BENGKOK BATU SAONG

 

Oleh : Darwin Nasution

Jihin Bengkok Batu Saong di toru koje udang (koje udang saro Indonesia na beringin daun besar) adong pas di topi parsabaan di kampung Tamiang. Topet na di sada banjar Kelurahan Tamiang, banjar Ujung Goluk goarna.I ginjang ni SD natobang, SDN 1 ato nomor nasionalna 142658 Tamiang Kotanopan. Antara ni SD on dot Batu Saong i ima parsabaan ni alak si Samriah. Paranakon ato ponakanna nai tandaan na jot-jot marmayam di saba ni alai i ima si Karak. Madung musohur mon jihin Bengkok on muloi do hundul iba najolo di sikola SD on. Lek nai larang ni apak Kaslim mei ulang manopoi i parik ni sikolai naron hona si Bengkok ato anak-anak nia.

Aso do idokon si Bengkok jihin on. Ning kalak na ungada mangida pas i patidaon ia iba nia martubuh kasar halibos manombo, tangan kanan nai ngana ra lidang, pekok ujung nai songon goluk pangarabi, goluk bengkok ninna goarna jita an. Istana nia ning datu Koring i Batu Saong an. Batu Saong ima batu na adong parsio-sioan di toru nai lapang dot bolak songon payung. Nganan na pas ma di toru koje udang nangkinan i. Tarbontukna batu on manurut hemat ni panulis na ungada mangaligi tu topi nai, ima ngun satalakmit dot satalaktit di guo-guo batu gamping. Di sadun idokon batu silatung. Jadi mun ma lengkap seram ni inganan si Bengkok on di toru koje udang, I toru ni batu na saong muse. Na jot-jot an si Bengkok on patida on iba nia pas lau manyiborang sangkidop mata ia mangalewati dalan godang dot Aek Batanggadis tu Sababolak, parsabaan na pas di bariba ni Tamiang i.

Songonima ninna carito ni ompung si Cimang atope alak si Koimah sabagas nadong bagasna donok tu Batu Saong i. Halai tong madung disi ma bagas nalai muloi najolo, nabiaso domei mungkin jalai mangida dot mambege carito Si Bengkok on.Ngana be na mabiar kalai i.

Adongjuo dope sarombongan jangak nasodong biarna di jihin legendaris Tamiang on. On ma rombongan partaru, marjudi Koa goarna ubege najolo dompak menek iba. Marjudi kartu koa siepeng pas dei i toru Batu Saong i i paombang kalai amak parjudian ni alai i. Inda i ganggu si Bengkok dot kerajaan nai rombongan on binege, pot dabo dongan tu jurangan mon ilala jihin i tongkin nai jadi nga porlu i ganggu, iganggu mei tong dongan pot ninna roana. Rombongan on personil na ima Rudang, Batu, Pagar, Rokek, Bango, atope Juaro dot bahat dope na asing najot-jot marjudi disi. Sasadari sasapoken pe alai disi ngadong sanga mangua, so adong biar dot mara na i alami ni alai. Na leluasa do alai marsurak pe di alaman ni istana si Bengkok i.

Anggo songon iba halak biaso, lek naro dei tondik niba mamolus disi sampe sannari,bope ninna caritona madung koit mei si Bengkok i. Tarsongoni ma nairasoan pas najolo dung SMA iba di Kotanopan, tapi lek lewat dope iba disi lau tu banjar nami banjar Siluak, banjar parjulu ni Kelurahan Tamiang. So ucaritoon da. Madung piga ari on adong sajo belajar tambahan di SMA an, jadi ra borngin doma iba mulak tu Siluak, tu bagas nami an. Ngada nian borngin situtu hum lewat Isya dope sotik, tapi memang kon hulewati i lokasi nangkinan. Laho pat muse dope i harana pala borngin soni, nga ra bei supir ni BON I pataru iba tu julu, olat ni pamutaran Ujung Goluk i maia ia i. Nga tarkaua kon lao doma. Ison ma imuloan carito na mabaen matondik on.

Borngin na ian, mulak ma au ngun sikola tarborngin ma, ira-ira jam 08 borngin. Son nau udokon nangkinan lao doma, ma ipaijur motor i au di pamutaran na dilombang ni SD 1 i. Inda maronok-onok, mabiar mun golap, upacu ma langka mangalewati lokasi nangkinani. Mangkagodang ilala tangkuhuk i, tapi pamatang madung loja, por doma roa gari ipas sampe tu bagas so talak iba um copat i asur luluk nai baen ni umak i ngun apas nai buat i sabaan.

Muloi ma mangalangka ngun ujung ni banjar Ujung Goluk i, ama na longon, namangarimbus muse do udan pas magorib nai, bope madung siang hatia i. Na ramian sora ni kurindik dot sapor atope serangga na asing, ngana paramion jiba, napatamba biar dei nasonian. Mun maipas langka i, na get manaklukkon jarak sakilometer on. Opat belok maia nia so sampe tu bagas, tapi na incatan parjuangan mangalewatina, harani na marjihin-jihin on. I dalan i pentong sangajo botul mana lewat sajo jihin, ngana tanggung longonna. Kanan kiri ni dalan on bahat dope nian hayu-hayu, koje-koje atope gala-gala. Mur lom-lom golap ilala.

Lalu tu tontang bagas ni alak si Koimah i, isi pe mang tutp do pintu nalai, bope adong cahayo ni lampu juguk ngun bagasan tarida ngun antara ni dinding gogat i.Mang modom ma alai niroa, abang nia si Anar dot si Lukti pe so dong be binege mangecek i di alaman i. Rep ningia so sipatu i songon na irem. Adong na mamintas ijolongku lau tu bariba, warnana na bontar. Kontras dentong dot borngin ni ari pala bontar jadi ra mur jelas ia. Halibos lalu mago. Tarbayang ma si Bengkok songon nai legendahon ni alak sa Kampung Tamiang i. Manaek tondik i langsung, anta na sabatang karambir doma ilala talonan i. Marombus ngali i tangkuhuk i, dung nida pamatang na bontar, tapi inda sajia lampas. Ninna pentong inda na aru ginjang si Bengkok on. Inda honok na sonian hupaipas langka, bahkan son namarlojong doma ulala ro, tapi inda ngos-ngosan, mungkin ben biarna. Padohal tikungan parjolo dope, tolu tekongan nai baru sampe tu bagas. Inda be, nailotap doma maripas. Mandodor doma hodok i, apalagi pala upandang tu nagolap-golap i, daun pisang pe ma songon bayangan ni jihin nida. Sora-sora ni binatang borngin i na mun mambiari do ilala. Di bagasan roa marzikir-zikir doma au marharop bantuan dot ketenangan ngun Na Sada i. Toh ngana ungada ilala iganggu alam ni alai. Hum na lewat do iba, tapi memang inda ungada u alami on na jolo-jolo pe bope jot-jot iba habornginan disi. Pas do naidokon nisi Tapa i,anggo na borgo-borgo i na raan lewat pala dung siang udan rimbus-rimbus. Pot borgo dabo ilala ia, jadi kaluar marmayam.

Ngana dong ilala tambahan energi murmaipas langka i. Hupabahat kabaranianku lau marzikir dot mambaca ayat parlindungan ima tolu Suroh pangabisan ngun Al Qur’an iI, mun maonok mun ma landung. Ajaib…mago biar, nga sajia onok au pe nang sampe ma tu tikungan pa opatna donok mei tubanjar Siluak bagas nami. Indabe na paduli au dung lalu, I pio si Borkat dope au ngun lopo i si minum jolo ningia, napor roangku marsampulung doma, modom, mudah-mudahan nian dot doah ulang marnipi si Bengkok.

telah tayang di FB Nop 2013