Oleh : Darwin Nasution
"keta pelayangan tu Aek Nagairan, targan so ro beko i"
Aha ma niroa asal hata ni pelayangan non na donok tele. Arti ni on di Mandailing Julu ima pala adong dalan naso tarlewati kenderaan harani dalan nai sandiri magotap, ato jambatan na mayup, atope dalan i itutup tano tolbak na maronco ato masur-sur. Dalan na gotap, jambatan na mayup ato tutup harani na maronco ngun dolok i manjadi ma pelayangan istilahna. Sanga ruai kehena pangartian tu pelayanan.
Harana, pala payah ronco nai ato gotap dalan sanga jambatan i, memang kon nai layanan ma penumpang ni kenderaan atope motor-motor na tarambati. Manyadiohon mangan na mura, anggo adong gari anggaran ni kacamatan nai konna gratis doma. Manombo dabo na pas-pasan do biaya pardalanan ni panumpang on songoni juo sopir dot kenek-kenek ni motor-motor i. Segala ma sude anggaran balanjo ni alai pala tarambat di dalan. Get mambatu pe sudarona ngun na dao umpamo nga bisa benna tambat i, songoni juo toke ni motor i nga bisa manolong supir dot kenek nia i. Partolongan ni masyarakat na isian maia na topekna gari, samalang tidak indahan gari ulang magodang tu argana. Padean pelayanan na deges doma sugari lehenon di alai.
Konsep pelayangan di Mandailing Julu mangarah tu pungutan do kehena. Di paias masyarakat i mantong tano nai dalan i marbahat-bahat sampe bisa i lewatan mulak. Pala dalan na gotap ibaen kalai baronjong batu so marsambung ato mabolak mulak, atope jambatan batang karambir anggo topek pelayangan nai jambatan na mayup.
Salose dikarejohon kalai, lewat ma motor i margeler, i paidoi sadalak mei ngun rombongan ni masyarakat on epeng tu satiop motor. On ma mungkin pelayanan i. Ilayani halak kampung pature dalan dot caro paias sanga patopi tano nai, ilayani parmotor i muse halai ganjaranna dot epeng upa loja.
Atehe benna sili do mungkin ucapan ni alak Mandailing i so ke saro na tu pelayangan, pelayanan do asli dot nyatona. Mambantu mangalayani halak na dompak tarambat harani dalan na sego.
Deges dei nian anggo na saling butuh do. Parmotor dot panumpang i pe ngara alai i marlolot-lolot tarambat harana martamba biaya i dalan. Mangan umpamo madung inda ture be argana, manombo paksa doma itabusi alai bope nga sasue dot selera. Asal ulang male maia na tama dokonon, goarna tong pelayangan. Bahatma dukana di na tarambat pala adong pelayangan. Marduka muse dei masyarakat i adong pelayangan tai tibo-tibo ro beko ni kacamatan manigor paiasna, nga lalu mandapot epeng upa mangkais. Boti mada...
0 komentar:
Posting Komentar