Oleh : Darwin Nasution
Tarmasuk hatia na ipainte-inte dompak di itaan najolo ima menjelang taon baru, musin ni tarutung mon dabo dot buah-buahan na asing. Tarutung tradisional na manis dot dalmuk, mangalimpah mei di satiop kampung di Mandailing, bahat muse mei tarida na manggadis di topi-topi dalan i. Argana anggo dompak songonon na muraan dei, bahkan manombo nga laku epeng, mangalehen do nampunasa nai. Anggo i topi dalan i pala adong nasega nai tobusan i, langsung dei bisa ipaulak so igonti. Inda songon manabusi tarutung i kota i, songon na manabusi uting i bagasan ni goni, argana madung godang, na untung-untungan muse do sanga na denggan, pala nga topek denggan ngana bisa i ale dipaulak.
Anggo lancat do dot rambutan ngana manabusi jabat i, asal ra manaek dei i kobun ni nampunasa nai, anggo dompak isi ia. Ulang muse ibuat antong anggo naso isi alak nai, ilahat ia dei iba ra. Ima fair na alak kita, anggo ipaido jarang dei naso mangalehen, anggo itangko marmara.
Mulak tu na martarutung, bahat mon luok-luok na songon na um rami ato um gok disi, songon Aek Banir, Tambangan, Sabadolok, Pinyongek atope Ulupungkut. Di satiop kampung pe nian adong dei,tapi di di luok-luok nangkinani ma umbahat.
Songoni ma di sada ari di Desember taon1990 iadongkon ma rencana martarutung on di huta ni partulangon niba, DesaTobang Kec. Kotanopan. Masukma jam 08.00 manyogot hum lopes mangan tu arangan partaturutungan di bariba hutai. Martolu ami uingot dompak i, oban ma goluk pamboa dot sinapang angin halilian. Maksudna anggo nga dong dompak madabu, manjalahi amporek tembakon ma jolo di humaliang ni kobun tarutung i. Adong do antong mudah-mudahan margonti sorin. I pangan sada nga sajia onok adong muse mana baru madabu boa on. Torus ma tarutung masuk tu bitua i sampe potang ni ari. Sahinggo gok doma ilala, inda lilis be indahan.
Aha ma na tarjadi dung borngin? Isi dope niroa su kaluar gas nai, mananggung iba ibaenna. Inda dong na honak, gok ilala sude, payah mosa. Modom su ra, jong-jong juguk busa-base. Na situtu na muloi ma haruar ngun pudi ... put-pet inda marna putus sampe manyogot nai muse. Dung tarmanyogot dope su turun gas nai, oni adong juo ma tarpodom sotik laos torang ni ari. Jadi palajaran mei rupa ulang mabahat tu anggo tu tarutung on, na mangandung alkohol dei ninna dabo gas nai dung di boltok niba. Tapi, ima dabo kenangan nai, muta martarutung ma goar ni i su ulang haskasan dot penasaran mangaligi tarutung. Apalagi tong na garatis do sude, nga mambayar sotik pe.
Desember tahun 2006, pas dompak mulak hami sekeluarga dung 8 taon di pandaraman, i cubo muse ma na martarutungon. Tapi inda be di desa ni partulangon on, i uta doma songon i, Tamiang Kotanopan. Adong muse mantong tangkalna hita puna opat sampe lima batang na mamatuh mardanon. Mandapot do iba tiop manyogot pala ijoloan, pala nga i panjolo-joloi ibab sangan jolma jadi-jadian. I pangan ma tarutung on, tapi rupa ra do nga songon na jolo i be hum sada dope masuk mang ngokan. Incogot nai na ke doma musetu mantari an, harani na buruson. Oisdah, nang matobang ronggeng i niroa domada, inda na tartampung ia be hum sada tarutung pe. Na marubat ma i binaen sa. Songon i ma kenangan i, sampe ari sadari on nasu aru tarulakan dope martarutung dot daganak di bulan mandonok i taon baru di huta.
Torus torang, malungun do ilala memang mulai di hatiha musin tarutung on tu Mandailing. Anggo ning ruangku nariburan dopei tarutung haruar anggo di musin nai, harana na isuan na baru pe ruangku bahat mei na marsiajar mardanon.
Songon adong hubege kabar bahasona anggo di musin nai na bolang pajiar doma di kampung-kampung i. Hama na mura pala igadis, jadi ilehenkon kalak i doma, ngadong na giot tinggal boti. Iambungkon kalak i bagen doma deba ninna tu Batanggadis di sada musin tarutung di Sabadolok Kotanopan. Na tagi mada na martarutung da tile. Taringot iba mantap nai palai campur tambulna dot lomang ato sipulut na markarambir.
Andigan doma ruai su bisa mulak martarutung tu Mandailing tie?
telah tayang di FB Nop 13
0 komentar:
Posting Komentar