Oleh : Darwin Nasution
Hobbi ni daganak tu parmainan tradisional songon iba najolo muloi mamarkurang. Pala huida dompak mulak tu kampung na baru-baru on, sinapang-sinapang per buatan cino doma sude itabusan, pelorna tarsamimis ngun palastik, jadi pir bisa marmara pala topek hona mata. Ibaen huida pala i palua alai tu bulung ni bungo raya i na matombuk do ngun jarak 5 meter. Hum dayuk dope mata pado i.Anggo ayam-ayam tembak-tembak ngun bulu na menek i na jarangan dome ninna imainkon daganak, padohal gratis dot inda mambahayahon boti, paling taropat meter maia maksimum dao ni tembakanna.
Imada sakali on caritonta da, parmainan dompak menek marporang-porang pake alat ngun bulu nangkinani naidokon tembak-tembak adi. Tembak-tembak on adong don di bahat daerah. Di Batawi idokon kalai pletokan, i Sunda bebelotokan, di Jawa idok der-deran ato ter-teran. Ayam-ayam on mamake pelor ngun karotas nai rondam salain di Mandailing. Anggo di Mandailing pelorna mutik ni jambu do pala inda batu ni hamadihe.
Tembak-tembak di huta-hutaan ibaenngun dangka ni bulu, injangna 35 cm na mardiameter lubang 1-1,5 cm. Buluna ipili na kuat dot natobang, bulu soma dei biaso, ngara i anggo ngun bulu tumpat sanga bulu tolang. Bulu tumpat ngadong lubangna, pala dongpe hum natukit, pala bulu tolang na nipisan songoni juo kahanggi nai bulu sorik. Dungi baru igotap rapi ibagi dua. Baen suhul ni panulakma 10 cm ngun pudi, umumna ibaen na marbuhu so kuat. I aritan ma gasak-gasak panulak ima ngun juhut nibulu nagodang ukuranna salubang ni suhul ni tembak-tembakon, oni kon muat disuhul nai nangkinan. I atur ma so lancar itulakkon i lubang ni laras nai. Dung masuk tu suhul nai, iukurma ginjang ni gasak-gasak on i paombar dot laras nai. Ni urakan tar 1 cm ngun ujung, ima lobi ni ruang nangkan jadi parsoan ni pelornai.
Caro manembakkonna, pamasukma pelor hamadihe sanga mutik jambu aek i na parjolo sampe tu ujung ni laras nai. Dungi pamasuk muse pelor paduana dot gasak-gasak nangkinani pake tenaga. Pelor napaduaon on dua on hasayana. Sada manjadi maia tarsongon klep pompa namanghalangi udara so ulang kaluar, bahkan hapitdo martekanan na mabahat namanulakgodangkon pelor parjolo sahinggo marsuaro dopang. Paduana tong pelor naparpudi sangkot muse mei ia di ujung so manadapot geleran muse hona tembakkon dung i. Pala bahat kalakna na martembak-tembak i pas marporang-porang i pakarangan ni bagas, sangajo pung-pang ma binege.
On ma sada nai heritage of Mandailing culture na muloi tergusur oleh permainan moderen. Padohal anggo untuk setting Mandailing na fungsional dope on, harana na gok dope bahan-bahan nai isadiohon Na Sada I di landscap alam Mandailing gratis. Mainan modern malah marbahaya boti mamorluhon epeng nahum bahat manabusina. Bermain dengan alam on ma sada naso terwariskon i muloi inda be di pelajari daganak di huta-huta. Jadima martembak-tembak on mainan di pelosok, na mungkin painte punah doma. Mari hita budayahon mulak anso adong hariangan alami di daganak, inda mangarsak mangido epeng sanjomak ben panuor ni ayam-ayam.
0 komentar:
Posting Komentar