Oleh : Darwin Nasution
On tarsongon in memoriam don sian sada murid na mulak malungun tu kapala sikola (derektur) esempe na, ima apak Ruslan Nasution (1937-2014) di SMPN 1 Kotanopan Madina na madung duluan mangadop na Maha Berkehendak Allah SWT, innalillahi wa innailaihi rojiuun tanggal 10-8-2014 di RS Columbia Medan ma beliau hona sitohukna manungtungkon nafasna na pangabisan. Sosok na madung mangesankon mampu mangalehen keteladanan di siswa-siswana, au majolo tong secara pribadi, ato secara umum tu saguman na markapontingan tu sikola, bo ia guru, staf, atope petugas-petugas na asing. Adong ni beliau sangat dirindukan di kalas najolo, harana pala manggontion guru naso ro pasti mei jadi ajang wawasan tarutamo saputar bahasa Inggris keahlian ni bapak on, pengetahuan umum sosial, sejarah sanga geografi dunia umpamo, malapat-lapat mei tu olahraga satontang marbal sanga badminton. Bahasa Inggris ulang be dokon, mareor-eor domei lafal nai di lisan ni apak i ben pasna hurup nai. Rindu mantong iba dung sampe boa-boa siluluton nai, taringot mulaki di kepemimpinanna na jeges dompak mangelola SMP favorit di kacamatan Kotanopan, ima SMPN 1 on. Pas ma apak namion pala tu tujuan umum ni pendidikan nai loncengkon ni pamorentah manjadi ujung tombak ni perbaikan pendidikan melalui esempe on.
Kapala Sikola ato derektur esempe na ideal na mamahami administrasi pendidikan, tarutamo pembelajaran dohot sadenggan-dengganna. Inda i pajiar apak i adong kalas na kosong sahinggo tarjadi keributan disi benna so adong i guru harani na marhalangan. Mampu jelas apak on manjadi sahabat baik di guru-guru bope murid murud nadong di sikola i. Adong namangilak inda dot upacara umpamo tardapot—contona waktu i Andesta dkk ngun kalas III3—ngana sena jabat i pung-pangkon apak i i ba. I pio mei donok tu tiang mandera i, ibaen upacara kecil-kecilan dot iawasi apak i, puncakna manghormat mandera mei taronok, angkon na turun ma ning apak i baru turun tangan nai. Kehe bage jolo apak i tu kantor sanga tu ruang guru, anggo na hona ukum lek hormat tu mandera i. Dung lagak wajar ma ilala apak i mungkin pangonoknai baru madonokma tusi, turun ma ato tegak gerak, durasina tarsatonga jom.Ngadong jabat na kaboratan i nai ukum i, angke um upacara satonga jom maia nga sobar be na get marmayam on sajo tu Pak Ijo an, lau mangarsik niroa. Guru pe pangidaan niba secara umum ngadong i jabat na mangojik patidahon inda sonang rohana tu apak on, patuh dei nida sude tu perintah songoni juo staf dot honorer. Tarkelola sude komponen di sikola on, marinteraksi dohot denggan. Paham do nida apak on di managerial pendidikan sian pangalamanna, bope mungkin ngana ungada jabat i sikolaon i secara formal.
Mamunpun do pandanganku tugas ni derektur i apak on ima enlight, educate, empower. Tolu hal on ma na mangalahirkon siswa na mariman,marelmu dot mamikirkon masa depan. Mampu do apak on mangadongkon pelayanan pendidikan dan non pendidikan na paten tu siswa. Inda i lewatkon apak i mangikuti wawasan keislaman samisal musabaqoh, bope dao misalna tempatna. Huingot dope waktu i manjadi utusan ma au Darwin (II2), Aswin BB (II3) Aspan(III4) dot Siti Aisyah (III4) i dampingi apak i dot ibuk agama na ngen Hutapungkut i, ikut menyemarakkon MTQ Tingkat SMP di Natal pantai barat. Pala ibayangkon maso i taon 1984 lau tu sadun pe ngana mangaropkon angkutan umum ibe, nga angkan adong, nai sewa ni apak i domei mobil dinas ni Camat Kotanopan, ibond sopirna ngun ALS an. Adong kekuatan na tangguh marpikir copat (surotul badihah) di apak on sahinggo dot sude kegiatan bope sulit. Na lain masuk juo dontong hami ajang seleksi penerima Beasiswa Proyek Pelita siswa-siswa terbaik muloi ngun kalas 1 sampe kalas 3. Mandapotma waktu i au dohot Edwin Elpian (III2). Bahat dope kegiatan na lain na mancerminkon pemikiran ni apak i ulang sampe kaderetan SMPN1, manjadi patron do malah di saluruh kecamatan Kotanopan.
Salain ni i, derektur nami on antong kukuh dau i manyaksion bahasona beliau orang na terpercaya, ngadong binege sabangso pihakna markaboratan baik masalah epeng bope masalah manajemen. Juo mardedikasi dei imana sian ghiroh mangajar, amanah di kepercayaan ni masyarakat sebagai pemimpin, sareto terbuka inda mangonjapkon sanga aha sajo peluang na bisa maningkatkon mutu ni siswa dot guru nai pimpinna. Tercerminma kharisma na kuat na manjadi modal sabalikna di imana mamuaskon halak na bahat on di pendidikan, khususna di esempe on.
Tontu mancapai i sude porlu dei daya juang na tinggi. Pursaya au semangat sikola ni alak na lahir targan so mardeka i dope on bo. Bope menek dope apak on mungkin hatiha i madung marbayang don susah na terjajah i, jadi pandidikan doma na bisa mangarubah i sude. Laluma songon secara umum halak najolo na mangurus sikolana sandiri, marpangalaman maia tong bope nget mangurus halak na bahat saumpamona lingkungan ni esempe on. Terpatrima adatna muloi menek kepribadian na jeges, kerendahan hati, dot keluhuran budi memahami kerasna perjuangan pendidikan ni alai najolo i.
Mampu ma apak apak derektur nami on melayani sagalo stakeholder ni SMPN1 dohot saponuh ni kebaikan, inda ungada au mangaligi sabalikna mangido ilayani. Madung tanom mon niroa di bagas roa ni apak ibahasona hadiah ni kebaikan nai tanom adalah melakukan kebaikan i juo.Tarjadima sistem na sinergis tu nai pimpinna na manguatkon visi ni imana tu kebaikan ni esempe di masa depan.
Di bidang na lain umapamo, derektur na ideal antong apak nami on mampu mandorong bawahanna manamba elmu. Dodas mei binege adong guru-guru i na kehe panataran sabulan tu Medan sanga tu Sidempuan. Adong musentong binege na kuliah jarak jauh marpupu i Kotanopan, marpupu tu Sidempuan tarsongon ujianna. Adong nida arahna tu manciptaon pamimpin-pamimpin nabaru dung beliau tokinnai. Tarbukti mantong manghampir jadi kapala mei balakangan on guru-guru senior didikan ni apak on di SMP-SMP sekitar, dok ma jolo pak Iskandar, Pak Khoir, atope Pak Sedan, sabatas na dapot ahu infona. Imada buah ni kepemimpinan ni beliau i, jadi markapasitas bawahan nai manjadi pemimpin muse berikutna.
Oleh karena itu, botul mantong nidok angkon disiplinan dei kapala nai pado sude guru i, so marbobot sikola i. Madung nyato don di sapanjang pangabdian ni beliau marpulu taon di SMPN1 Kotanopan. Konsekwen turos manorus ato istiqomah, memiliki komitmen nasodong matena untuk kemajuan, madung terpatri mei di apak nami on, tarbukti di murid dot guru-guru nai pimpinna. Komitmen na tinggi untuk maju.
Di samping ni i nida, adong kemauan na kuat di apak on manjadi derektur na marprestasi. Cuman maso i inda songon sannari gok na penilaian dot hadiah. Anggo adong ruangku maso i, monang sajo dei derektur nami i. Tarida visi na jelas mambangun sikola i tarutamo di disiplin waktu. Outputna antong dung i siborang tu bariba nai muridna tu SMAN 1 Kotanopan kabahatan satiop angkatan lek na pioner juara mei ngun SMPN 1 on.
Akhirna, madung jelas mai di pardalanan ngolu ni pak Ruslan derektur on kemandirian, tanggung jawab, profesional, jiwa besar, tidak otoriter, bisa membimbing i pargaulan teman sejawat guru, dot transparan di panggunaan epeng ni sikola. Hal na ponting madung tarida di keseharian ni apak on kepemimpinan na kharismatik sapanjang ni kapamimpinanna di SMPN1 Kotanopan. Semoga menjadi amal yang diganjar setimpal oleh Yang Maha Memberi. ***
*Salam takzim saya kepada anak-anak beliau Farida, Linny R, Aisyah, Uba, Nasir, Ali, dan Dohar, mudah-mudahan tulisan ini dipandang proporsional gubahan seorang muridnya--Darwin Nasution--yang turut merasa kehilangan besar atas kepergian beliau. Semoga spirit perjuangan beliau menjadi kepribadian yang sama di kalangan anak-anaknya, teman sejawatnya, dan seluruh murid-muridnya. Aamiin. Tulisan ini telah diterbitkan 14 Agustus 2014 di FB dengan judul In Memoriam Apak Derektur
0 komentar:
Posting Komentar