Oleh : Darwin Nasution
Aha ma na istimewa sannari na tarida di kampung dibandingkon dohot di kota ? Tontu antong bahat parbedaaanna, bope adong na tarsarupo ato na hum beteng doma i kampung, tai i targantung penilaian tiop-tiop kalak domai da, mangaligi kampung ato huta na masing-masing.
Songon pangalamanku pribadi, tola idokon menek niba sampe SMA i habiskon mian di kampung do iba. Najolo fasilitas pe tarbatas do, hum manonton tivi sajo ke tu kampung lain, pala manonton tu beskop kon tu kecamatan ma. Sannari pala iligi, aman na kompelet doma i kampung, apalagi barang-barang mewah di bagas-bagas. Adong na marngaur si dua ban, adong na mandoseng si opat ban, adong na matujigit sasa borngin di hampir tiop bagas. Asalna huida ngun sinyal ni ahai dei bo, na ngangang songon induri adop gincatan, parabola ningkalai judulna.
Adong carito khusus najolo di lorong niba i, dua maia si dua ban na marngaur i, honda dei idok daganak i mamiosa, ma alus sotik idokon halak na ngun kota medan kareta. Madung na patenan mei najolo di lorong i adong kareta ato honda Benly 1970-an dot Honda Cup Super 700 na martaon 1980-an. I pe nabiaso guru-guru dei mamake i baen kudo nia mangajar tu kampung-kampung nadao sian bagasna. Anggo sannari, lorong na marisi 70 rumah tangga i, adong ruangku sekitar 50 kareta, ato motor ning pangaranto Bojongjengkol, sahinggo marngaur kaluar masuk. Adong ruangku naitabusan ngun nadao dei deba, harana flatna F, B ato BA. Anggo BB tong botul mei nai tabusan disi. Mulak tu bahat nai sampe 50, jana 80% i. Model na pe ngana lobi-lobi ni kota ba, baru juo do songon Vario, Beat, Supra 125x, atope Spin matic ni Suzuki. Pondokna tele ikut model ngen kota do nida. Sangajo nang maju mei sudaro na di kampung i, oni bahat do pitis ni alai panuhorna.
Bope lorong na menek maia, na taradong-adong muse do uida isi mangunsandar siopat ban angkutan keluarga margoar Avansa, Kijang Kapsul, Suzuki TS, dot Xenia. On ma na hudok na mandoseng nangkinan, alus do sorana, tapi doseng kehe na harani ipas na. Doseng ato dopeng do, tu Medan, tu Padang, tu Dumai, atope ninna na ra dei tolap tu Semarang maroban panumpang. Memang, ninna bahatan pangomoan don ji alai manaruon kalak tu jia-jia. Motor rental mon ninna goar rajana, son judul di kota juo do binege. Bope ale na mancicil mangangsur, tontu persekot parjolo nai ato Depe nai marpulu juta juo dei, botul, sangajo na parepeng do alai, tapi adong kubege kusip-kusipna guru-guru ato PNS na manggadeon SK don kulluhum.
Torus masuk kita tu induri na tahar adop langitan, panangkup sinyal tivi naisalurkon to monitor na bolak-bolak bagen do huida, 24 inchi tu ginjang bahat. Tup-tap marsurak hampir tiop bagas. Adong na mambukak filim India, adong na mardangdut, adong na mamasang sinentron, atope mambuka saluran dakwah. Margaor mei jadi sada mardongung doma binege lorong i, apalagi borngin ari, mun ma taraso horlung ikulilingi na golap. Anta bahat dei na nahit tivi nai hampir sadari. Parabola nai pe ninna na taradong-adong epeng panobusina, ato paling otik taradong-adong dei mangincop arus ni lampu ato listrik i. Tontu tarmiduk dei ruangku pitis tu rekening PLN na.
Tarsongoni ma huida sudarontai na tinggal di kampung i, nabiaso domei jalai na marngaur, mandoseng dot na matujigit. Jago dobah pitis ni alai, makmur do alai di sadun, syukurma, tapi ulang lupa tu masojid da, ulang se na i jolo ni tivi i sajo sasadari, tarotamo siaran ngun parabola nailopo an, oihdah adong bage do uida na roman-roman.
0 komentar:
Posting Komentar