MAMBODIL AMBURKOM

Oleh : Darwin Nasution

Hum na lopeh sumbayang Subuh dope, i haut ma bohal na madung i pasiap muloi andostorang i. Makasudna, na get kehe on boh rintang tu bagasan ni arangan godang manjalahi amporik na godang na marjuhut. Jia mantong i, ulang itembak anggo hum cion do sanga cininit, nga dong i dagingna, habong na dei gokan. Angke i pentong madung sah dei amporik na menek.

Mulak tu pudi, targan so lalu tu arangan godangan, na santak doba loja di pardalanan jana aha do jalahan tu arangan godangan. Mangkeker-keker amburkom (pergam Indonesiana, idok alak kita deba pergom), pune sanga tobu-tobu godang. Tarsohot na manyisipi amporik on di hayu nabiaso ipangan ia batu nai, angkon asok-asok so ulang tarsonggot targan so i patik sinapang angin on.

Dalananna harana taksiran adong 3 sangan 4 kilometer ira-ira pandaona. On ma agakon on boh, targan so ngot gari amburkom on, nida ma gari marngayat dope, so ilehen isia pelor TARGET 3,5 mm na ipamasuk tu bokas ni botol ni afitson on, mandorik madabu anggo pas tu ului ato tu indora pamunuan i. Anggo nga dapot di antargan so ngot amburkom on, harani mabang ibege ia iba lau ro, ato i tembak inda hona, na ra doma kotu ni ari so ro ia mulak mangan batu ni damar on.

Pala madung soni pardalanan na, na painteon dope arani inda hona di na manyogot i, i jalahan ma jolo di sangkuliang i hayu na lain na marbatu, umpamo pege-pege. Mangonggor amporik na hum menek doma jolo, songon tobu-tobu, pune sanga upen. Dina tolu burung on na pambiar antong pune ma dot upen. Anggo tobu-tobu lek ro do ia i, bope inda hona, harana tarrakus ia on mangan batu ni hayu songon pege-pege on.

Di antara ni paluas-luas waktu painte haroro ni amburkom on mulak, disi bagen ma ibuka bohal na ioban ngun bagas nangkinani. Ngana jabat sanga aha da, indahan, gule bulunggadung, sambal ikan tori markacang dot kantang. Tapi anggo i arangan an ipangan na sangat mada tabona. Sabaul-baul indahan i na tep mei sude ben tabona mangan di arangan. Itamba madung loja, porlu muse mulak mangisi bensin na so tahan tu kotu sanga potang ni ari. Dongan niba i pentong i buka ia mei bohal nia i, marbagi martukar gule ma iba tong, so rap tabo na mangan i. Abis i idurus ma aru-aru i dot aek minum nang i pamasak, na itauk dot garigit di pancur ni mata aek na kaluar ngun napal di topi kampung i. Ngali dot puas ma ilala mandornguk na.

Dapot ma waktuna i ligi mulak batang ni damar parkalilian ni amburkom on. Botul mada nga sajia onok roma mulak. I paapon-apon ma mangaligi arah na pade, so nida tangkas laos manembak na. I pompama marpalan sinapang Benyamin on sapulu pompa, ulang be nangkan maleset, harana kesempatan terakhir on. Nga dapot on potang ni ari domei soro mulak, ipe pala ra inda mabiar. Dung pas ma nganan mamandang tu amporik nan, i paadop ma tu na momo nai nida. Adong do dua disi, tapi sada maia on sasaran, lek na mabang mei dongan nai jabat bege ia sora ni sinapang. Tarik kokang, “Panggg...ninna ma sorana, book ninna iginjangan”, hona ira-ira dugaan pas indora nai. Madabu ma maduruk sotik inda pas do toru ni damar i, tai lek dapot juo dope. Ngape tong mate lalu i biaso, isima i sembelih lau marbismillah. Pala madung mate pe biaso, mai bismillahkon mei laos manembakna, sah juo mei ning kalak parburu. Dapot juo amburkom boratna tar satonga kilo on, tapi na santak tabona dung irondang, dorep-dorep i pangan dot holi nai sude.

Lopeh mada cito-cito sadari i mambongkot amburkom, markobas mulak doma harana ulang sampe mapotang tu, markaluaran non binatang na godang targan so tolap tu kampung habiaran dei, umpamo babi, gompul, atope ra babiat. Pala na manjalahi amporik pe na salaos mulak doma i dalan-dalan i. Ra juo dei memang martamba manombo, anggo tarida na dompak modom amporik nai. Marlima pompa pe tu tobu-tobu i, na lopeh mei mandabuon ia tu toru on.

 Tarsoni mada halilian di daganak alak kampung parkarangan, dompak menek di hutana, manangkok manuhat manjalahi amporik tembakon tu topi ni Patialo sanga Simandolam an, manangkok ngun balik arah ni Tamiang an, huta ni panulis kisah on.

telah tayang di FB Juni 2013