Oleh : Darwin Nasution
On mada carito najolo muse sadanai. Dompak menek-menek dope iba najolo mangikuri tulang niba tulang menek goarna di huta na marmiang an. Adong dentong saba nalai, ato saba ni ompung niba, ben mamak niba on marangka maranggi dot umak niba, di topi ni DAS Batanggadis. Pala partopi batang aek halak nai najolo margaul sajomon dot gulaen. Adong na manjala, mangalukah, mangkail, mandurung, atope manuba. Mamak kon inda malo ibana manjala atope mangkail sanga mangalukah, ibaenna sandiri ma cara mandapot gulaen ima martanggal. Sonjia muse ruai na martanggal on, stay tune di catatan ni bayo nasti on
Tanggal on lukah na godang, ampot ngun hata tanggul juo don sanga tahalak. Isi ma nangkanna marsusun gulaen i marcampur dot saro-sarop na lewat di aek i. I ma saganop ari na iangkat baru itungtungkon tu topi i pambuatan gulaen nai.
Cara mambaen so ra songon nai ayak gulaen i tu tanggal an, iompang ma sabolak ni aek i dot tahalak bulu dengan kemiringan 45 derajat. I sada topi nai bariba nan ibaen tahalak bondar nainjang lurus palidang aek i tu tanggal nai muarana. I atur ma dot tahalak polang pake alangulu so tar manaek aek i, anso unjom tu tanggal i. Maksudna anso ulang be nangkanna manyongsong gulaen i dung masuk tu tanggal. Ulang be nangkan adong sinagogoan ni gulaen i nangkan malua.
So tapis aliran ni aek i manuju tu tanggal an, tahalak nai isaropan dot duhut atope daun ni arambir. Muli-muli so tiris bentong i harana ma sosot i baen sarop naioban ni batang aek i. Mur masep mei unjom ni aek nai pala madung pir panyaropi ni tahalak nai.
Biasona itaon mamak on mei potang niari tanggal on di hatia nia aek deges lan. I sangkotkon ma tanggal on papi, pala nadong juo pangompang i na godang tirisna, isaropan marsamari lau maridi. Manyogot niari incogot nai baru i silo. Pala dung tarsilo ilehen nai jiba gulaen sakali manggule, ira-ira onom sanga pitu garing i. Na targodang-godang dei memang gulaenna naso ra malua di tanggal on, harana tarrangkak dei panapis ni pamboaannai. Mulak ma iba anso ilehen gulaen on tu umak so ibaenna kuah rara.
Marsigor doma ibaenna santan na kolek tu guleon. Lasiakna pas, nagorsing na mantap boti juo bumbu pandohotina. Dung i pisat unte rudang tu gulei marsigor mei liut. I pangan pala tarsisungut taru marmiak doma dot sisungut i. Rara muse mei bibirku ihantam kuah rara i. Jagit holong da mamak madung i padohot mamak sajo au martanggal, lek marbagi juo mei garing sada dua tolu, so lek markuah rara ita, pangasih ni Na Sada I lewat aek Batanggadis.
0 komentar:
Posting Komentar