Oleh : Darwin Nasution
Anggo najolo tong marmayam na manyonangkon on jiba dompak menek. Menek nai ruangku, sonjia ma idokon tie, habauanna iba ning nagodang-godang i, muap laken ningkalai. Ira-ira kalas 4-5 SD ma mangiutkon na targodang-godang na madung SMP marrakek ngun juluan. Pandaona ira-ira 2 km mandaratna iusahoon mentong pas di lombang kampung niba i. Maso i, inda aru adong dope i benen, nagodang arga dope i bope bokas ni ALS na pake parulu i, angke ngana aru adong ban serap nalai pe i, pala bocor na tempel dei jolo ninna i tonga arangan i pe i selatan an, manombo manakik gota bage jolo panempelna. Jadi jarang do adong benen na bokas, pala nadong pe nga tarpake be, anggo inda na mapultak, madung ngadong solatna be panempelan, bocor ijia-jia. Jadi marrakek dope anggo joman iba i, ngape marbenen saro sannari.
Kehe ma iba sarombongan nangkinani 4 kalak tu juluan, Pudung goarna, 2 km ngun banjar nami Siluak Tamiang. Di baba bondar na disian adong kobun pisang ni alak. I jalahan mei bokas batangna na madung i taba 4 batang. Injangna i pados-dos 2 meter. I paombar ma batang pisang naopat on so isusuk dot ayu napincur padomusa i tolu tempat, tardiujung nai duana dot i tonga. Kokoh me tong jabat tolu nganan pangarompuanna, nga ra be marsarak i pado adat i pardalanan tongkinnai. Dung salose, laik jalan ma ning mekanik nai, i sorong ma tu aek i. Na bulus mumbang mentong, harana dompak i debit ni batanggadis i na tinggian dope, inda songon sannnari na gorcing pe got so tarayupnadi musin alogo. Maragak marlayarma, i suru ma iba dua alak na menek-menek nai manaek parjolo, sada ijolo sada i pudi. Halai dua alak na godang-godang naipe soni juo sada ijolo sada i pudi, tai halai tiop hayu tardua meter juo itangan na panyitang, atope pangungkit pala sangkot di batu-batu.
Marlayar ma rakek si sonang roa on. Denggan roana mangalehen hasonangan marmayam jiba. Pala di nadoras-doras marombur marhasak-hasak i, ngori-ngori sodap mantong marsitiop kancang, marpupu i sampak aek ni hasak na godang-godang i. Manombo ma oleng songon na get sampak penumpang nai, tai nga lalu, madung na ahli-ahlian dei abang-abang niba i manyitiur na. Pala tolap tu naso aru marbatu i tarlima pulu meter manombo, palua sitang mami sude i, mangankon me jolo sanga aha nai oban, ato sanga aha nadapot di topi aek i lau marlayar nangkin, umpamo pote sanga gala-gala. Nai oban manombo goreng pala nga roti pisang i balut i palastik i cakukkon. Tolap mulak tu hasak-hasak i mantak jolo mangankon, marjuang muse doma jolo anso ulang tungkis.
Ira-ira 5 pasang hasak dot na lunong dokonon na get sampe mei tu lombang huta i. Pas i lombang hutai tong lubuk na godang dei maso i, sannari do madung hadaratan deba. Tar tolu paropat jom pardalanan ma nadua kilo meter i. Mata niba pe madung rara santara tokin i sampak aek. Pamatang marngalian mangindut-dut songon uting na ona siram di pamispisan. Tai by the way sonang do roa na marmayam i, puas ilala, mandarat mikim di napal nai topi lubuk i. Rakek nai pe naisadokahkon mei di daganak na maridi i lubuk i so iputar-putar kalai disi. Sannari ngana dong be marrakek, na marbenen doma sude, cuman painte mombur doma jolo aek su bisa. Anggo i logo get marbenen, angke na songon rura doma batanggadis, nga kan lancar i pardalanan nai marpupu sangkot. Anggo najolo batang pisang pe sai borat i, dohik dei tu jae an. Songoni mantong, ke batanggadis najolo madung marbeso mei sannari, ampot na rura batanggadis domei, i baen rakek nga nangkan na meser be dongan, ma babok tu, padohal najolo marrakek hatia logo dei. Boti madah intermezzo doma, gok naso bisa be di aek i, tarmasukma marrakek.
0 komentar:
Posting Komentar