BANDOL, IKON KOTANOPAN*

 Oleh : Darwin Nasution

Pala adong kalak na paling dodas mandege-dege Kotanopan na ingkani hahirasanna dope ibana, ima bang Bandol. Sampe sannari songon pandok ni kahanggina Ahmad Kamil Parinduri@ na lek sehat dope ninna tukang pio "morsip, morsip" on pala dompak manengget motor na menek ia mangaraun. Na biaso halak kalaian juo dei nai tompang nia i na padotkon i, adong parmotor sasabagas dot par ALS-Marsel juo, keluarga ni alak si Paten di rambin Hutadangka.

Sabotulna bope dodas an do ia di Kotanopan halak Batam (Bariba Tamiang) do memang si Bandol on. I pasaran ipio alak ia si Bandol, manombo baya idok kalai muse dope si tuaek i duhut lau paalo-alona, dung mangamuk baru marlojong kalai. Na sep an do ning kahanggi nai goar nia da, si Hamdi mararti pujian. Memang antong na puji-puji ni alak sajo mei ia pala dompak i motor, pio-pio marsianyang ato paalo-alo on. Sudaro nia adong muse dei si Piter dot si Kohol goarna. Hombar banjarna adong muse parjagal es goarna etek Turok, on pe nai palalo ni anak sikola i sajo mei pala lewat rambin Hutadangka, Batam naidok nangkinani, kampung na pas i bariba ni Tamiang.

Pala madung i ginjang ni ALS sanga Mawar Selatan (Marsel) tirip Kotanopan i ia na patidaon muko sajo mei,...mangalap-alapi juo doba ilala sotik so ipalalo alak. " Baanndoooool, bujing-bujing tadangka", ning kalaki mei tu sia. Ia pe inda beh na mangkair mei. "Oiiinang, nga jau", ningia mei ngun motor i hibul tenjuna lau mantata. " Na raaaara dai", ninna muse alaki. Anggo on ulang be nagoyakan roa nia idokon i, "Temunjiing" na ninna baegn dei manombo. Sacaro pangaligian memang tar adong do hurang ni pamikiran ni amanta on.

Benna dodas i ia di Kotanopan, oni mangiut mangaraun dot motor, mungkin jot-jot marsuo dot parhalan siluluton ni alak. Pala adong ida ia na maninggal na bulus mijur dei ngun motor i. On ma kalobian nia na ra an mangaligi parhalan kamalangan di kampung-kampung nai lewati ni motor di Mandailing Julu. Mulak tu pudi sotik, sikola ma iba taon 1980-an di Kotanopan SMP-SMA hariaranna si Bandol. Jadi tola maidok sannari umur madung mangalewati umur 50 taon manuju 60 taon doma. Anggo sannari madung jarang ninna tu Kotanopan, madung matobang ampot mang bahat na marngaolan nia, oni nga pas be mungkin bujing-bujing palalo ia idokna bujing-bujing tadangka.

Na paling goyak roa nia tong idok ia na marbaju narara, ato si partuaek i duhut. Pala dapot ia ba naisargut nia dei tangan nai, anggo nga tarsargut i tijuri ia alak nai. Mangarti ma ita anggo i tijur ia, ecekna le songon na tarjarang dei paias ipon, ampot na ra dei marun ibaenna. Na asing antong na tarida sian ia, pala madung i sargut-sargut ia bibir nia tando na male mei. Bahat de tong parmotor i na nayang tanganna mangalen indahan di sia bope alak na lain di pasar Kotanopan.

Ita ulahi mulak ima sinalobian nia, na dor mangudurkon halak na hamalangan. Salain i riang anggo cocok ilala ia panjou nai. Asal ulang idon nadua nangkinani, na marbaju narara dot partuaek i duhut. Anggo tu ikon Kotanopan olat ni pangkairan on misalna, "Ala-ala i Bandool". Ialusi ia mai,"Aha dei jaui". Ningiba muse "Bujing-bujing Tadangka". Mangalus muse mei ia "Oinang nga jau" lau mangkair ia, iagohon ia mei muko nia tu bagasan ni motor i songon na maila.

Lek hiras dope ninna si Bandol, lek tu pasar dope bope intensitas na inda sajot-jot najolo. Sada entitas na manjadi ikon sohor di pasar Kotanopan parami-ramion sampe taon 1990-an. Hiras nian torus, panjang umur di bagasan ni gom-goman ni Na Sada I. Ala-ala i Bandool...

*Nai surat ni alak Tamiang, 10 September 2014.

*telah tayang di FB Spetember 2014