Oleh : Darwin Nasution
Jambu jambak on bahat isuan ipoliaro di gas-gas dot kobun di Mandailing. Asal ato bona ni hata ni jambu on sabotulna sian sumber nai do mulo na jambu jamaika nagori di Amerika Tengah. Jambu jamaika marevolusi ma di papangan ni alak Mandailing manjadi akhirna jambu jambak. Di jawa ato bahasa Indonesia na didokon jambu bol, sabotulna bahasa Sunda do on. "Bool" bona ni hatana manjadi bol (maaf, sabotulna artina pantat), jadi jambu na mirip tusi dei ningkalai. I Bugis idokon jambu bolu, harana mungkin dot nyatona memang pala madung lamun tekstur ni jambu on lembut songon bolu. I minang sarupo dot Mandailing idokon jambu jambak juo.
Songon jia do pabahat ato mangembangbiakkon jambu jambak on. Na paling momo i paimbar anakna na tubu ngun batuna i toru batang nai. Adong sajo biasona dapot anakna anggo get manyuan tu luok na asing. I cangkok ato manempel tunas pentong bisa juo tapi tarpayah, oni inda biaso i karejohon alak Mandailing. Hum na mambuat anak na na madung topak alami do, ato patibal batu nai i bagasan ni polibek.
Buah jambu jambak on biasona i pangan segar-segar don langsung sargut. Anggo deba tong i batang nai dope madung i santap ngana jabat sibasu, vitamin dei ning daganak i bope nadong isi kotoranna. Adong juo na mambaenna rujak lasiak gulo, atope na mambaenna manisan. Tai jarang do songoni, i batang nai dope ngana marnaon be ibaen daganak i.
Harani raso dot huskus nai, jambu jambak on taboan ilala alak anggo marpili dot jambu na lain umpamo jambu aek atope jambu erang. Argana pentong um godang do jambu jambak on anggo i gadis ma sugari. Angke ngana jabat manggadis anggo di Mandailing julu, sampe batu na pangabisan pe tep ipainte daganak i.
Ulit ni batang nai biaso muse i pargunahon jadi ubat ni na mancit boltok dot guamon. Carona ima ibolgang, dung masak iinum aek nai anggo baen mancit boltok, i parsiruguhon anggo i parubat tu guam (sariawan). Batang nai na madung inda produktif be mardanon, harani karasna deges pala ibaen tiang ni sopo.
Na dodasan binege pio-pio on di huta najolo anggo dompak musin jambu jambak.
"ketae marjambu jambak tu bariba i dongan, na ramosan puna nami i",
ning si Lokot adop si Kotan.
*telah tayang di FB Juni 2014
0 komentar:
Posting Komentar