Oleh : Darwin Nasution
Kalimat nai papondok don sabotulna. Pangginjangna ima Aek Tape Sipulut Asli. Inumon panaek gairah atope pamilas suping do na ingkani di Mandailing Julu. Nai pause ni na mambaen tape i dei aek nai so igadis marsarak, tape dot aek na. So bahat aekna baritana ipabahat juo mada aek ni sipulut naon dohot ragi pangalala nai. Pala hum dapot pentong mardua tapelos dua liter i aekna pala mambaen tape sasuat sipulut madung nabetengan mai, madung bahat mei non dapot hepengna.
Ijia ma ale nganan na musohur so adong aek tape sipulut asli on. Dua ma na toho adong na jolo diKotanopan, i kantin ni beskop Tapanuli tambulna kacang tojin dot adong lopo di dolok ni PLN Muarasoro tambulna karupuk sambal. Hum kodoh sotik nai dolok ni PLN ian, ima so tagina lala anak muda mandarat disi. Copat ningkalai nahit lampu samping nai. Anggo na di beskopan bahatan kaum tua na lau marpoken dei minum atsa disi, tarpalan dei nahit harana dosis rendah dei ragi nai.
Bahatna sakali manggadis ning parlopoi tar 30 galas ma dung itambaan sotik dot aek so ulang ma lotok tu. Sa galas 150 ml i igadis kalai mei najolo 1000 rupia. Kacang tojin sanga karupuk sambalna 500 sada. Jadi pala adong 2000 rupia madung ra mei gara baba dot suping di bahonna. Na lentak-lentak nai nara mei bacar sotik pangkuling i, mabuk nai pabaen-baen. Paling otik malancar mei pangkuling i pala pa alo-aloon anak sikola di poken an.
Adong juo dontong akibatni atsa on da tu pamatang ni jolma. Ninna dung proses pembuangan manyogot naiadong mei na morus ato buruson i baenna, oni ra adong na landit songon mir-mir di kotoran nai. I arutna do rupa dingding ni boltok i ima so adong na landitna. Jadi tola do idokon memang inda pade niroa anggo majot-jot tu ni inum. Ninna pe antong hubege nara don manggugurkon janin anggo i inum ahalak na dompak bunting ato mangidua. Anggo soni nga ianjurkon on inumon ni adaboru, apalagi nabaru-baru, aso, sanga nga lalu copat maranak, rurus sajo tu toru an.
Anggo ibantong najolo sada ubat muse don ilala sasakali, baen pancahar. Ra dei adong antong hatia na susah iba tuaek na godang. Ulang be, roroi ma par atsa an i, paido mardua galas, pangan karupuk siak nai, pado adat incogot na malancar mei kaji nai mangatur ditopi aek an. Na dobus sajo mei songon nadong manulakkonna sian bagasan.
Jadi ima halilian na khas sotik di Mandailing Julu najolo. Atsa, manjadi ubat anggo ulang ma dodas tu, manjadi nyae anggo ma sor tu i inum. Na sep hatiana i inum pala lau mambola angin malam lau mulak tu uta, so ulang mangali tu angkon nai panahit kinan lampu samping nai targan so i pamasuk gigi ni astuti i lau tu juluan.Ngeeng ninna, inda taraso madung tolap tu Tamiang anggo dung milas badan i lau marangkat.
*telah tayang di FB September 2014
0 komentar:
Posting Komentar