Oleh : Darwin Nasution
Huida gambar si Lokot Lubis satontang halak na mangkoruk kulit manis (ulim) di Kotanopan. Alternatif ningia di tonga-tonga ni mura ni kantalan. Marniat ma ulala mangabadian bakal carito on tu tulisan tapi manuliskonna ulang lobi ngun 15 menit. On pe bo na muloi mon speed nai ampot ra do. Taringot mada na masa-masa i dompak dot bagen iba mangkoruk kulit manis niba na ibuat, atope mangkoruk kulit manis ni alak nai omo. Pala sakilo hatia i paling mei lima ratus rupia, angke kulit manis jadi nai pe paling mei 3000 di gadis nampunasa nai. Sannari naso pasti do jau sanga sajia arga ni kulit manis, adong kubege kabarna baru-baru on tar 5000 maia. Naso dapot do jau rarena, tai memang na joman mei hubege inda ra be arga ni kulit manis on.
Iubak antong adi kulit manis on ngun batang nai ibaen mei ira-ira 5-7 centi lebar na oni dua eto ginjang na ato urang lobi sameter ma na paling ginjang habiasoan. Iubak mei ngun pangkal nai sampe tu ujung an sanara itarik dung igornot. Inda ra be i iskisan songoni sampe mela ngun batang nai ibaen rawit goarna. Baenon tu bagasan ni nadeges pala mangkobekna, atope igadis totop lek songoni, tapi argana na muraan. Sabatang non kulit manis naiubak on rantong sapulu kilo ra juo lobi, targantung tu umur nai ma ato subur ni lahan nai sahinggo apal ia tubu.
Madung salose tarbuat kulit manis on ioban mulak, madung adong mei nara iuta mangkoruk na tamba-tamba ni karejo ni alak di potang sanga borngin ni ari. Iparar kalai baen panabusi ni balanak poken on, daripada so songoni i bagas. Adong antong na mangkoruk i alaman bagas, adong na i taruma ni bagas, adong muse di dapuran songoni marsosot dot baraos i dongani lampu telong-telong. Mocom mei, sanga ijia na tagik ma asal salose hajiot ni alak, dapot muse tamba ni pangomoan.
Pala dung tarkoruk i jombur tukang koruk nai juo mei. Bagian ni tugas nia dope i. Marbalun ma hona mataniari mardua tolu jom, i daek mei i pamasuk tu karung ilehen mulak tu nampuna sa nai. Anggo sabangso mangkobekna maloan dei ia. Ikobek rip-rip, rapi baru ioban cogot tu poken Tamiang. Mudah-mudahan marepeng mei harani i. [kurang lebih 17 menit:lama menulis]
*telah tayang di FB Mei 2014
0 komentar:
Posting Komentar