LOPO PARAPAT*

 

Oleh : Darwin Nasution

Ngun judul nai ianggan kalak don bo na get mancaritoon kota na i topi ni dano toba an bo. Intong non carito toba sirek-rek domei, inda dong hubungan na on. On kisah ni alak sakampung don di sada lopo parmangangan atope lopo kopi di Tamiang, goarna nibaen nampunasa nai PARAPAT. Inda di topi ni dano, itopi ni baba bendar do di aliran ni aek Batanggadis.

 

Kampung on ira-ira 7 km sian kacamatan Kotanopan tu arah timur. Tiang kilometer nai tong pas mei di jolo ni bagas ni warga, bagas ni alak si Parimpunan goarna. Tar 50 meter ngun kalai i ima poken Tamiang, adong dei disi balerong tando ni poken, ari na ima Sinayan. Lobi urang 50 meter nai muse tu timur juo, isima lopo Parapat i, itopi aek i isamping ni musojid Taqwa goarna. I lombang ni lopo dot musojid on tapian ni alaklai, di jae nai tapian ni adaboru nai ambat-ambat dei pangantara na dot bulung karambir nai jalin bolak.

 

Mulak tu Parapat, na mocoman kuliner disi apalagi ari poken Tamiang, sinayan. Adong mei indahan, gule manuk kampung nai sale jolo sotik baru i rondang, adong mie lidi, miun kuah hasang atope kuah ayah, adong tahu kuah hasang juo, gule gulaen ihan mas, ihan sale kuah gorcing liut, inda lupa gule bulunggadung limbat pangaroncana. Benna sada i maia tong disi lopo mangan cocok juo mantong ilala, tulang nibai majolo natama dokonon, ramina pala poken. Tusima hampir parjagal na ngun hutalambung mangan sadari i, sampe martutup poken di kotu asar. Oni, halak na i kampung i pe nabahatan i na lentak ben ari poken, inda ra i be langsung mulak tu bagas mangan na i pamasak ni adaboru nai ma inte, manggaya mei jolo sapalat mangan di Parapat. I tampulkon mei jolo sotik nai daek i tu indahan na marlemak kuah na di lopo on.

 

Pala sabangso dongan ni kopi ato tes, adong juo tong, songon goreng pisang, goreng gadung, kue-kue, roti-roti na menek,ato cocok juo ma mungkin mie goreng marlasiak buatan ni nantulang i. Na bahatan i na marlangganan juguk lolot isi pala sinayan, umapamo si mail, ginda, kari, uwin atope si cuang. Na laos mangalanditi bagen dontong mungkin deba niet na tusi. Adong dabo isi na manarik umbaen goda-goda on.

 

Aha male na manarik i, imada boru tulang niba isi dua halak meli dot nalis. Manombo tong bope nasikola dope tugas utamo ni alai, lek ro juo dei mangalayani tu lopoi sasakali. Imada manombo naso tarsarion kalai i da. Na sinang-sinangan bujing-bujing kalas tolu dot kalas dua esempe on, na bontar muse tong ulit na. Na i sajo domei suit-suiton nalai, atope perli on sotik-sotik. Ramah muse dontong, cocok juo ma alai dot orang tua nai karejo ato parusahoanna marlopo.

 

 Tambana, aha ma na mambaen iba dot dongan son na ilem manombo isi. Na anginan isi, marombus angin sepoi-sepoi maraek ngun baba bondar nai toru nai. Jadi sonjia milas pe iluar ari i, anggo isi borgo dot lomom. Angke taru na sihit doma lopo i, dot musojid nangkinani tu aek i, na magar-gar dei deba manombo pala i tojan aek na magodang topi nai, tai inda nian ungada jabat mayup. Anggo mayup antong sonijia dei baya nasib ni boru tulang na dua i.

 

Lek tu boru tulang i juo do ujung na. Olat ni carito domon da. Angke mang tu bagasna malai, nasodong do lalu tukang epek bin perli na isian na i uhumkon nalai. Alak kuta i naso marlangganan tusi do mambuatna sada, halak huta lambung sada. Tulang i dot nantulang i, sampe hubaen kisah ni Parapat on naso dong be jau habarna sanga nadong dope i. Oni adong disi, lupa sotik, ompung niba ngun nantulang i, ompung parjagal pel dot adaborunai mangkehe mei purjolo. Bagian persobanan dot panait api, tola idok na mangombus api dot inggung-inggung di dapur sasadari, tapi inda dot marmasak, ima na manolongi disi si sabatang kara amantai Jamil. Sarupo juo do kabar sanga na mangolu dope, inda be tarbonggal.

 

Ninna hubege anak na doma disi, anak alaklai nagodangna, inisial na si ka-er, na manoruskon usaho lopo mangan dot lopo kopi Parapat on. Generasi padua na, dapot carito lek rami do hubege, tai inda dong be dayang-dayang na paalo-aloon ni jara-jara naro tusi. Nga soni ma carito nai mail, ginda...homu nadua do najot-jot mulak kampung. Tambai homu dot komen da. Saima hatana...

*elah ayang di FB Maret 2013