Oleh : Darwin Nasution
Lopo di kampung-kampung i Mandailing (lepau atau lapau di daerah lain) tola mei isuangkon manjadi parlemen bayangan ni pamorentah na dompak markuaso. Ecek na ale bisa dei marperan alak na di lopo i mangecekkon aha nai karejohon ni fraksi na mangurus hukum, politik, ekonomi atope sosial budaya. Malahan hum dao dope bisa mambahas aha nai karejohon ni menteri, Gubernur, songoni juo Bupati. Anggo hum tugas ni camat, lurah ato kapala kampung urusan nai hum aek-aek ni alai maia i di lopo on. I lopo alaklai Mandailing mardiskusi aha sajo, dodas sampe manarik doma urat ni talonan i, satontang politik, ekonomi na dompak mangapung di na lokal, nasional, bope internasional.
Lopo on sindoki manjadi inganan alaklai di Mandailing [adaboru pala na get dot pe ba nga mangua, tai ruangku nakaru nida i] marbagi khobar atope pambotoan satontang na umum, bope politik, hukum, ekonomi, sosbud nangkinani. Lopo on pe dodas mon ibaen pangaranto manjadi inganan mangalabuh (manganggar) satontang ibana pala dompak mulak tu huta ato tu kampung. Mambayari sajo so lagak dot kayo nida. Sadebana tong songoni ma, pangaranto narondo roa nai biaso-biaso, adong do hepeng nia dibayari ia di dongan, ngadompak maroban inda ipaksahon ia kon mambayar.
Mangabiskon sasangkir kopi di lopo laos mangecek dot dongan-dongan sabotul-botulna ahama na tagi. Lancar dei nida sude aliran ni kata-kata i mangecekkon aha sajo pe dot dongan anggo di lopo an. Nasib ni sada kabupaten ipe umpamana bisa dei i ukur sian martimbusna dope lopo dot sanga adong dope na mangombus kopi na milas di sangkir nai. Pala nga nahit be api di dapur lopo-lopo i, ato inda adong be na mangombus tapak, dokon ma songoni na dompak marmasalah ekonomi ni alak di kampung, kacamatan atope kabupaten i. Imada naidok ni alak modern manjadi indikator (partando) sinadongan. Anggo lek bisa dope mangombus tapak lek na aman dopei moneter. Asalkan ulang dung iombus, isirup, boti ipangan goreng nai, baru idok, "tuliskon" jolo tie amangboru, patop dot dongan nai (maksud na dot utang lopo nia naonok, naso igarar-garar dope), anggo tensi ni amang boru ruangku manaek sampe tu pusuk ni hayuara an. Nian ulang situruk amangboru, anggo inda dung kaji, mantak lopo politik.
Tarik ni kopi sorbuk manjadi ritme hidup ni alak mei satiop ari, manjadi soul na kuat juo i halak di kampung-kampung get mangincop aek na lom-lom on. Namocoman do telehe zaman saiki on, ngana hum na lom-lom be kopi, mang adongma ato kabanyakan na coklat doma atope na madung marcampur krim ninna goarna. Kopimix atope kapucino ninna judulna. Na hebatna parpudi on adong musema kopi i nai jalahan atope naiternakkon khusus, kopi nai kaluarkon ni urut ni misang. Kopi on manjadi te ni misang jolo ningkalai ahli nai so tabo. Anggo i kota ra saratus ribu sasangkir. Tai sannari bahatma na mura, harana madung ijia-jia paberikna, sampe i Simpang Banyak Ulupungkut pe nang adong. Kopi on ma na musin dompak, kopi loak ato luwak ningkalai goarna.
Mulak tu lopo, harani i, minum kopi on tola ma idokon di bahasa sannari identik juo mon dot politik. On ma na sering dilupahon ni kandidat atope tim sukses di pamilu-pamilu, umpama legislatif, presiden, gubernur atope bupati. Anggo ra markampanye atope manangion sangan aha do giot ni masyarakat i, masuk ma bahat-bahat tu lopo. Mur mabahat na dikunjungi dot mangarti aha giot ni alai dot adong usaho ni kandidat on mangalehenna, pado adat ra dei monang. Ulang hum na pidato ato marlewatan songon i di dalan i atodi jolo ni lopo i, madung mangaropkon dicoblos atope i susuk kalak i calon nai.
Lopo on tola juo mon didokon daerah texas, ato inganan na paling bebas. Dison sude adong hakna mangkuling satontang aha sajo-asal ulang roncam ato bacar--ise sajo bolas mangkuling, tanpa embel-embel status, jabatan, atope titel-titel akademis. Mago dei sude, samo rato do halak di lopo. Sahinggo manjadi manarik memang anggo adong kandidat na bisa melebur tu egality ni alak di lopo on. Perilaku pe songoni juo, bebas dei anggo hum na gulung do anggo dong inganan, atope mangangkat pat laos manyirup. Angkat solop pe nga mangua, anggo mabiar mayup solop i harani na dompak banjir sampe tu pantar ni lopo ni amangboru i.
Aha sajo mei mungkin na bisa iharopkon ia (sada caleg, cagub, atope cabup) sian lopo on?
Parjolo, ilopo on ma mangaso sude parkarejo. Guru, pagawe, tukang takik, panggali bondar, parbangunan, mantari, doktor , aha sajo. Lopo on inda dong na khusus baen di sada golongan. Posenna bisa ma igali aha sajo na manjadi hajiot ni alak nabahat di lopo on,
Paduana, panduduk ni lopo on marbuka don mata, dot manangion don suping na satontang politik. Jadi istilah na inda apatis politik. Na godangan parduli ni alak na di lopo tu kampung, daerah, negara, ugamo atope dunia on. Harana masalah sagalona madung itondur kalai di tivi, itangion kalai i koran, ibaca alai i radio, baruma ipaparkon kalai mulaki i lopo on,
Patoluna, panduduk ni lopo on tola idokon parpolitik na so marsaluran. Aso idokon songon i, harana inda dong saluran ni alai tu parte atope organisasi politik na adong harani bahat ni parsyaratan. Jadi tola idokon partisipasi ni alai benna dong dei pamilu sanga pilkada. Anggo adong namangajak ulang dohot parsyaratan na bahat, nabahatan do na bisa marpolitik marpartai formal alakna sian lopo-lopo on.
Paopatna, dibaen i, kandidat bisa do on mambaen lopo-lopo on jadi sasaran kampanye informal, umpado ke tu RT, RW, ato Kades na belum tentu dope ra alai karejo. Maksudna karejo mamonangkon sada calon. Atope mula melalui alai adong tarsongon pemaksaan i ambaenna aparat i alai. Anggo melalui panduduk lopo on, adong muse gari sotik "miak" panggorengna lau mardalan kalai manjalaki konsituen ato pancoblos, na lancar mei sude.
Palimana, inganan ni manusia na vokal. Ise sajo pe na masuk tu lopo on, mangecek satontang aha sajo, sirungkas-rungkas don, ngadong biar. Ben rungkasna adong dei manombo parbadaan na imuloan ngun lopo harani arsak dot risak. Ben di calon ato kandidat on ma napaten i, jadi binoto A-Z masalah ni warga masyarakat on sian arsak, risak, ato partongkaran di kecek lopo on,
Paonomna, sian lopo kopi do miniaturna bisa i rekam dohot dianalisa ahado hajiot ni warga on satontang kabupaten, provinsi dot negara nia. Jadi momo mangumpulkon data, halak dot aspirasina. Kasidungan na mamura ma biaya kampanye, na salalu manjadi masalah saonok ni ari on di kandidat aha sajo pamilu na.
Papituna, ning Ir. M Noor El Husen, anggota parlemen bayangan na ilopo on sude pistar-pistar marhak mandokon ise sajo pajabat pamarentah dot parlemen i naoto-oto ato inda dong na botona, halai ma na um boto.
Sampe hubaen tulisan on, naso huboto doda najolo sanga andigan sanga taon piga adat ato tradisi minum kopi on i muloan. Sa nyatona tarida alak Mandailing inda bisa isarakkon i ngun lopo. Gaya ni parabotan di lopo i tola sajo maruba majeges, mamodern, tai hajiot dohot lungun na mangombus tapak i lek sarupo, tujia ato sanga sajia dao pe alak Mandailing i mangaranto. Malungun mangecekkon bupati, gubernur, presiden ato aha sajo satontang politik. Saima hatana, barisan alim ulama, cerdik pandai, hatobangon, mantari, pangguris, doktor, parkobun, guru, pegawe, tukang bagas atope aha sajo doma da manambai dot patupa obrolan politik lopo on.
Jadi baen i ma madung marakar marurat lopo on, manjadi budaya na madung mangalir doma on di daro ni alak Mandailing. Artina pala isayat aliran ni mudar nalai tartulis do ro hata "parlopo". Songgot doma boto ilala panulis adong alak kita di luat Depok an, di pandaramanan, mangecek maia bahasona anso maju ningia alak Mandailing, iagohon lopo kopi. Songon na marbaur boto ulala dongan na mamasa naso mamboto hakikat ni budaya amanta on, ato inda aru malo niroa margaul di huta ni alai, ato mungkin muse na malim lalana, tarsongon ampot adong ida ia na mudorot disi. Intong iba dei sude tileh, buat positif nai arena pargaulan na momo pasuo dot dongan di lopo. Onintong baya, kan lopo on sumber penghidupan ni alak disi. Sa luat manombo na dong dei dua tolu lopo na, manghidupi anak istri ma nguni, pasikolaon bage. Ima nia tutupon. Suadantong ampot adong dapot ia pangomoan ni parlopo on gontina.
Hidup lopo, hidup politik. Hidup lopo ni parpolitik.
telah tayang di FB 090413
0 komentar:
Posting Komentar