Oleh : Darwin Nasution
Anggo najolo na bahat mada proses ni eme on dung malamun, cocok ma panenon so sampe tu bagas. Adong proses manyabi-marbunbun, adong mardege-mangangin, adong manjago eme i karung targan so dapot geleran itaru baru i angkut dot padati, baru ma sampe tu bagas. Madung hona potong i deba proses nai, madung adong mei na bisa langsung muli sadari i. Songon jia mei ruai?
Anggo najolo tong soni ma tie, isabi jolo eme i sasaladang, marajian manginum kopi tonga ari, baru madung kotu ibun-bunkon. Bontukna songon lingkaran, burir ni eme nai i bagasan. Manghindari bahat na sar-sar i baen mai alas amparan i parbunbunan nai. Incogot nai dope baru i dege on emeon so mela ngun batang nai, ato ra sampe 2 tolu ari nai anggo ngadong dapot dongan upaan ato marsialap ari mardege.
Dung tardege sude eme ondi ginjang ni rinti na marpantar rangkak sapas lilis ni eme, baru mei iangin soias mela sude kotoran dohot eme na lambang. Adong mei sepesial mandabu anginan ngun ginjang, adong tukang sapu i toru. Marsarak mentong dung hona angin kotoran dot eme na porngis i. Dung soni dope baru masuk karung so i pasuk-suk muse jolo tu sopo i. Dung salose sude baru ma manjalahi padati ato dung tartuson sotik manjalahi becak sanga motor bon mangangkutna. Anggo becak dot motor bon i i painte alai mei di topi dalan sampe tartaru sude eme ni alaki. Di joman padati i painteon jolo marborngin manombo i saba an, sampe dapot geleran ni padati mangoban eme hasil panen on.
Mang hita ida i proses nai so lalu tu bagas anggo na ingkani. Ra sapoken so tolap tu bagas harani targantung tu tenaga ni manusia sude. Paling top mei waktu i dua ari, sadari manyabi marbunbun, sadari mardege-mangkipas, ima generasi naro dung nga aru dong be mangangin, madung adong teknologi tepat guna paias eme i. Dung salose mardege ikipas, bahkan bisa rap rim, adong na mardege adong na mangkipas di sampingnai, salose degean, salose kipas on, adong muse na manarui na sada-sada tu becak ato motor bon nai.
Jia ma hudokon sadari pemuli eme i. Adong mobilisasi tenaga kerja na umbahat. Adong na manyabi eme sajo marlima halak na gogo-gogo, dot manaru sagean nai lain muse tu alat namaniadahon mardege dot mangkipas, ima robot ningkalai goarna. Ioban ma eme on turobot an dung isabi so langsung i pisahkon ia eme na denggan i dot kotoran nai. Langsung mei dung i bisa ikarungkon. Adong mantong tenaga pengepakan muse di lambung robot nai na ngun iba halak na. Markerer muse ma ibuat tukang taru nai sada-sada tu motor an lau ietong hati-hati nampuna eme on sanga ma piga karung marangkat. Salose sabion, biasona na salose muse mei robot on, salose manaruna, siap marangkat motor nai maroban na tu bagas nampuna eme sadari i juo. Kon namadung i tata dei memang manajemen waktu nai dot halak nai tarutamo madung ipesan robot nai anso ra ia painte sabion langsung tu robot. Ringkas, iagoon na ma marsialap ari ima jatna, tenaga ni epeng doma sude.
*telah tayang di FB Nopember 2014
0 komentar:
Posting Komentar