Oleh : Darwin Nasution
Nasohot mada sannari ning Mamak Mudin mandapot gulaen sian Batanggadis an da, anggo hum hail maia sinjato niba. Idabu-idabu ompan i tu pangkailan tampalan niba najolo ninna, alahle, na jarang doma adong manurbingna. Eh manurbing, son manuk binege tie. Maksudna manyoro umpan na madung isangkotkon di kail on. Pala nadong pe ning mamak i, paling ituget-tuget i gamak songoni ompan i sampe abis, arana inda lulus kail nai ibaba nia. Ato sina sodong na tatak i bagasan ni aek i, manombo labi doma manyotopna, umtandang magotap tali nai, harana anggo on ilojongkon ia mei tujia-jia kail nai sampe magotap. Palanga na lesekna ilala manombo, saraor menek na mayup bagen do sangkot, ianggan mera.
Songoni ma ale suada ni ihan i sannari di batang aek bebas nai, maksudna inda i lubuk larangan ni parhuta i. Anggo i larangan i bahat. Tapi tong goarna larangan, inda tola mangkail disi, harana anggo tardapot ikobek tangan baru ipamasuk tu bagas nabontaran. Mulak tu na mangkail, songon na manjalahi sere doma manjalahi sulum sangan aporas na marpira sannari di batanggadis, aek sidenggan roa dei anggo na jolo.
Tu najolo kecek i, tola dei idokon totop dope maroban marsapulu ikur sulum sanga aporas i, i paapon-apon marompan goya. So adong indikator na, ibaen apung-apung na, ngun sanggar sanga solop, tando dot na manyotop. Jadi daganak pe iba na ingkani, malo ma iba i manyaratkonna so lek adong gulaen obanon muli. Ompanna tong na momo nai dei jalahan, goya serkus pamispisan atope di pangkal ni batang pisang. Pala ngadong goya, sapor pe binaen sanga ulok-ulok ni torung. I tondur mei sanga ijia lubuk-lubuk na tar lunong, nabiaso parkumpulan ni sulum ato aporas mei antong marmayam manjalahi panganon. Dabu kail niba na marompan tusi na bulus irongomi na mei. Marpupu mei tong iba mangangkat gulaen, i susuk mei dot bulung ni arambir palanga andor bungo. Tuk ma ilala marsapulu sampe lima bolas ikur, maragak ma iba i mantak, mang cukup mada baen goreng on pora dongan ni kopi, atope dongan ni indahan dung ilasiakan.
Imada, songon nostalgia doma sude carito i. Mang ipangan merkuri ni dompeng anak ni gulaen i, atope isosop siturum sampe tu gamak-gamak nai. Inda dapot jau sangan aha do motivasi ni alak kita i, aso do gemarna tu na destruktif. Padohal so sampe margulaen dope tu iba naingkani sakitar taon 70 -an benna pintar na dei ompuntai manjago aek i so lek mar ihan. Anggo alak sannari pe te napintaran do nida, tenggi do sikolana, tapi aso lek malala lingkungan i tele. Ato conto mangarompak na ilen ni pamimpin tai dei madung lalu tiruon nai sampe tu uta-uta an.
Ngana dapot jau beda sanga aha jamita ni i. Na joleh sannari Mamak Mudin inda maroban gulaen be ia pala icubona mangkail. Padohal daganak nia i najolo baya anta na ngun batanggadis i dei bahatan tarbutuhi sinaporluan proteinna. Igule, i goreng, isale jolo, mocom ma caro ni mamak i so lek mangan gulaen boru tulang niba nabahat na di alai i pinomat tolu kali sapoken. Mandoah doma hita mamakku, mudah-mudahan nian sadar kalak i, ulang be sai na irompak inganan ni gulaen i di batang aekan. So ro mulak manotas pira ni sulum, aporas, garing, lelan atope tingkalang i. Nga sadia honok nai nian maroban muli gulaen ma mamakki mulak. Aamiin Tuhanku.
*telah tayang di FB Juni 2013
0 komentar:
Posting Komentar