Oleh : Darwin Nasution
On ma parsapaan di bagasan kitob parsiajaran di sikola SR di Mandailing ninna najolo. Sanga aha pentong na muba i inda pe tola idokon, tema on manjadi basa on mon di sikola sakitar taon 1970-an tu toru. Bolas do idokon iba pe ngape na sorang i ro basa on on. Tai dodas binege manjadi bahan carito sanga siseon lau marsianyang marhuling-kuling anca hatia menek iba dung ngadong be i parsiajaran niba taon 1976. Markisar aha ma niroa muyu dongan parsapaan ato carito satontang ahama na masa na muba di Mandailing on.
Parjolo binoto jawab na tarsonggot do ibantong aso songoni. Biama tong mandok halobian ni binatang poliaroan do sian jolma ato manusia. Na ianggan do di pikiran niba satontang kamajuan na sangat ginjang satontang elmu ato alat na marhasaya saumpamo masin dompak i na masa na muba di mandailing i. Hape baya halobian ni panarik padati do dibanding halak nabahat bope na marsikola sahali.
Dompak i antong tu sikola pe na jarang dope halak marsipatu. Na marsolop jepang maia i paling kuat. Pala adong na madung marsipatu paling mei sipatu Toyo ngun karet, na bisa ioban tu laut tu darat, harana anti air dot milas ia. Tai na mamake nai biasona hodokan mei pat pala milas ari, ato maraek pala parudan, sakali ibuka ia hama na songek muapna, mandang muap kantalan. Marsamari ruangku deba adong muse do madung garabakon do pat nia na marsipartu i. Inda bedabeh mur mabucuk ma ruangku palakpak i di bagasan ni Toyo i, ima su mun ma bau anggo i buka. Jadi hampado bauan, bahatan na sikola marsolop dei iba anggo ngana tartabusan dope sipatu na ngun abit na mangincop hodok ni pat, maso i sipatu Deliwork goarna, tai na lumayanan memang argana, sahinggo nga tartabusan.
Jadi tarsongoni mada sacaro umum parsikola bope inda na sikola na jarang an do lokot sipatu di pat ni jolma di mandailing. Tai pamandangan na asing di dalan i adong na marsipatu sajo pala mardalanan. Mardalanan tu Kayu Laut, tu Panyabungan, Kotanopan,Tamiang, Morsip atope Hutanagodang. Marsipatu dei ibaen nampunasa nai anso tahan ia manompuh pardalanan na dao i maroban barang-barang gadison tu poken-poken.
Madung tarbayang ma ale di halak na mamasa sanga aha nai maksud on. Aha mantong na mardalanan tu huta-huta nai maksud nangkinan. I ma sabagian huta nadong poken na di mandailing. Anggo tu poken marsipatu dei horbo i nai baen ngun ban, halak ba belum tentu dope i. Maroban barang gadison dohot sais nai tu poken sindok i. Jia mantong, anggo hatia i pangangkutan na musohur maroban barang ima padati. Padati i biasona isaratkon horbo mei hum dodas, adong juo tong sotik mamake lombu. Jadi anggo dompak tu poken i marsipatu dei horbo. Imada na masa na muba di mandailing i alus ni huling-kuling nangkinani. "Ahama na masa na muba di mandailing?" MARSIPATU HORBO.
*telah tayang di FB September 2014
0 komentar:
Posting Komentar