonton na, apalagi malom Sabtu malom poken di Kotanopan, marjujek bagen domei di panabusan kartis i, lalu tu bagasan adong muse dope i na jong-jong.Pala malom Sabtu tong madung jelas mon pilim na India, nang apil mei di panonton nai muloi sian daganak sampe ompung-ompung sanga ise Amitha Bachan,Mithun, Rishi Kapoor, Sri Devi, Hema Malini atope Sunil Duth, ra sampe apil jialai penerjemah ni sude pilim India, Narain Topandas. Harana sering diulang-ulang kalai di parkomburan ari-ari bintang pilim i, sampe tu penerjemah nai. Pala malom minggu antong ajakna anak muda mei gokan manonton, biasona pilim Indonesia doi, percintaan, Rano Karno dei dot Yessi Gusman na paling apil kalai dompak i. Conto ni pilim na tong 'Puspa Indah Taman Hati' ma ato 'Gita Cinta SMA'. Di luar ni ari nadua i, jot-jot pilim-pilim na ngun Chino dei, pilim kung fu, na dodas binege gorar ni bintang nai idokon kalai ima Chen Lung.

Pala dong pilim na baru atope pilim na dompak laris, ro mei motor ni beskopTapanuli i mandokon na, tarsongon ontang-ontang mamake mik, tu kampung-kampung di Kotanopan tarutamo tu dua kampung na godang, Tamiang dot Hutapungkut.Haropan godang ra adong na manonton, arana benna bahat i pandudukna, tarutamo nangkinani baen tu malom Sabtu pilim Industan ning tobang-tobang. Kampung nalain na jadi langganan ni iklan on ima Singengu, Sayurmaincat, Sabadolok, dot Hutarimbaru-Hutapadang, ima huta-huta di humaliang ni pasar Kotanopan, inganan ni beskop i. Halai on pentong ra mai ro harana bisa do mardalan ngun huta tu pasaran.

Tar dua pulu taon na salpu carito on, halak sian kampung-kampung i pe mang malosok manonton tu beskop. I panyobobna madung markembang teknologi pamutar ni pilim, ima romanna i putar di vidio. Oni i putar di vidio, saroa ni nampunasa vidio on mei, biasona parlopo, mamili pilim-pilim na deges, manginjam di si Kibun (chino parelektronik di pasar Kotanopan) an dohot caro manyewa. Indabe kon ro alak tu beskop anggo hum na get manonton maia. Balakangan di bagas-bagas pe na marampar doma, apalagi dung teknologi CD player ato flash disk madung masuk.

Beskop Tapanuli, Kotanopan inda dong be mungkin iraso pemodal nai harapan. Madung adong dabo anggapan beskop na tobang on pilim na na jat, mangkagotap, juguanna martanga, gokan na margandak  panontonna, atope muap cakek, arana namarkoncingan do songoni alak dompak main pilim di pakarangan songon parkoncing ni beang. Inda dong be na nyaman ilala panonton i disi, madung teknologi katinggalan, managemen palayanan na pe inda mambaen kalak managi manonton. Beskop Tapanuli juo sudaro kandung nai di topi Aek Pohon i di Kayujati Panyabungan madung dot juo mei marlanggum, marumbak.

Pangabisanna, tar taon 2012 i, pamorentah Kacamatan Kotanopan, harani tanoni beskop on antong pinjam pake do, oni donokan do mocomna tu panggung hiburan rakyat ato PHR, sacaro resmi mangalanggum beskop on. Inda nadong be masuk na tu kacamatan. Nga sajia honok nang dirumbakkon muse ma, ibaen jadi terminal pasar Kotanopan, mambaen so taratur motor i ari-ari on, atope mangatasi so ulang macet ninna pala ari poken.

Carito jaya ni beskop on, tinggal nostalgia domada teleh. Inda dong be pangasoan sotik-sotik pala get manondur India, Chino atope  pilim Indonesia. Magoma muse tempat parsio-sioan na laung di teras atope di alaman ni beskop on, parkomburan pangecek an dot dongan na marsuo rap tu poken, ato na lain magoma panginuman aek tapi sipulut ato gadung di kantin pudi ni beskop i, tambulna kacang tojin. Magoma karir ni bang Kiren dao dope targan so itutup panontonan on, dot ia mang parjolo ma mago tu adopan ni na sada i targan so hubaen tulisa on. Mago..mago..mago sude halungunan dung marumbak beskop i, Beskop Tapanuli, Kotanopan.

telah tayang di FB 4/4/13