SIONYOR*

 Oleh : Darwin Nasution

Marsuo najolo alak naso ban na so i dok  ma ia na onyor. Marlenggok-lenggok ato manggeldok-geldok nida songoni patidaon potong dot habujinganna, adong mei mandokna dot na onyor. Tai, konotasi na onyor on taridentik ilala dot adaboru na habauanna, na lau mabujing. Paling ma anggo tu alaklai dodas ipio on tu daganak, “Taru so ban ko so, na sonyoron do ho ruangku”,ninna natobang-tobang i manombo.

Imada sabotulna na get kecek on ta on, onyor asal hatana, tapi tu binatang nai don kehena. Binatang aha ma ale na mambaen kalak inda banna so pala hona. Goarna mirip juo ma, sionyor. Bahasa polisina sabotulna ulat bulu don, nadong manempel ibatang-batang ni hayu, inda tarkacuali na jot-jot i panaek daganak di mandailing umpamo manggis, koinik, sauh, atope jambu aek. I batang nibuah-buahan on ma maradian so manombo sionyor on, manaek daganak i, orgos tu pamatang nai. Inda bedabeh, aha ma tarjadi dung i?

Ngana lalu be manjata jambu sanga manggis, madung gumatali sibuk ni danak i marsap-sap habong ni sionyor i. Mun ma sangat bolak na margumbangi harani panggomaan ni gatal nai, ambaen jama tot jama ulu, goma i gincat goma tu toru, ngana banna be so. Songonna manari-nari bagen nida jabat baen lincahna panggoma nai marpindah-pindah. Anggo i goma hon nia gari jari nia i tu halak na ra muse dei rarat dot kalak igumatal. Aha dole ubat na ona sionyor on?

Jadi na tempel i batang ni hayu i ma nai dok sionyor. Adong muse dei di mandailing ne sering tardegehon tangkulapa goarna. Na asing ima na markut-kut di sarangna di bulung nisuan-suanan umpamo bulung ni sitopu ima jagar bulan. Tangkulapa dot jagar bulan ulang main-main i, anggo hona ra dei marun halak nai. Aha do nangkin ubat na? Na biaso tarida hatia i ima miyak manis nai gepuhon bawang tusi. Hurang masuk akal do ulala mula hupikir sannari, na milas tu namilas. Rupo ninna miyak dot mentol ni bawang on bisa mangurai habong ni sionyor ato tangkulapa on so caer ia igoreng miyak i. Milas parjolo nai, dung marreaksi dot habong nai lau-lau borgo so mai inda be manggomai.

Na mocoman pengetahuan ni alak mandailing satontang mara dot ubatna. Sionyor na hona tu alak pe sabotulna ngana hum sada i ubat na ni pake tusi. Tiop kampung ra doi marbeda caro manangani na. Ima da khas ni budaya, maraneka caro manangani sada masalah, nasude biasona na ingkani alami, ngun lingkungan juo do ubatna.

Jagit holong ...

*telah tayang di FB Mei 2014