JAMONIS*

 Oleh : Darwin Nasution

Aha do na masuk tu pangartian ni dongan-dongan jabat idokon monis. Sabotulna ima panipulan ni danon pala manyege danon nai duda atope na marbuapak dope sotik i tabusan i pasaran. Jadi pala marsege iba danon panipulan, ato danon na pondok i pajolo sajo mei marlojong tu ujung ni segean sanga induri nai. Totop manjolo-jolo i, amben na nayang ia ngun danon na lidang ibul i dope. Kiasan don sabotulna pala madung idokon jadi jamonis. Ngun ungkapan “manjolo-joloi songon monis”

Hatia andigan mon manjolo-joloi jamonis. Adong kalak na mangecek non di lopo i, atope di alaman bolak sangape parpokatan, ro maia on masuk na ia doma botoan, sahinggo nganan dot mik i naisia doma jolo anta sajia-sajia honok. Adong muse tong mancaritoon satontang keluarga umpamo na monang sikola tu doli, parjolo dei ia mangalen hobar tu keluarga nai pado anak sanga sudaro nai mangalen habar. Ato mangumumkon aha namasa na muba di RT di desa, ato di kacamatan um ngada naia doma botoan targan so ro kabar nai ngun petugas ni pemerintah. Itakik daek ia dei sanga ngun jia sajo pangecek an, so ipajolo muse manyebarkonna.

Inda na ro roa ni alak antong na songononan di Mandailing. Na martamba muse dope goar nion dot Jaleder. Angke um ngada nai sia sajo doma jolo mik i ijia-jia manyampehon kabar ni alak sakampung, atope na ngun pamorentah, tapi ba nga na juru bicara resmi ia. Tarsongon panyakit domon ruangku Jamonis on, anggo nga mangalederi manjolo-joloi barita inda na sehat ruangku ilala ia be i.

Alaklai don nabiaso na manjadi jamonis on. Anggo adaboru si utek monis dontong gelarna. Sarupo do jaot nion, penyebaran berita nai maia na marbeso. Anggo jamonis audiensna humbahat ama-ama, poso-poso sanga alaklai ma umum na, utek monis rato-rato tu kalangan adaboru maia marmonis i i tangga-tangga i.

Mocom tabiat i anggo i Mandailing nimu kawan. Anggo i reng-reng sada-sada masuk mei jamanis, paraek dolok, pangalap panaruon, atope jamonis on. Lain waktu anggo dong dope umur ita caritoon mulak sada-sada. Botima mada jolo tie ...

*telah tayang di FB September 2014