JAITAN POKEN

Oleh : Darwin Nasution

Carito pakean saro najolo do on. Pakean sikola sanga pakean ari-ari nai tabusan pala kehe tu poken. Biasona argana ummura, harana jaitanna sadapotna do songoni, Manombo ngana i jait pinggir bagen jabat. Oni nabiasoan bahanna dung isabun na cocang do, ra ruangku dot silumang pe mabuk di aekan ibaen warna nai na taldus i. Biasona tong so deges pakean maso i kon na i pajaitkon do tu tukang jait nai tandaan sanga langganan. Bahanna manombo adong di tukang jait nai manombo bisa itabusan jolo i poken baru ioban tu tukang jaitan. Abit na deges waktu i ibagasan pikiran niba ngadong na lain, angkon nai pajaitkon.

 Tibo-tibo don dabo manombo angkon na manabusi iba jaitan poken on. Abit sikola niba don biaso, mago sanga inda tarpake be harani masuak sanga hona gota. Anggo painte pajaitkon mahonok tu, sobob maso i keahlian ni tukang jait pe inda songon sannari. Na ra dei sapoken so siap sa sitel pakean sikola. Ato pas tanggung waktu nai. Maksudna sakali sataon dontong na pajaitkon pakean sikola on pe. Sega di antara taon, inda cukup epeng pajaitkon na baru, malua mei tu jaitan poken, jaitan massal don ruangku murah meriah. Anso hum tahan sotik iorgos, ioban mei tu na adong masinna tai inda tukang jait di banjar niba i so idabel ia deba jaitan nai. Na otikna ima angkon itambaan jaitanna di pisak nai ngun toru tu  ginjang dohot pangkleman ni ujung nai ngun toru so ulang ipas sar-sar.

 

Jadi tola ma idokon baju jaitan poken on pangganjal sementara don, painteon sampe taon ajaran baru. Disi ma hatiana mulak pabaenkon na baru. Godangan dao dei argana memang pajaitkon, tai puas songon hata-hata ni papatah i "kalah manabusi, monang mamake". Anggo papi, ulang ioban manaek pining dohot arambir, harana manaek suan-suanan nadua on biasona mangorgos abit benna so mardangka i, tahan dei sampe taon ajaran taon naro. Na hematan dei iba dot ayah umak niba satontang pakean. Sega i tonga dalan malua tu jaitan poken, ngadong i pe, pangabisanna i dungkapan domei. Tai biaso dei, ngana jabat maila iba i baen i, bahat dei iba sadongan na songon i.

 Aha do so taringot panulis di jaitan poken on? Na sadari dei mangecek-ecek dot umak nai, adong pakean ni daganak i na martahan honok, oni inda pudar warna nai, boti lek deges lidang dot simpu nida bonang nai. U sapai sanga ijia itabusan, idokna i hatiha cuci gudang idul fitri departemen store Rayamana opat taon na lewat. Argana pe mura do, bahkan super duper mura dome ulala, sapulu ribu sapotong, padohal nai gadis nalai disi inda kelas jaitan poken, na marjuduldo abitnai, gambar ni kudo bagen do uida.

 

Sabalikna ning umak nai juo, abit nai tabusan i poken-poken tradisional di sangkuliang nami on sataon na lewat, inda na ture be abit nai. Marnaginjang tangan nai, marluk-luk momo, mang cocang warna nai, pokokna tele ma songon uta-uta ni lombu ma pandokon ni si amat buras. Padohal dua kali lipat bage bahkan lobi sian naitabusi di toko Rayamana nangkinani. Jadi imada, anggo najolo manabusi jaitan poken biasona um jat tapi sasue do um mura. Sannari, manabusi jaitan poken madung um jat tai ra umgodang argana pado na marmerek abit nai. Jadi sadapotna angkon naikojar juo do tu supermarket an so sep hasilna harana anggo alai manjago mutu memang, maila alai mungkin manggadis najat. Anggo tu poken-poken sannari, inda benna so cinta iba tu poken tradisional, na bahatan na mangicu do i sadun manawarkon dot mangargai barang, dapotna jot-jot na ipas malala do pakean nai. Mulak juo bayangan ku tu najolo i, ampot na markarung i dei mungkin itabusi alai tu pabrikan, sortiran, ima igadis kalai i poken-poken. Kualitas jaitan poken juo, cuma dodas maoto iba hum godang argana.

telah tayang di FB Jan 14