Aha do luaning siduri on? On ma sada mocom ni gulaen natopak di Batanggadis dompak deges alami dope aek i naingkani. Gulaen namaol-maol momo buaton harana ia musim di dompak menek ni aek, tapi biasona adong panghalangna anggo get ibuat dot jala. Biasona musin ni siduri bersamaan juo mei dot marlumut aek godang. Marbalutma bahat batu i bagasan ni aek i sahinggo anggo hona jala jadi sangkot mei lumut i i lubang-lubang ni jaring nai tutup. So adong be parsangkotan ni gulaen. Ngara be dapot gulaen umpamo sidurion pe dung soni, apalagi dung gok lumut ngana tarsampakkon be jala on harani boratna lumut na mangiut i. Jana aha doma carana so dapot siduri on, dohoti torus carito ni penulis da dongan.
Siduri on di deba kampung idokon juo siating. Mocom ni gulaen na marsating—sating bahasa polisina ‘patil’ ima nadong di baung ato ikan kalang (lele) juo tapi marrasun—cuma siduri inda marrasun ato marbisa. Jadi inda porlu khawatir iba manangkupna, inda jabat mambugangi i sating nai, sapalamabugang pe nga jabat marngot-ngot benna so adong i bisana. Gulaen on jenis namenek, sasa anak tangan ni alak na dewasa. Jadi benna menek i, siating ato sirip nia adong tolu pasang pir songon duri, itamba ulu nia pe pir, ra ma pangarasoan ngana dong be juhut na, ima tarsongon duri doma gok an, mungkin ima sobobna so idokon siduri. Ra mantong mambaen tarduri baba pala sala pangan. Mulak tu pangkal aha ma caro mambuat siduri i aek Batanggadis.
Na paling joleh mambuat siduri on di menek ni aek, oni lan muse gari. Ra muse dei manombo marsamari rap ro mamenek di alogo masuk muse bulan puaso. Anggo donganku si Pian na asik na ilala ia mambuat siduri i arsikan—ato alaan saro julu-- i muara ni Aek Kalumpang an. So adong silo on pala dung siap taraweh ninna, biaso dapot mai siduri on, incor, sulum, aporas, campurna, imei gule pala mangan andostorang. Na paling rami mambuat siduri di alak kampong tai ima manaon lukah siduri. Lukah na sosot antara ni pangurung nai, inda lulus anak tangan. Sungapa ato pangolat parmasukan ni gulaen nai na marbontuk karucut i hum na lulus induk tangan. Nga kan na bisa siduri ato gulaen na asing kaluar lewat i, harana benna sompit iboti pincur-pincur i ujung nai. I bagasan ni lukah on—antara ni sugapa dot iurnai—i sangkotkon mei ompan pangarangsang na. Anggo nabiaso ibaen ima sangge-sangge i campur jaira doli. Mangaligi mocom nai na mangandung mentol do nida on, ampot dabo menarik i, boti momo muap ilala siduri on, ianggan ia panganon. Itaon mei lau magorib, idaek ira-ira jam 12 borngin. Anggo topek bahal nai najolo, ra dei get gok satonga lukah nai son nai ayak tumpuk. Debantong mandapot, adong muse nga topek nganan nai, ato dompak adong pemangsa di sangkuliang nai, umpamo labi, jadima ngadong gulaen aha sajo pe disi. Songoni juo pala adong di bahal ni ikan kalang, ngada adong be siduri.
Mambuat na paling momo tong mangaramok ato mandehe lau mangungkapi batu palan markaco mata. Anggo daganak mangkaco i so nida pake tangan kiri, tangan kanan manangkup siduri nai. Anggo na madung mahir i inda markacomata jabat, mata maia dot tangan lek hum bahat dapot kalai sian kalak. Sargut mei panyusuk na ibaba in gun bulung ni arambir na madung i ela bulung nai itinggalkon sotik ngun pangkal parsangkotannya pala madung isusuk siduri i ngun insang tu baba nai. Manombo sapangamparan ni lubuk sampe tu lubuk nai ramei na malo i sampe tolu opat susukan 30 cm ponuh siduri. Daganak pe ra mandapot tai mungkin inda bahat, jinak-jinak so ture dabo siduri on, monjap sajo tu toru batu, ima so iungkapan deba.
telah tayang di FB Jan 14
0 komentar:
Posting Komentar