Oleh : Darwin Nasution
Takhayul, datu, jampi-jampi, pining-pining dohot ritual na gaduk-gaduk madung manjadi bagian ni sepakbola ato marbal. I luar tarutamo i Afrika dot Amerika Tengah an anso monang inda samato marsandar tu taktik, teknik ato kualitet ni parmainan. Di Indonesia, tarutamo partandingan antar kampung (tarkam, tarkadang kaki ayam) adong mei pulungan daro ni manuk so songon naikoyok kiper nai inda mardayo umpamo, koncing, miyak ni ambeng, pira manuk satonga masak, saraor sembad, ronggur dot udan, bisa ninna mampangaruhi hasil ni partandingan. Na mocoman i ra dei tiop kampung marbeso pulunganna.
Adong ma daro ni manuk isuan di tiang gawang ni musu nai, i gawang nalai i baen ma karak na madung i doah ni datu nai. Adong muse tong di gawang ni alakan i baen miyak ni ambeng tu tiang gawang i. Daro ni manuk lapanna son nai dok nangkinani so songon manuk nai koyok kiper nai lomah inda mardaro, busbas mei gol non masuk tu gawang nia i. Songoni juo mantong miyak ni ambeng, makasudna dung i jampi so cilat sajo bola i pala manangkis tembakan ni penyerang laon nai. Ato pangartianna landit mei sude sakitar gawang on sahinggo mulus doma bola i lao masuk. Tu gawang sandiri karak mantong, maksudna ambat pir ulang nangkan na masuk bola i tusi. Songon jia pala dung satonga main, kan margonti gawang. Biasona adong mei daganak na menek nai suruon mangkoncingi gawang nai tinggalkon dot gawang nai tuju so ipasang ajian nangkinan mulaki di gawang nai. Tarsongoni mei porang ajian di panjago gawang i di itaan Mandailing.
Adong museng tong penyerang nai ulang marsaraor dalam. Lapatanna ninna songon jia lincahna gerakan ni bandul na dua i na parsaraoran i, songoni ma nangkanna lincah ni bola i igoreng ia. Adong muse dei panudu na disi sanga tu arah jia do cocokna i sipak bal nai so manjadi gol. Adong dei ninna panyerang on manjadi top score torus harana jimat ulang marsaraor dalam on. Songon jia tong ibaen, ngada sena tarpaksahon alak na marbal ulang naso marsaraor dalam. Mungkin panangkalna angkon adong dpmei pemeriksaan ni wasit angkon na marseragam lengkap tarmasuk celana dalam, baru sambang ajian i.
Adong musentong hapursayaan ni parkampung-kampung anggo pas main nai ro ronggur dot udan bakal monang. monang mei non Patialo dot Simandolam anggo main di cuaca na ekstrim songoni. Secara alamiah alai madung pursaya bahasona i inda porlu ihabiarkon. Madung menyetu do halai tong dot alam mamolus harangan songon jia landit pe marboban inda jabat cilat. Apalagi majolo um na marbal, mur makuat malai i anggo ro udan dot ronggur. Ngan aporlu jalai be pining-pining jabat ro udan, mang hambar ning pangartian ni alai pining-pining jabat i siram udan. Jadi kekuatan tubuh alamiah domei na main disi. Get mambaen kompetisi so ulang kaluar kakuatan ni alai on ben di musim logo. Taringot au najolo pas cerah cuaca ibante Sibanggor ma Simandolam 4-0 di Tobat bolak Singengu, padohal anggo udan na monang sajo dei alai disi. Ato Patialo kalah torus di Kuala Lumpur anggo mainna di las niari, lain anggo ro udan.
Adong muse ritual mangan pira manuk satonga masak. Pira mauk naon madung "i isi" datu i. Pira manuk na madung mangandung protein, vitamin, atope gizi na lain na jeges mamparkuat otot, i jampi muse dope tambana. Biasona on kaluar pala partandingan masuk tu adu dua bolas pas doma. Tai kan, bahat dei pemain i inda ro roa nia manganna baen angirna. Bisa mambaen moak sanga muta-uta.
Madung loja-loja tong isuru muse dope mangan pira. Na get manendang pinati tong marusaho maia mangan na sasue pangisuruan ni pelatih dot datu i. Bahatan na kaluar do mulak manjadi uta. Adong antong na get manyipak dua bolas pas on inda giot ia pira manuk on. Tarisinggung songon naso iargaan, iompongkon datu i sude piramauk parsiapan i ijolo ni tim kampung nalai i. I sumpaina muse inda kan na monang bei i partandingan i.
Datu i botul! Tim desa nalai i kalah. Tolu penendang, dohot pat na goyang dot lunglai, gagal pamasuk bola. Harani goyak na roa nia, muloi dung i ninna inda ungada be monang kampung nai i i turnamen tarkam sakitar.
Sabotulna inda ben harani datu i i, benna lemahna dei disi latihan stamina dot gizi pemain, jadi inda tahan main 90 minit, palagi 120 minit tamba muse dope dot pinalty. Anggo marsandar tu pining-pining non na syirik domei, anggo i panontuna. Cuma nasononan sampe sannari nda pe ra mago ngun sepakbola Mandailing baik main di Aek Galoga, bope main di Mompang. Ngadong i sude sport ato olah raga semata dei, pining-pining go out.
0 komentar:
Posting Komentar