MARGALA-GALA

 

Oleh : Darwin Nasution

Najolo dompak danak sampe maranjak maposo iba, adong mon parmayaman di luok Tamiang, Usortolang, Muarabotung, Botung  sampe tu Tobang an, nai dok pargala-galaan. Kampung-kampung on adong na di Kecamatan Kotanopan, ira-ira 45 km tingon ibukota Kabupaten Madina, Panyabungan. Tarsongon na dison doma taraso habitat ni gala-ga i, ben bahatna di luok on batangna.

Na tumpuk ilala pargala-gala on antong ima di Kampung Tamiang (sannari madung kelurahan). Luok nai margorar Saba Sortarutung, di saginjang ira-ira 200 meter di topi saba i na maradop langsung tu Aek Batanggadis i, gala-gala ma tubu boti. Ro doma songon benteng ato tahalak hidup ni saba i gala-gala on sian erosi aek ni udan, atope abrasi sian aliran ni Batanggadis i.

Gala-gala on sabangso panganon daisan don, inda dapot jau nama Latinna, capot-capot tapi ama nasangat mantap pala marputar di baba niba. On ma panganon na bisa ipangan sado-sado i, irabar,  idaisan, atope baen ngat-ngaton dongan ni indahan. Ulam son pandok ni alak huta lambung. Na paling paten antong idaisan ma, dohot resep na mantap.

Resep na, buatma soni lasiak godang i marsapulu, giling alus dot sira sacukupna. Baru iriskon ma tusi gulo bargot imarsatenju, siram dot aek so ulang ma malkot tu. Palalu pisatkon ato tuk-tuk tusi siala na malamun i martolu, jadi ma lasiak rojak ala Mandailing. Buatma gala-gala naposo di batangna di topi Batanggadis i, daiskon ma tu lasiak nangkinani, rasoima sensasi na mangan rujak nasotarlupaon. Murmasiak mur get itamba sajo manganna sampe murcop-urcop doma mon-mon mangiut bage dot huang nai. Ra de habis iba gala-gala nai sa pan ato satembokan sadalak da boto dongan-dongan. Di arian do biaso halak na margala-gala on, di alaman ni sopo mentong iba dot dongan marjugukan. Itamba ma jolo sotik carito satontang sopo on.

"Lek na adong mei dijia-jia kampung di itaan,pala adong sopo, adong muse mei isi agong bokas panutungan, adong muse mei pangabisanna tangan mamake agong manulis-nulis sopo i. Sanga benna so ungada pei suru apak i i sikola manulis tu papan tulis, ima anso iondaskon tu sopo, inda dapot jiba be. Jadi pondok carito nai, adong mantong sopo saba donok gala-gala ato pargala-galaan i di kampung Tamiang Saba Sortarutung on. Dodas ma disi jadi parjugukan ni daganak namargala-gala i. Inda hum na juguk i, mungkap mei tambana panyakit nangkinani, malungun mei dung mangida agong manulis dinding ni sopo i. Sakalion naposo nauli bulung alak kampung i do na margala-gala on. Adong ma alaklai on na manulis "OH Mega SAYANGKU" ninna di dinding ni sopoi. Itulis ia mei disi  tanggal dot tanda tangan na bage targan so ida alak, tarsongon kenangan ruangku ilala ia, pala ro mulak tusi ipe pala nga iapus kalak sanga itimpoi alak dot tulisan muse da. Pol doma dinding sopo di sapanjang pargala-gala on dot tulisan".

Mulak tu carito na mandaisi gala-gala on, madung murcop-urcop nangkin tile. Mang i apus mei bai dot sapu tangan, jia muse mentong dot abit buruk, angke na dohot etek nai. Na bahatan on nabiaso sarombongan, tai sarupo dei jumlah nia alak lai dot adaboru, mangarti ma soni pembaca sanga aha maksudna. Pala ganjil jumlah nai biasona adong mei na ganjil muse jabatanna, musohur na i sadun didok kalak mei ia "pangayak rongit", ajudan pangayak rongit ni donganna na marpasangan i. Sarupo dei goar ni jabatan i ji alak lai atope adaboru. Tarsaima jolo ruangku, pangabisanna by the way, inda tarlupahon na margala-gala marriang-riang mangkardak on. Jia mentong tarlupaon i angke margala-gala biasona son naidokon nangkinani na dot dei "etek" nai. Oisdah ... gala-gala galudak ...

telah tayang di FB 060413