MARJEGANG*

 Oleh : Darwin Nasution

Di tolu pulu taon na salpu ma jolo na tama etongan na, bahat dope parsabaan i di itaan na isorin sasakali dot palawija. Biasona isuan mei asang goreng, dot marbaris-baris rangkak jegang. Pala asang goreng na on opat bulan baru mancabut, jegang nai tolu bulan adong mei na pade bolgangon. Tarsongon i maia tong produksi ni jegang nai, hum hasaya baen bolgangon maia i nabiaso ato tutungon, jagung bakar ning alak doli. Hatiha i nga dong i konna manabusi, mardalan ma iba soni di sabai, anggo nadong na pade bolgangon na bulus adong dei manawarkonna jiba. “Adope, bolgang jo”, ninna nampuna sabai, udak, tulang, sanga amangboru niba.

 

Songoni ma di sada ari mardalan-dalan ma iba dot dongan manopi-nopi saba tar di julu di bariba kampung i. Dompak marhasang goreng dot iantarai jegang son sindok ni nangkinani. Nang bisa mei itebak dung i, adong ma na mangontang mamolgang jegang. I nikmatan mantong hawa potang-potang nia ari i dot jegang nai bolgang, idaisan dot kacang panjang tu lasiak balanak i. Songon nai ‘gurah’ domei ilala igung i marsarsaran mon-mon i. Sangajo botul ubat alami mangela kotoran dei na mandais-isi saro kampung on, tarmasuk umpamo na lain ima gala-gala. Dung butong i hanyal martolu jegang bolgang on itutup mei minumna dot tes paet na capot, mago mei sude siak nai.

 

Adong di antara dongan on na mangido manutung, langsung do ilarang amangboru i, nampuna jegang on. Aso ningia, anggo itutung muap nai ioban timbus i tu aranganan, lalu muap lala musu ni suan-suanan i. Musu nai ima B-2 alias ibab, kan ro maia i borngin manggaya hasang sanga jegang i borngin mangiutkon muap nai. Marbeso dot na ibolgang. Nga se muap i harana uap air do ia langsung dei mago. Ima ning amang boru i pantangna, ulang manutung, su ulang son na mangundang musu nai.

 

Dung marayak pukul 4 potang antong pamit ma ami tu amang boru i, mardalan dope 1 km su lalu tu bagas. Adong puas na tarlobi di na markampung i. Marsilehenan ikhlas, inda laku epeng. Iba pe songoni mei tu alak pala dompak marhasang goreng sanga marjegang i saba niba i. Iontang kalak mamparhasayahonna, songonima boti gonti margonti. Pas hubaen tulisan on, kabarna di itaan na jarang doma sannari marhasanggoreng kalak. Nga tanggung bahatna ibab, sahinggo ra ninna inda manghasilkon sampe matobang jabat hasang sanga jegang nai. Jadima inda aru adongbe marsilehenan panganon songon saro jolo i. Jadima hurak wadah marsiholongan na markampung i.

*telah tayang di FB Oktober 2013