MARKONDEK*

 Oleh : Darwin Nasution

Kondek-kondek marcedes

mula siap jadi deges

potongan potong singapur

muda dung sidung jadi pur-pur

I sojo mei i ulak-ulak tukang kondek amangboru Usup nai topi ni poken Tamiang i najolo. Pala taringot au sada habiasoan niba naingkani langsung mei main sabolas jari tu keyboard ni kaputer on. Sakalion satontang markondek di poken Tamiang Kotanopan. Na sohotan markondek zaman i, tolu maia tukang kondek sagodang-godang ni kampung, dua di itopi ni poken i Ompung Jagagah dot baberena amangboru Usup, sada nai i tonga uta an abang Sahrudin. Na tolu on maia mangubak sirompas para ni ulu ni alak marratus i kampung nami i. Bope ale adong juo dei naposo-poso marsipangkasan margonti i topi aekan, tapi inda ture hasilna, harana mamake gunting maia.

Markondek antong nai sangajo mei sakaligus ari poken. Ioban ayah sanga umak niba mai iba lau marpoken, singgah ma jolo markondek ato marpangkas. Au na paling jot-jot ulala markondek dompak SD tu amangboru Usup i dei, harana um poso amangboru on, um deges do parmainkon ni masin manual nai so rip-rip hasilna, boti tip-tip pamopek an ni tali tudung nai pake piso waja med in jerman naigarut i ogoskon tu bobat kulit. Dos-dos ilala, oni i suru amangboru on dei marsormin iba jolo dung salose sanga madung cocok, anggo pangidaan ni amangboru on dompak i mang pas nia Roi Marten. Na malo mada amangboru on pasumankon, memang bintang filim Indonesia na tampanna i mei maso i.

Pala di Ompung Jagagah i, hatia iba menek madung na tobangan mei ibana. Jadi urang doma torangna niroa panaili i bope madung markaco mata. Bahatan daganak na menek domei na marcukur tu ompung on harana nga porlu motif be, rata-rata na ulu bukur doma bahatan. Daganak mantong, asal ulang marsarang pe ni roa hutu di ulu nai. Dodas juo doba manjorit daganak i adong na tangis, aha mambaen i, hapit obuk i di antara ni rigi-rigi ni masin pangkas ni ompung on madung i tarikna. Na hancit antong i baya ampot manombo niroa na bahat do nahapit i, ima hona tarik. Markaing danak umur 3-4 taon bagen do, oumaaaak na ancitan, talik opung obukku ninna. I apoi ompung on mei dot orang tua ni danak on, bahasona salose nai ma, tongkin dei na mancit i. Ngana losi alak i ro tusi arana ngadong i parpilian ambaenna marbukak i ompung on tiop ari. Anggo amangboru Usup kon ari poken dei so donok tu topi dalan an, i antara i bagas an dei i cukurna tar tu dolok ni pasar i, i pe kon dung mulak do marusaho, umpamo tu saba atope mangguris.

Parkondek an na i utaan songon na specialis tu naposo-poso dei huida waktu i. Abang-abang niba na madung SMP, SMA dei. Potongan cocok tu na madung lau margandak do niroa so tampan situtu nida na markondek tu bang Sahrudin on. Kaluar ngun i jadi halak na baru mantong poso-poso i ilala halai, martamba gaya dot pede nai. Padohal sugesti dei da niroa, ijia sajo pe marpangkas lek na tar soni dei hasilna, cuma i pamohot poso-poso kon na marpangkas tu sadun so sitedi nida non dung maridi.

Marpulu taon halai natolu maia na mangkondek di kampung na paling godang di Kecamatan Kotanopan i. Ngada na huboto pasti be sanga na mangolu dope on dua halak, amangboru Usup dot Bang Sahrudin. Anggo almarhum Ompung Jagagah adong dope mangabarkonna jau i madung maninggal. Maninggal ngana dong jabat be manoruskon usaho nai, boti nian zaman madung maruba, paralatanna pe na serba masin doma. Kabarna hubege na tu Kotanopan sanga tu Muarapungkut doma markondek sannari, ngana dong be di Tamiang. Inda dong na mewarisi markondek ato mamopek i, padohal na dores-dores tajomna masin elektrik pangkas nai sannari, sorana son eor-eor, momo do gari tiru on. Pala hum tarsaparopat jom pe mang salose sampe dot mamopekna. Mago ma na markondek ngun poken Tamiang. Ois da baya

*telah tayang di FB Jan 2014