ETEN-ETEN*

 Oleh : Darwin Nasution

Bahasa Indonesia na margoar kemiri. Na bahatan sabotulna

gorar ni batu ni suan-suanan on di Mandailing. Eten-eten mar evolusi ngun

beteng-beteng manjadi eten-eten, maksudna eten-eten (karas) ulitnai na lom-lom

i targan so nida isi nai. Anggo beteng-beteng antong ma manjadi goar ni gadung nai

gotap dadu menek-menek baru i goreng. Hasilna karas-karas juo maia tong. Deba

mandok tanaon, maruba ngun tanakon dei ruangku. Memang mungkin najolo itanak do

on manjadi miyak ni obuk na lobi paten. Lom-lom dot tumbur binahenna obuk i.

Adong muse sabagian mandok buah keras ato buah kareh, manjadi mohot juo dot

mangarti alak mandok kemiri manjadi bakoreh.

Suan-suanan na momo tubu don di Mandailing, bisa di dataran

na rondo, tola juo di dataran na hum gincat, di tano na tumbur ato tano na

gariang. Tano gariang ninna pangaruh ni Malayu dot Minang awalna garing ato pir

doon bo. Di tano na pir pe nara do eten-eten on, jadima i pargunahon halak

manjadi panghijauan di tano na pir-pir na urang tumbur, sabangso horsik bulan,

tano narara atope tano takok. Dijiama adong tano naso aru ra be isuan umpamo

koje ato kulit manis, i pancing majolo so mangarata sotik dot manyuan tanaon

ato eten-eten on.

Bope songoni, panggulangan tu tano naso tumbur do ia, si

denggan roa do eten-eten on. Ngantong sai nai poliaro jabat, na malampas

manjulang boti do. Hum tolu taon non na mandabu batuna mei. Batu nai mangumpal

i balut ulit luar na dayuk jolo sakali, marisi sada, dua, tolu sanga opat biji

na marcangkang karas i. Pala ietong ira-ira 50 biji sakilo. Pala manjalahi

eten-eten on tinggal mangetong bahatna i bagi 50 ira-ira saima kiloannna.

Mararga do muloi najolo eten-eten di nasodong be epengna

harana hum na manjoloi maia ngun toru nai. Mula get bahat dapot i hais-kais

sampe di toru bulung-bulung na masak i, lek martamba doi dapot. 

Ngana se aru adong jabat na mangalarang kalak

i manjolung tanaon di huta-huta di Mandailing. Pondokna manjolung tanaon ngana

marbalok i jabat. Cumantong mararga nai pe di halak na pesek dontong. Pala

sakali kehe antong aling kuat mei dapot 5 kg i kali 3000 manjadi  15 rb.

Na jolo mandang 700-1000 maia i argana

sakilo. Hosa-hosa jolo iba manjalahi bahat batuna su baru taradong epengna.

Toke nai i kumpul ia baen jomburon do disia. Dung i

jombur  i paulpakkon ia mei marbelek tu

bagas-bagas ni hombar nia i. Baruma dung dapot danon ni kamiri on i gadis ia tu

poken, argana 10 – 20 rb sakilo. Jadi mon ni roa baen tu pabrik miyak, kosmetik,

bumbu dapur atope pabrik kimia. Dung pung-pang dope mangkapultak so nida na

godang argana. Anggo di Jawa memang pas mei nara dei 6 rb bage saparopat kilo.

Toke tanaon halak na sobar na bahat karejona tapi na bahatan dei epeng nia. Hum

kancang dope i pado toke kantalan na manggadis aek deba. Tai tarsarupo dei muap

bau dei duana tangan nai, tapi uskus ilala alak epeng naijama-jama nia tuor ni

kantalan ato eten-eten i. Uskus muse mantong apalagi keuntungan na dapot ia

dung pung-pang i ulpak si butet godang 

manjadi danonna doma. Eten-eten mantong ...

*telah tayang di FB Maret 2014