Oleh : Darwin Nasution
Pukul lima manyogot-nyogot lopes Subuh di pas logo on arina, marangkat mau ngun bagas na get mangguris on tu Aek Lumpatan. Tarngeri goar nai tele adong ‘lumpatan’ na,ninna natobang-tobang i pentong ubege rura na sering i lumpati nagogo i meidonok-donok tu guris on kon, mamotong tu Ambasang an, lau tu topi ni kampung Patialo. Mungkin babiat nai nara dei malua tu Muarasipongi an.
Goluk marsarung hotang na i jalin madung kobek mei di ak ku. Maranggu–anggun mei i sarung na on goluk, maradu dot piso takik asa garutna i bagasan, tarsongon irama Samrah. Inda sego langa piso takik i maradu dot goluk? Mudah-mudahan nga sanga mangua i, harana naibalut dei jolo suping nai dot abit baru ibaen muse kap na kotak ni korek api. Pangamanan marlapis dei so lek tajom, bahkan manombo i balut dope i sude dot suhul nai mamake abit buruk. Na get manakik sadari on nasemangatan on, ari mandaek, ari tolu on sadari on. Idaek mon anso adong gadison cogot tu poken Tamiang, tai ba anggo cocok do arga non potang i gadis juo do soni di si Cupang. Nangkon be manyimpan susut iba jabat. Epeng nai doma ilehen di umak utek baen parpoken cogot tu balerong an.
I tonga pardalanan, i kulit manis ni si Kaya goarna, repees ...repes...repees...saaar ...ninna ma mangalumpat di jolongku binatang na lom-lom. Idana au, baru ...kiiikk ninna ma masuk mulak tu rumbun-rumbun, rupa na mabiar do ia. Hape anak ni B2 do tarsagodang ni ember pandaekan 10 kilo i. Mabiar do uida, inda binoto ia, iba pe na mabiar do. Nga jiba dai isungke babi, na jatan simu i baba nai i. Pado isungkena umpama na degenanan dope u lehen tu muncung nia tajom ni goluk bengkok Si Layang-layang Mandi buatan ni ayah si Gandong on.
Tapi boto mabolak majolo sotik carito nai, adong do babi on na mandendam tu manusia, nabiaso bokas na ona tembak inda mate ato bokas na ona jorat malua. Songon nadong dei kesimpulan di babi i dot na manusia mambaen na. I song-songna mei sana marsuo disia alak. Pala topek adaboru, on ma parmarahan i, inda bisa mangalaon, atope terdesak inda bisa manaek. Adong do sejarah na tarsataon nalewat sampe maninggal sada alak Tamiang umak-umak i santik dot i sungke babi.Na ira-ira piso dei langa memang sait nai, na kaluar songon gading ni gaja i.Mulak tu pardalanan ki na giot mangguris on, dosar-dosar juo do sitiroktok niba bope babi na menek na pajorang mamotong dalan niba i. Tai bope soni nga munduron, ari mandaek, ari tolu na get mandapotkon dollar na margota, potang on palanga incogot.
Hu patorus pardalanan, totop manjago sumangot on bo, bope madung iampal B2 parjolo. Tarbayang muse iba antong naron dung muli tagi mangombus tapak minum kopsustel (kopi susu telor) dot tambulna goreng sitabar na mongkol di jambur si Arief i. Mardalan torus sampe tu guris on an di topi saba ni Tuan Tolib alakbanjar Siapas, saba Aek Lumpatan.
I muloan ma batang parjolo tar jom 6, ialuk ma sabariba batang ni koje on--imaso idokon kalak i dabo karejo on ‘mangkaluk batang’ salain manderes, manyeksek atope manakik-- mamake piso na marbontuk huruf ‘V” on ulu nai, na madung ilayan potang ni ari i natuari. Mangkilat doma , pala i lajokkon tu janggut niba mang magotapsa, mang sep mei tajom nai. Pas ucobo tong, sek, sek, sek ninna ma sora ni piso nai, amman na tajom on ni roa doma. Anggo krok-krok-krok ninna do nada na, na urang tajom dei, marurut dei strip ato polan nai, jadi inda mangalir lancar aek nai, harani sayatan nai inda mantap. Anggo piso takik konina, ben tajom na mangkojar doma aek nai mangiutkon piso i. I ligi takar naitong mang hampir pol mei sude jabat patolu ari na iguris. Soni ma torus sampe batang na pasaratus lima puluna urang lobi, tarsaimaia tong bahat ni havea ni kobun tai. Sampe tu batang pangabisan dung sajom satonga i jom 7.30, marbungo-bungo mei ilala ate-ate i, harana mandaek na doma tinggal, painteon ira-ira dua jom nai.
Di na jom tonga sapulu i muloan ma mangumpulkon barang nabau namanghasilkon epeng na bahat on. I padomu ma di sada ember na caer bope na madung boku takiknatuari. Manjadi sada mei sude. Dung batang pa 75 na gok ma sada ember ukuran10 kilo i. I pasimpan jolo ember na madung gok on di antara ni koje i songoni, ibuat muse ember na sada nai. Ponuh muse mei non di batang pa satarus lima puluna. Jadi dapot dua ember ato ira-ira 20 kilo na tolu ari on.
Pondok carito, ioban ma mulak tu huta, taru na itawar toke Cupang ma bulus 10.500 sakilo, pasaran di poke sabtu natuari tar 11.000. U lehen masoni isia, nangkon be painte cogot harana susut dope i. Dapot me epeng 210.000, ilehen ji umak utek 150.000 parpoken panobusi ni limbat, balanak, atope sayur na hiang-kiang, kantang asang muring, lasiak, bawang atope bumbu-bumbu na. Jiba 60.000 baen parkopi sapoken on tu lopo si Arief sanga si Buyung i. Tuk mei jolo, ari Salasa i muloan muse mangguris ari sada tu takik on an, mandasor muse.
Tarsoni ma jolo isi ni carito pangguris on, urang lobi na marsimohopan, marsijalangan, bope sampe-sampe ari akad potang lek na muap kantalan dope ulala tangan i. Nga mangua i be sulang sae suada mara, dompak mangombus tapak doma on bo di lopo an manikmati hasil nai.
*telah tayang di FB April 2013
0 komentar:
Posting Komentar