Oleh : Darwin Nasution
Pala marsiajar ilmu ekonomi iba najolo adong mei ibahas maningkatna nilai ni sada barang harani parbedaan ni tempat, istilahna place utility. I rasoan ma sanga songon jia arga ni batu, split, koral sanga pasir baen pambangun ni bagas di kota-kota. Marratus ribu samotor colt. I Batanggadis nai Mandailing baya na saroa-roa mambuat do di aek i, ngana manabusi, ngana adong muse mangalarangna. I ma nai dok nangkin perbedaan ni tempat i manguba arga ni barang i. Tapi nga benna giot mamindahkon pasir dll barang batang aek itu Medan sanga tu Jakarta so godang argana. Inda. I mangabiskon energi muse dei di biaya pangangkutanna. Na paling sederhana sajo ma songoni mamindahkon batu, koral, split ato pasir nangkinani tu topi dalan sajo madung maruba nilai nai. I aek i ngadong i artina dope, tapi pala madung i topi dalan, adong na markajiot tinggal pacocok arga sajo doma. Adong barangna tinggal mangangkat doma.
Maruba nganan maruba arga. Angkon nai uba mei cara marpikir ni alak Mandailing bahasona sere maia na mararga jalahan di Batanggadis i. Dungi ungkal dompeng i sampe satiop senti Batanggadis i madung magargar ngadong be, ato payah doma manjalahi sere. Gari i daya gunahon kalai tenaga nalai sotik nai sambil pakumpul batu, split, ato koral buangan ni andaran ato dulang ni dompengi, nangkan manjadi sere muse ma mulak i. Saonok naon sayang songoni tayap mulak pala magodang aek, padohal i barang na madung tumpuk inda porlu be manjalaki. Gari satiop adong na mambangun madung marsinergi dohot pardompeng on ngun kalai bahan bangunanna. Ampot mada bisa muse manabusi sere ngun hasil nai.
On pangalaman na melalui penelitian don da beberapa waktu nalewat di Mandailing. Angke mang songon na ipilah-pilah ni dompeng i mei barang-barang nai dok nangkinani. Marrarak ato manumpuk ma songoni i pajiar padohal tinggal mambuat. Na sep mada gari anggo dompak mambangun bagas iba, marsuo muse dot halak na mardompeng, ala baya songon kantang tu manuk domei. Pucuk dicinta ulam tiba. Oban ma karanjang sanga ember niba, mang cocok sajo mei tinggal patopihon. Gedung pe tarbutuhina i ben sangkal ni bahatna pala madung marminggu alai di sada lobung pardompengan. Anggo mambayari gari sude madung marjuta-juta i abis epeng ni alak na mambangun.
Jadi on do hupikir na porlu sannari i dayagunahon dipotensi ni Batanggadis. Ulang sere na manyirlak na gorcing i sajo sena jalahan. I potensi ni i tarbatas. Oni porlu proses pembentukan na lama di dalam perut ni bumi. Anggo batu dan lain-lain i iuba ngananna manjadi sere na lom-lom namararga. Pola ma dongan nga ra kayo i baen i. Ra juo dobai, benna so istiqomah dei mambuatna saember na menek umpana samenekna sakali maridi, ra manggoki alaman ni bagas. Apalagi ma jolo umpamana manguba waktu senggang di lopo kopi manjadi waktu mangangkat pasir ngun aek an. Lolot tibuna manumpuk ato manggunung juo stokna tinggal manggadis. Ise na markaporluan langsung adong, inda pake lama songon pandok ni alak kota. On doma na paling potensial diitaan, mangubah tempat ni material ngun aek i tu topi dalan so manjadi epeng. On ma emas ni Batanggadis i sampe tu masa depan. Ape bo...
*telah tayang di FB Maret 2014
0 komentar:
Posting Komentar