HAFAZH*

 Oleh : Darwin Nasution

Na sep-sep mada acara manghafazh (hafizh) di tivi na bulan Ramadhan i tile. Adong acara Hafizh Indonesia, adong Hafizh Qur'an, adong muse Hafizh Dunia. Botulma kitob na sampurna, ijia sajo pe ibaca sarupo bacaan ni na manghafaz nai. Inda daganak, inda na gumodang, bope na dung dewasa sarupo pamasana. Inda di Indonesia, di Pakistan, Eropa atope di Amerika sarupo caro mamasanai bahkan laogu ato irama nai. Mangarinding iba mambege basaan nalai ben paten-patenna, botul ma songon na sadaro ilala na sa aqidah i, lewat bacaan kitab suci milik ni umat Islam sadunia i.

Manombo sampe manetek ilala ilu i binahenna. Adong panghafazh na ngun Madinah--Syabab Jihad Al Maliki--baya e ngana marnida, apil ia ites sanga surat aha alaman piga, baris pa piga hon, dot surat nai tarmasuk Makkiyah sanga Madaniyah, landung ni bacaanna Allohu Robbi. Tangis au jabat boto mangaligina, iba na sah dope bisa mamandang hurup-hurup ni Qur'an i, nga santetek ni kamampuan nia i iba. Adong muse ale na ngun Amerika an do dot Inggris, payahna jadima so dapot lembaga na manyadiohon parsiajaran hafazh, lek gogo roa ni alai, marratus juo na hafaz di nagori ni kapir an. Iba baya le di Indonesia marratus doma lembagana, tai ninna etong jari dei na ra halak sannari manghafaz Qur'an, manghafaz dangdut dot idol doma na bahatan daganak sannari, bahkan manjadi cito-cito bagen. Na rugi madah tile pala ipasari-sari.

Na ngun Indonesia an taon pe lek adong dei dabo. Nga i pajiar tuhan tai i bejat sasaluok. Adong do si Musa goarna ngun Bangka umur 5 taon madung get hafaz ia ma 30 juz. Na patuh danak on tu orang tua nia, ridho nai dei mungkin n manolong ia i deba, mandapot ridho ni Allah muse. Isuru juguk sampe dua jom manghafaz tolap ia, demi patuh tu orang tua on. Nomor sada maia tong disi, di saluran tivi na ian. Finalis na lain si Aza ngun Jambi, ngana tanggung irama, itetekkon ia juo don ilungku inda sadar au ben sep na kaji nia i. Sada nai si Fuadi ngun Kupang, na malo manguasai materi terjemahan oni markharisma ning juri manjadi imom bacaan nai. Masing-masing adong halumobianna. Mandapot hadiah na pantas ma halai sampe tolu paket Umroh dot Haji masing-masing itamba muse dope epeng marjuta. SubhanAllah.

Di saluran na asing adong si Keisa na mambaen bacaan Qur'an i marmakna dot gerakan. Mambaco kitob samomo ni mikim doma i binahen ia, sahinggo bisa iajak ia audiens mangiut tu gerakan nia i, pas ibaca ia surah nai. Adong muse Sabrina na bisa manghafaz tanqis, manghapal ngun pudi lau tu jolo, bisa ites ayat-ayat sebelum nai baca nia i. Iama Juara disi, madung luar biasa penguasaan ni materi dot terjemahan nai. Ia ma mamake jubah kebesaran pemenang nai. Hadiah pe jago, epeng marjuta dot hadiah umroh 2 paket. Alhamdulillah.

Na homang hulala mangaligina pas pemberian sanad ma adong dua hafaz alaklai dot adaboru, goarna si Zaky (21) dot Fatmawati (17). Rupo halak na madung hapaz on ijalakan dei sanad ni guru nia i sampe tu ginjangan, malua ma tu Rasululloh persembahan nai, tu malaikat Jibril sampe tu Allah SWT. Na mulia ma dongan pangahafaz on ningku di bagasan ate-atengku mang robak muse mon ilu. Ilen ma jalai sanad ngun guru nalai malua tu guru-guru na ngun Yaman do rupo. Marinding iba mambege pengantar na mangalen sanad nai, na sampe do ujung na tu Allat SWT son na hudok nangkinan. Jadi mantong tukang hafaz on hampir pasti manjadi halak na baek, na pade, harana ahlul Qur'an, tingkah hidupna nangkan marpadoman dot i awasi Al Qur'an.

By the way ngape tarlambat kita on ruangku mambaen anakta, atope dirinta saotik bahatna manjadi panghapaz Al Qur'an. Di itaan gok doma pondok pesantren, niroa pantas dei gari marratus na hafaz Qur'an i di itaan. Asal ma ra na manghafaz on memang harus orang yang terus menerus berbuat baik. Ido syarat utama, so ulang habang hapalan i. Mudah-mudahan adong generasi na di itaan, di Inggris sajo bisa...

*TELAH TAYANG DI FB Agustus 2014