Oleh : Darwin Nasution
Ke tu narobi carito i, hatiha mangkoyok na ngeri on pe sampe ma. Ikobek ma dua tangan dot pat ni Nabi Ismail a.s. Ipagulung ma nabi on i ginjang ni batu, ibuot Nabi Ibrahim ma podang nia na madung ipatajom, lao maniop podang i tangan ni beliau, i topi ni simanyolong ni Nabi Ibrahim na renge dope ilu mamandang rupo ni sinuantunas na Nabi Ismail, marpindah-pindah mamandang ato iligina podang on, songon nadong pertarungan na markucamuk di bagas rohana antara parasaan ni sada ayah, dot kawajiban syariat ni sada rosul. Pangabisanna lau ipapit-pit Nabi Ibrahim mata nia, ipatopek ibana ma podang on tu talonan ni anak na on, manyamboli ato mangkoyok on harus ilaksanaon. Aha do na tarjadi, podang na madung i layan on songon na tumpol pas ikoyokkon tu talonan ni Nabi Ismail. Inda ra manggotap padohal anta na tajoman doma pado piso silet.
Sada parkaro na jadi mukjizat doma sian Tuhan ta i, na mambaritahon di hita bahasona pangorbanan ni Ismail, manjadi ujian do rupa di ayah dot anakna na sama-sama nabi ni Allah beda waktu, sanga songon jia kataatan ni ibana tu Allah SWT. Lulus do alai rupa di ujian i. Nabi Ibrahim madung patidaon berserah diri absolut tu perintah, inda dong ragu dot uos-uos ni ibana, Nabi Ismail pun pasrah tanpa reserve tu Allah dot orang tuana. Pas taraso di ibana bahasona podang i inda na marna but manggotap talnan nia, mangkuling ma ia tu ayah nia :
“Wahai ayahku! Rupa-rupanya engkau tidak sampai hati memotong leherku karena melihat wajahku, cobalah telungkupkan aku dan laksanakanlah tugasmu tanpa melihat wajahku”
Ahama na tarjadi, podang i totop inda mardayo mangaluarkon satetek daro pe, bope madung i patungkap dot i koyok ngun pudi. Dompak marsak dot ibo roana, harani na gagal mangkoyok ato manyamboli anak na on, ro ma wahyu ni Allah dohot firmanna :
"Hai Ibrahim, sesungguhnya kamu telah membenarkan mimpimu itu sesungguhnya demikianlah kami memberi balasan kepada orang-orang yang berbuat baik. Sesungguhnya ini benar-benar suatu ujian yang nyata. Dan kami tebus anak itu dengan seekor sembelihan besar".
Gonti ni nyawa ni Ismail na madung disalamatkon Allah i, iporentahkon ma ni Nabi Ibrahim manyamboli sada kibas na madung mekel di samping nia. I gotap ma kibas dot podang nangkinani, dung tu kibas taru ama na tajom get malobong doma dibahonna. On ma asal mula sunnah markurban nai laksanahon ni alak Islam di sa antero ni dunia on.
Bontuk ni riang ni roha na markurban di arirayo oji on, di Mandailing adong mon penggembirana, sadari nai so so sumbayang ari rayo i, ima mangalomang. Lemang mon saro Indonesia na, samocom pangananon sian beras ketan ato sipulut naitanak dot santan kalapo di bagasan ni bambu ato tumba ni lomang, ipajong-jong di adaran. I pamasak mon ira-ira martolu jom dot soban biasona sian halopa dot hayu na buruk panggor-gorina. Pondokna dung sampe waktuna jadi sangek mon lomang on anso i sajion incogot di koum-koum naro martamu ato manjalang.
Jia antong dung lopeh sumbayang ari rayo, ikoyok ma lombu kurban ni alak sakampung on, baik na mian di huta ato kiriman sian pandaraman. Na jajian kurban di ari-ari balakangan on, tarutamo memang naro sian na mangaranto. di huta na marpanduduk ira-ira 600 KK on ungada do sampe 20 lombuna. Na songkal mada ning si Tamam da, saayan ningia sa rumah tangga. Ngana dong model na asing i di itaan, taruna masuk tu huali jadi gule na marombu-ombu dei sudena. Jadi maia sahuali nagodang marbontuk gule bante na hiang.
Sian carito na di ginjang i, mardomu ma lomang on dohot tambulna gule hiang daging ni lombu. Ima sialngeon di idul adha di itaan, sadari bahkan sampe dua tolu ari rayo. Milas doma bingkur-bingkur ni si Ali benna lomang dot juhut i sajo masuk. Si Mamak marun doma ia jabat dibaensa panas dalam, inda bubus. Ihantam ia sajo rupana, lupa mangan sayur. Ato angkon naialo-alo dei memang dohot mangan pel atom ipaido di mantari i si In, so ulang ronyang ujungna.
Jadi imada syariat na dilaksanahon ni Nabi Ibrahim dot Ismail i, lalu manjadi syariat nadi patorus ni Nabinta Muhammad SAW. Di Mandailing ari rayo kurban on manjadi budaya kuliner ma di ari parpudi di alak kita sabage bontuk riang-riang marmangan-mangan marsilehenan panganon. So adong na sala on do habiasoan on, asalma ulang marlobi-lobi, lobi bahatna, ato lobi butongna sampe ronyang dot marun ibaenna. Anggo sampe songoni mudharat doma ro, sego ma tujuan ni kurban i. Mudah-mudahan nian inda sampe soni di Mandailing, harana ona daging pe anta na ra do dua noli maia sataon, sakalinai ima di Idul Fitri, manabusi sandiri. Bolas pangidoan daging kurban na madung marombus muap parmasak di dapur-dapur di Mandailing, madung onyak hona som-somkon tu kuah nai lomang na sangek, mandapot balosan na marlipat ganda sampe inda taretong nian pahalona tu na markurban, sian Na Sada i. Amiiin
telah tayang di FB Okt 13
0 komentar:
Posting Komentar