MANGGOSOK

 

Oleh : Darwin Nasution

"DOBI KITA JA PETO"

(tukang gosok abit ato dobi di Pasar Kotanopan najolo)

Anggo sian asal ni hata nai bebas do binege makasudna nai tile, tarsongon manggosok pamatang na mardahi, manggosok mata na mapitung dot bahat dope ira-ira tongkonanna. Tapi inda isi antong arti nai na pas. Anggo manggosok dahi tong mangusa do gorarna, ato pala manggosok mata na mapitung, manggutu mata do ecekna. Jadi ima, manggosok on malua mon artina palimus abit sampe tajom doma ujung-ujung nai. "Na tajom ma dongan gosokan ni saraor mi, non mabugang iba i daisna", ninna mada na jolo. Alak najolo tong mandokonna mandobi, hasilna abit nai dobi. Adong tukang dobi najolo di Pasar Kotanopan goarna Ja Peto. Gosokan nai sajo ruangku inda hurang i ngun 10 kilo. Jadi baen patenna hasil ni dobian nia on, ilehen tukang-tukang jait na di pasar i mei disia karejo, mandobi perdana abit na baru siap, mambaen gosokan parjolo. Sangajo tong lipek doma rapek songon na madung jot-jot i gosok. Samasa dodasna tong i dobi memang muli-muli tajom dei gosokan nai. Cuma anggo na baru tong kon pas pambaen nai, tinggal mangiutkon doma nampuna sai, inda be ro sala gosok manjadi dalan dua songon rel ni kareta api.

Antargan so muloi manggosok songon iba ale najolo, iparsiapkon mei jolo paralatan na. Na parjolo i pature tandosan ni abit na get igosok on. Ibaen mei ngun ulos godang nai lompit dua sanga lompit opat, sonjia bolak porluna mantong, itambaan abit karung nai lompit juo dua tolu di ginjang nai. Dung i baru itutung takar niba marlima sanga onom mamake miak tanah di abuan di sada takar parjolo baru isusun ma nalain di ginjang nai so rap gara. Jadi arong ma imasukkon ma tu gosokan na menek na markunci manuk i dung i paias jolo. Ipamasuk sacukup na, biasona lobi dope i, lobi nai isiram dot aek, jadi ma on arong nasonon an panamba non pala urang nai bagasan ni gosokan i. Ulang lupa pasadio bulung pisang na mataato abit na maek, ambaen pangalion gosokan pala mamilas tu. Mamilas tu ra mambaen abit lokot lau mosok sagodang ni gosokan gambarna di baju sanga saraor i. Torusma i gosokkon sana cukup arong nai, harana nga songon listrik ia api nai bisa ipagodang i pamenek. Pala malambat-lambat tu i paso ra habis boti arong nai, murmangali gosokan nai inda be deges hasil ni gosokan, ra lek marper pala abit karung.

Targosokna mantong i sapulu sampe lima bolas pasang sakali tampil gosokan manuk on, targantung di mahir ni alaknai doma marmainkonna. Pala bahat dapotna berarti malo, ipas inda sampe lokot, boti inda jungada jabat pangalion. Malo marpili sanga jia abit napajolo, jia na papudi. Abit levis na asli sanga levis rao, ipajolo mei biaso di hamilasan nai benna kapal i abitna. Songoni juo abit baldu atope saraor teteron. Papudi mei abit suis sanga katun. Ngana ajaran be daganak najolo dung kalas 3 tu adun anggo manggosok, madung nafsi-nafsi mei sasabagas marangka maranggi. Anggo takar tong na momo do jalakan, na marampar dei itoru tataring i. Pala daganak sannari ale kon nai mama do sampe tu abit-abit nai. Kon na umak nai sanga kakak nai dope manggosokna.

Jiamantong harani i, na mandiri an daganak najolo i atehe. Ngadong i na mangarsak orangtua di pakean. Rapi-rapi bope nga godang arga ni abit nai. Balik do sannari godang-godang arga ra nga margosok anggo nga sompat umak nai. Itaonkon anak sannari on muse dentong nasonian, ro manida selengek-an son pandok ni alak kota. Jadi imada keunggulan ni alak najolo, marsitiruan tu nadenggan, mangkarejoon sandiri marguru tu kakak, abang sanga umak nia. Songoni juo di na manyabun abit nai. Pa dompak SMP, SMA iba najolo ra dei adong na mabiar dongan nibai donok, mabiar ia mabugang i sayat gosokan ni baju sanga saraor niba ambaen tajom na. Apalagi mantong gari hasil ni gosokan ni DOBI KITA JA PETO, angin ni gosokan ni abit nai sajo pe ra mandaroi sina licinna son nai layan.

telah tayang di FB Des 13