MARKARETA ANGIN

 

Oleh : Darwin Nasution

Inda na dapot jau da unjur buangna aso idok markareta angin. I dok majolo non benna marangin i ban na, honda i pe adong dei anginna. Sanga pala i padalan ona angin iba, kareta i pe marangin juo do iginjang nai. Ampot pala manaek on kaluar angin ni alaknai mungkin telehe harana manginjak pedal mamutar mangaluarkon tenaga, ra dei sakaligus memang mangaluarkon angin. Anggo manggas Super 700 najolo masuk angin do ibaenna, benna so adong i jaket khusus hatiha i untuk si parkareta. Jadi kareta do panggoaranna hadua, sada naso marmasin ima kareta angin, na marmasin idok kareta sajo, markareta ato marhonda. "Keta marhonda e", ninna waktu i.

Kareta angin on adong dua mocom on umumna naingkani dompak i dope kenderaan utama di Mandailing. Kareta angin jantan dot kareta angin boru-boru. Pala jantan biasona adong batang na i ginjang. Pala boru-boru inda marbatang i ginjang. Batang on ingananna ngun bosi juguan i marsambung tu bosi nganan ni sitang an. Pala bosi na ngun toru tong membentuk huruf V mei nida adop ginjang i kareta boru-boru. Kehe ma tu jantan i benna i sambung i V naon manjadi mabontuk sogi tolu. Jantan sanga boru-boru on adong na rodop adong na ginjat. Adong muse dope atehe kareta boru-boru on na gincat, batang toru nai mangalongkung satonga ellips, on idokon kalak di itaan kareta vespa. Bahasa nadao na da kareta angin on idok kalai ontel ato sepeda kumbang.

So adong tantanganna najolo marsiajar ma iba i di kareta jantan na paling gincat nai. Harana on konsepna pe kareta ni alaklai on. Kalas 2 sanga kalas 3 SD daganak di itaan marsiajari mei, tapi bahatan dei alaklai, anggo adaboru jarang, marcampur tarjat dalan di itaan maso i, sahinggo tarsusah marsiajar markareta angin waktu i. Alaklai do do na martualang markareta anggo adaboru mamasu pinggan ma dhalai soni i bagas.  Mulak tu na marsiajar markareta angin on, benna pondok dope pat niba tong, ira-ira tarsameter dope pinggang tu toru, gincat ni kareta angin ngun batang parginjang tu tano i madung 1,25 meter, ngana mungkin be da iba manginjak ngun ginjang batang apalagi ngun jugukannai. Marsiajar mei tangan kiri maniop sitang, tangan kanan maniop batang gincat nai, pat kiri biaso manginjak pedal kiri, na situtuna pat kanan manginjak mangalewati toru ni batang. So manyerbeng borat kiri, marpupu tarbondar, ato dodas halak nai i tinggang kareta angin on. Tapi ba dung mahir manimbang badan, inda se jojak tano be, bope naso sampe pat ni alak nai tu tano i anggo ngun batang ginjang nai, lek icubo dei ngun i. Ro mei nida manginjak marsangkot-sangkot arumpang nai, jot-jot dei ruangku morgos batu-batu nadua i. Pala tarparogok ompot dot motor sanga honda padohal na bahaya an de da, ra inda manopi kena malah tu tonga, biama na parani-barani on do. Manombo ngadong be cara isom-som konna doma kareta angin on tu bondar i, halak nai mangalumpat tu saba i. Anggo mamake kareta angin boru-boru na enteng an dome maso i anggo madung malo iba kareta jantan. Apalagi dung godang iba, na bahatan hasaya ni na madung malo markareta angin.

Manjadi transportasi ponting ma dompak i kareta angin di Mandailing. Maroban kantalan tu poken, maroban jombur eme tu masin, mangalugahon iba tu sikola, tenggeton marmayam dot dongan atope pala kehe margandak. Bahkan manopotkon siriaon sanga sidangolon di huta lambung markilometer jarakna, anggo halaklai benna jarangi dope motor maso i, markareta angin mei. Merek ni kareta angin na paten najolo ngun luar ima Phoenix ato Valuas. Anggo Indonesia puna ima Fiverams. Adong mon bope inda tiop bagas di mandailing sekitar taon 1970-an pengangkutan na marhasaya on. Sannari ngana aru tarida be, na pantat berasap doma muse sude di sadun bahkan mobil pe madung bahat peribadi. Madung mago pengangkutan bersahaja dot na mambaen sehat pamatang i ale, oisdah...

telah tayang di FB Des13