AMBASANG JABUT*

 Oleh : Darwin Nasution

Tartoho mada adong sabatang na godang ambasang jabut di topi harangan ni banjar nami i. Ambaen sodongna pilian ni buah, tarutamo polom-poloman sanga mangga-mangga an, tarsongon kuini sanga marapolom umapamo di humaliang ni banjar i, jadi ma ambasang na madabu ngun batang na sada on jadi parsiraduan. Habur dope manyogot madung adong mei daganak na oban colokna tusi manjalahi ambasang na manampuk. Songoni ma tiop arion margonti sorin na manjoloi, hum ngada niroa sampe danon ni ambasang na pangabisan pe adong paintena.

Ambaen donokna tu topi ni banjar i, sangajo daganak pe nga mabiar manjalahi ambasang tusi manyogot ni ari. Pas muse batang nai donok tu tapian rajang ni bondar dolok buatan ni Bolanda i. Hum na masuk dope ni roa habur ni ari madung matujigit ma isi umak-umak martapian mamasu abit, tuaek, maridi atope sakadar marsuop. Na get ke tu pangkal ni ambasang i lewat ma jolo tapian na rami i. Ngantong nangkan mabiar be daganak i laos tu si. Rato dontong daganak do na get manjolo i ambasang on. Pangidoan ni pamatangna na lau tubu mada niroa, porlu tarsongon sumber vitamin C. Padohal da ambasang on--bom-bom ninna i Jawa--na sotikan don juhut ni buah nai, bahatan jabut don. Tai totop isangkulit daganak i ias sampe pade doma nida jabut nai i uba baen kuas ni cet. Manombo bahat na malatak mardais-dais hona gota nai i ujung ni bibir atope di muko i. Nai taonkon nalai doma songoni, asal dapotan ambasang.

Pala ipikir sambalik na payah mada sumber vitamin di daganak na lau magodang di Mandailing najolo. Ambasang na icarito on on pe da halak puna don, ngana sipangido i be. Godangna tuntutan ni panganon bangso buah on, sampe nga marnaon be umpamo lancat, sibodak, manggis, rambutan bope na gokan tolon-tolon do, marapolom na marbatu so marbatu, apalagi mantong tarutung na ra dei nga dapotan nampunasa nai harani nai pajolo ni daganak tiop ari on. Bahkan tonga borngin dalai ke marsenter tu tarutungan manjoloi marsiradu dot babiat, babi sanga gompul nga dong be biar.

Jadi tarsongoni ma habiasoan ni daganak di Mandailing di na marsiradu buah. Marsiradu di kobun ni alak. Inda marnaon sanga buah aha sajo pe. Keadaan ekonomi deba mambaen tarjadi na songonian. Inda dong panabusi ni buah, atope parpoken nai inda tolapna jabat tu buah, pas olat ni danon maia dot balanak na. Anggo bisa maroban buah ngun poken madung sep mei, jadi marriang ni roha daganak di bagas manganna. Tai songon nai dok di ginjang nangkin, pamatang mangido zat sanga vitamin ngun buah, inda tarsadio i bagas nalai, Laluma marjajo tu gas-gas atope harangan ni alak manjalahi buah naso dompak disi nampunasa nai. Saguman na malamun na putus mei i hanyal kalai. Adong do hubege tarjot-jot imaklumi nampuna batang nai do na ibuat ni daganak i. I izinkon ia do, mangarti bahasona i habiasoan ni daganak dei muloi sian narobi. 'Iba pe najolo nasongoni dei", ninna alus. Mudah-mudahan nian sarupo cara ni alak i na mangizinkon buah na i pambuati ni daganak on, su ulang jadi boban jalai ato amang nalai tu akhirat saulakon. Na alamiah dei tutntutan fisik nai. Ulang majolo na tabo songon tarutung sanga sibodak, pala ro sihir nai ilala daganak i, ambasang jabut nai topi ni rajang i jadi parsiraduan.

*telah tayang di FB Maret 2014