PERES-PERES*

 Oleh : Darwin Nasution

Tarsongon na marsapa tu dongan-dongan, adong don na mangalami manabusi sanga aha di lopoan anso mandapot peres ato hadiah nai ruai. Maksudna umpamo manabusi kopi nadong sitempelna i lampak nai ngun bagasan marhadiah kapal terbang, ato dompak menek manabusi chiki hadiahna jom tangan atope mainan na asing.

Ha ha mandapot hadiah na mamuaskon da ruangku dung manabusi sanga aha pe ning roangku mitos dei. Pamanis promosi dei anso laku barang nai i pasaran. Umpamo hadiah ni kopi sampe total jabat samilyar, kan na sarupo dot karugian sai juo mei. Pala adong pangakuan na mandapot hadiah halak nai motor, mobil bage ninna iwawancarai TV, ah i dabo akting dei so pursaya alak. Paling mei keluarga nia juo. Ato hadiah tabungan, na menek-menek tabunganna nga mungkin i mandapot hadiah na godang. Na manabung bahat dei na hona, ato keluarga nia juo ma so bisa i gadis mulak dung muncul di tivi.

I mada peres-peres nai ato hadiah i. Sejarah na dabo ngun bahasa Bolanda do “de prijs” ato hadiah nai lehen ni alai tu panjilat-panjilat alak Indonesia i di jaman panjajahan. Mirip do kan boti jadi peres di alak kita. Modelna tong najolo manabusi kupon dei iba di lambar peres-peres nai marisi angko, baru i pacocoktu angko hadiah di lambar naian juo. Adong hadiahna roti marie, pentak, pirtolot, pamupus, gulo-gulo, adong juo tong epeng. Ngana manabusi panganon jolo so marhadiah. Langsung manabusi kupon, songon na mangundi nasib doma. On ma ruangku sada bontuk ni pangajaran marjudi na menek waktu i. Anggo daganak sannari tong modelna hadiah nai i bagasan sanga temple doma i palastik dipanganon i.

Adong nida tong maso on peresna epeng 1000-5000 di bagasan ni chiki atope panganon nalain. Adong peresna jom-jom palastik computer ning daganak i, maksudna angkonai digital, idok ia computer. Benna marhadiah i deba manombo ngana i pangan be isi nai, nga marhadiah ato marhadiah na siambungkon doma aha pe panganonna.

Harani ima bahatma daganak in a mangabiskon epeng parpoken nia baen tu na manabusi peres-peres inda jabat hona panganon na mambutongkon. Mulak tu bagas ngun sikola ato marmayam madung mandapot parpoken manyogot, sosakan mangan songon namale. I sise ayah sanga umak nia mangaku bahasona madung i abiskon ia epeng niatu peres-peres. Manombo antong na jarang do na marhadiah, lek i hantam daganakon sajo, padohal na mangido mohop sajo do bungkus nai isia bope naso marsala. Angke adong hobarna di lampak nai ngun bagasan, MAAF ANDA BELUM BERUNTUNG, COBA LAGI. Harop-haropan sajo ima mungkin so lek i cubo ia juo.

Na mocoman modelna. Adong tong manombo kopi do itabusan 5 marhadiah sada galas, cocok mantong ilala barang nai dot peres nai. Minum kopi tong rakuk mei kopi nai itombur dot aek milas di galas. Tapi adong juo dei peres i inda masuk akal ilala. Manabusi rinso na godang peresna cambong sanga pinggan. Ja na get manyuruon iba domei mangan rinso i pinggan ato i cambong. Ded ma iba i. Gari balau antong ibaen kalai peresna sanga pemutih mardomu dope ilala. Mocom...

Adong muse tong peres-peresna di supermarket i manabusi barang-barang nai tontuon ni alaiumpamo 100 ribu marhadiah minuman umpamo karating daeng. Napabahat-bahat balanjo naso porlu dodai. Jia ma mungkin gratis i inumon nai, madung i pagodangnalai dei mambuat untung di barang pangkal nai anso tartutupina peres nai. Manombo na momoan halak kita i hona paoto-oto tele, iambang ia ma na pamurabarang nai tabusi nia i benna madung adong i peresna nong-nong on.

Di jaman gadget ato hape on tong nai rangsang muse ma halak on dot hadiah nasonian. Na dodasna hadiah di tutup ni inumon tarsongon sosro dei sanga cocacola. Adong mei na mamborong sampe 10 karat bage inumon i benna marharop i, pas i paksa ma minum i tiop ari asal get minum. Sampe habis minuman na, ampe le hadiah minum gratis maia tarsapulu peresna. Na ngok mada bope mang minum tiop ari.Adong muse hadiah mobil di bungkus ni popmie, marsiborong mardus rumah tangga i. Madung manceret kalai sude na mangan mi i sajo paling ma hadiahna ato peresna mi juo. Na sodong dope dabo dapot carito iba umpamo balik pangalen ni hadiah nai, misalna manabusi helem berhologram di Honda, laos mulak nai maroban Beat peresna.

Imaputona, nga nangkan nara parusahaan i marugi gara-gara ni peres. Hita dei na maotoi palua epeng bahat marjudi peres. Dung habis epengta, laku bahat produk nalaii, halai mantata, hita tangis tarutang-utang balanjo na mubazzir.

*telah tayang di FB Feb 2014