NA MUTUK*

Oleh : Darwin Nasution

On da ira-ira hata na tarpili don manurut selera ni panulis, mandok jolma na urang sehat don pikiranna. Songon ungkapan na di ginjang i, pala na lau urang sehat goarna na rintik, pala na madung dalam na lalaen ato na mutuk. Di zaman na manobusi suaro di na pamilu on pe ninna ubege nabahatan juo do na mutuk pala nga monang, sapaling otikna rintik. Anggo mikim-mikim dope songoni marpupu sado-sado ia hum na rintik dope i, tai pala madung mangarambani sanga jangjang ia i topi dalan i pado adat madung mutuk mei, konna ipamasuk domei tu Rumah Sakit Jiwa (RSJ).

Taringot di RSJ on adong on di luok Menteng Cilendek Bogor. Peringatan 17 Agustus manombo isuru dei marbal i lapangan nai. Nakaru mada ninna. I cipak ia bal i nga binoto ia sangan tujia kehe, homang ia, baru ihantam ia mantata dung ro mulaki tu lambung nia icipak donganna. Manggolkon tu gawang nga marimbar sanga tu gawang najia, sagiot saroana, na mutuk mantong. Kadang iciop ia bal nai ihaluk ia, i cipak tu luar lapangan sampe hona kantor ni rumah sakit i, inda markatontuan be, ujungna martata mei biasona inda marnot, sagogo-gogona, sanga sajia onok giot ni na mutuk on.

Adong muse dei antong carito di cyber satontang na mutuk on tile. Hatia i bocor ban ni rombongan na mutuk. I buka supir on mantong baut ni ban on opat. Nga dapot rarena, inda na isangajo imana hona senggol mada baut na opat on mardabuan tu rura an, ecekna nga tarjalakan nga kan dapot be. Poning ulu ni supir opat-opatna mago. Di poning dot busa-base ia rupo nadong anta piga halak na mutuk on parate-ate on ia, bulus mangecekma sada. "Pak supir, buat dabo ngun ban natolu nai nadong i dope lengkap baut na, satiop ban sada jadi dapot tolu baut. "Tahan dei, dung tolap non tu kota gonti mulak", ning na mutuk i. Heran supir i, "Aso na mutuk mangajari au, na botul don dongan na mutuk", ningia asok tai tarbege jalai. "Botul do ita memang na mutuk, tai inda na oto songon pak supir", ning na mutuk on tibo-tibo, damos doma ilala supir on. Madung na lolotan mon halai di RSJ, adong-adong mon kisah nalai na jadi bahan carito.

Sakali i parkir doktor RSJ i ma motor nia i lambung parmayam-mayaman ni na mutuk on. Motor nia on model-model ni Ferosa ma, adong di dinding nai tulisan 4x4, maksud na nina opat-opatna roda nai bisa manjadi roda penggerak. Ida na mutuk-mutuk di matematik niroa. "Na oto ma doktor on hum 4x4 nga dapot ia", ninna ma dabo. I buat na batu na pincur, i tuliskon na di ujung nai =16, jadi lengkap tulisan nai dinding ni motor on 4x4=16. Lau mulak doktor on tarsonggot jangkir-jangkir nia motor na mulus nai rawat madung adong mandosdohoti parkalian na isian. I pajiar ia songoni, paling mei pasien niroana. I patureon ia motor on sasue asli nai, tibo muse ma tugas tu sadun. I parkir i tempat biaso, nida na mutuk on mulak 4x4 nai. "Sangajo nga hum naoto la a doktor on, na koras kapala juo do", ninna mungkin si mutuk. I tambaina muse 4x4=16. Di na mulak mur heran doktor on marulang mulak adong mambaen sama dengan(=) di motor nia i. Ah ninna  lau mopeng-openg. Pas manyervisna i pabaenkon doktor i doma stiker 4x4=16 langsung i tempel di dinding nganan na biaso. Aha ma na tarjadi dung praktek ia mulak tu RSJ an, parkir i pojok nabiaso? Ni ida na mutuk langganan manulis i ma madung lengkap 4x4=16. Lek ibuatna batu pincur i, itulisna i toru nai "HORE DOKTOR NA PINTAR!!! 2X2 SAJIA DEI DOKTOR ???". Sambang kaji, malala motor. Rupona botul hum na mutuk do, inda naoto anggo markali-kali matematika.

Dung salose tugas sadari i, get mulak ma doktor on, ida ia tulisan i na get tangis daro doma ilala ia ben ginjangna magar-gar cet nai sakali on. Anggo nga benna mabiar idok kalak na langkot mutuk nai naget marguling-guling doma ilala doktor i i aspal alaman ni rumah sakit ben holas dot sedihna ilala ia.

Na masalah mutuk mantong, biama ningiba ... sobar ko doktor...

*telah tayang di FB Mei 2014