Oleh : Darwin Nasution
Madung na raratan mon sabotulna bona ni hata tara manis on da, jou halak na mamasa. Di juluan dodas juo didokon sitara manis. Di jaean marbeso sotik sitora manis. Jadi tara manis, sitara manis dot sitora manis ngada dope tartarik aha na manjadi bona ni hata na parjolo. Tai pala ita ligin bontuk ni barang atope bonda panganon nai tarsongon bonang nai paibul i bagasan ni palastik nida atope adong juo nai patumpuk di balut dot koran. Songon bonang aha? Mardonokna songon bonang sutera ato sutra. Sahinggo masuk akal ma bona ni hatana sabotulna sutra manis do bope pangabisanna manjadi pondok, tara manis.
Daganak na magodang di ari parpudi on, mungkin inda itanda halai be tara manis. Tai, anggo natobang-tobang songon si Bon-bon benna rap manis i alai pot i tandai ia dope, songoni juo mungkin dongan siandosan nia Jagulo. Najolo da panganon nomor sada don pala ke tu poken, poken sinayan di Tamiang, poken Kamis di Panyabungan atope poken sabtu di Kotanopan. Ngun bahan gulo pasir don dabo tarida na madung ilehen warnana na jambu aer. I palu amang parjagal nai mei dopet-dopet nai soro daganak i, iantong juguk ma paiteon di topi ni poken i. Satiop ro daganak i madung adong mei nasiap nida i bagasan ni palastik, pala urang itambai ia, iputar ia eor-eor nai so dapot mulak taramanis na baru.
Tarsongoni mantong anggo jajan atope panganon ni daganakon, ra mago mun ma moderen zaman on bope sabotulna ampot na sehatan do panganon najolo i. Tara manis ngadong bahan pangawetna, ngadong penyedapna. Perkembangan ni hangoluan na maniru-niru panganon kota on sajo ma bo tarsongon golu-gulo, atope inumon nai aekan na marsari manis i doma na bahat masuk tu boltok ni daganak. Mago mungkin tara manis di kampung-kampung di mandailing nai poken bope na markuliling, anggo di kota di saputar Jabodetabek marpupu dope i adong nalewat na marjagal nai, goarna ni panganon nai gulali.
Jiama so idok panganon na sehat dot sederhana tara manis on. Bahanna gulo pasir, aek dot gincu na jambu aer i caerkon i pamasak iginjang ni api. Dung caer baru mei i duruskon sotik-sotik di pantar almanium na olbung i, eor-eor na i tonga-tonga marsambung tu luar pake gagang so iputar parjagal nai. Namarputar i mangkat mei sotik-sotik markerer manjadi bahat di dinding ni pamutaran nai, ra sampe markumpul tu eor-eor nai. Dung bahatma songon bonang sutra i, ibuat amang i mai, ibaen ia tu palastik anta na sanga piga ma dapotna. Songoni ma iulaki ia torus manorus sampe mantak marjagal nai pala ngadong be na manabusi. Jadi bahan dot proses ngadong jabat i pangawet dot gulo buatan.
So adong mulak antong konna adong maei nara marjagalna. Tapi ulang suruon komu alak na mamasa panulis na mangaluarkon ide on marjagalkonna mulak. Porlu mungkin mambaen modelna so manarik perhatian ni daganak, panganon nai bope mungkin kemasan na. Na botul don ruai ngana dong be tara manis di Mandailing ??
0 komentar:
Posting Komentar