Oleh : Darwin Nasution
Sabotulna ngana parjamitaan daganak di Mandailing, taruta di kampung Tamiang dot Hutapungkut najolo satotang jambu orsik on. Tor Sijanggut mon luok on, bariba ngun Timur puna ni halak Tamiang rato marlembah tu Batanggadis, bari ngun Barat kabanyakan puna ni halak Hutapungkut malembah tu Batangpungkut. Hajayaan ni eme hauma ato eme rara naingkani, gok mentong panyorin pangalaungi di kobun-kobun ato hauma i i suan jambu orsik. Sarupo dot na sannari, adong batuna na rara, adong muse na bontar gorsing. Dung sannari dei so binoto bahasona na rara i do na deges harana bisa manaekkon trombosit pala hona malaria sanga demam berdarah.
Adong sajo mentong hatia niba daganak dot tu hauma ima di natempo sikola ari minggu. Manyogot dope ari i madung marsiap mei saguman daganak na get dot, iba marhombar hauma di Tor Sijanggut an. Sapanjang dalan manjolo-jolo i sajo mei iba sian natobang-tobang ni bai ben semangat na. Tapi ba namabiar dope anggo madao tu jarakna. Aha ma so manjolo-jolo i sajo, benna tarbayang do di hauma an nangkan bahat mei jambu orsik na lamun jabat sapoken nga tusi biasona malamuni mei anggi ni nai buat poken-poken na lewat.
Pala mardonok ma tu kobun niba i, songoni juo kobun hombar niba i, marlojongi mei daganak nai tu kobunna masing-masing mangkojar batang nijambu orsik on. Nga mabiar i be ke parjolo tu kobun i harani sihirna manyargut jambu orsik narara na dayuk boti na uskus nai. Taru na bulus manaek dei mangankon torus paijurkon obanon muli naron potang ni ari baen di angka anggi niba naso dot tu kobun. Margantil mei dangka tu dangka, batang tu batang sampe tarjojoran sakobun niba i. Margambira majolo sangompot di jambu orsik i, salose, baruma manolongi manggotol sanga mangordang, targantung hatia na sanga songon jia ma eme hauma. Ato mungkin na dompak marbabona.
Songoni ma riang ni daganak di deges ni hauma dope najolo di Mandailing. Sannari ale madung almarhum mei hauma i. Dung tinggal najolo, tubu majolo sangompot padang, baru ro hayu sirih. Memang hayu sirih i bisa mambunu padang, tapi nakarasan ninna mangabisi humus ni tano. Balakang daripada tinggal, isuani halak kita i mulak gota sanga kulit manis. Hum bahat gota telehe. Hauma na isuan eme isorin dot kacang goreng on tarjadina sekitar taon1970-an sampe 1980. Dung lewat maso nai, madung jadi gota ato koje sannari, madung tartakik ma nian gota nai huida baru-baru on. Bahkan na mangarah tu gota tobang muse doma mulak.
Dung tayap hauma najolo manjadi padang apean kobun i dot do baya mate jambu orsik i. Jadi na payah dome i manjalahi jambu orsik sannari di Tor Sijanggut. Padohal, tarkonang najolo muloi do ngun Talobu Muaratagor sampe tu Aponjian di batas Usortolang an na hauma mei sude. Na parjambu orsikan ni daganak mei bope naso tu kobun, halilian dung mulak sikola. Butong boltok i ponuh monjat jambu orsik. Geleranna manyogot nai i tuaek lau mamasuna si Kamek dot do marpasir-pasir ilala ia ngun pudi. Angke nagokan jambu orsik do natuari bahan bakarna pado indahan. Marpasir ia tong...gkgkgkgkgkgk
0 komentar:
Posting Komentar